SİYASƏT


Azərbaycan hərbçiləri Gürcüstanda keçirilən beynəlxalq tədbirdə iştirak ediblər

Tbilisi, 17 fevral, AZƏRTAC

Gürcüstan Silahlı Qüvvələrinin Besik Kutataladze adına Saçxere Dağ Hazırlığı Təlim Mərkəzinin yaranmasının 14-cü ildönümü qeyd olunub.

AZƏRTAC xəbər verir ki, bu münasibətlə təşkil olunan mərasimdə və nümunəvi təlim çıxışlarında Gürcüstan, Azərbaycan, Polşa, Latviya və digər ölkələrin hərbçiləri də iştirak ediblər.

Gürcüstanın Müdafiə Nazirliyindən bildiriblər ki, ölkənin müdafiə qüvvələri komandanının müavini, briqada generalı İrakli Dzneladze Mərkəzin şəxsi heyətini təbrik edib, bu qurumun inkişafına göstərdiyi dəstəyə görə Fransa dövlətinə minnətdarlığını bildirib.

Tədbir çərçivəsində Mərkəzin rəhbəri, polkovnik-leytenant Malxaz Qoletiani Fransa Müdafiə Nazirliyinin gümüş medalı ilə təltif olunub.

Qeyd edək ki, Mərkəzin inşasına 2005-ci ildə başlanılıb və rəsmi olaraq 2006-cı ildə açılıb. Məktəb Bidzina İvanişvilinin Kartu Fondunun maliyyə dəstəyi ilə tikilib və maddi-texniki baza ilə təchiz olunub.

Təlim mərkəzində NATO-ya üzv və tərəfdaş ölkələrin hərbçiləri üçün beynəlxalq səviyyəli təlimlər təşkil olunur.

Mərasimdə Azərbaycanın Gürcüstandakı səfirliyinin hərbi attaşe aparatının rəhbəri polkovnik-leytenant Fuad İbrahimov iştirak edib.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.