SİYASƏT


Azərbaycan humanizm prinsiplərinə sadiqliyini həm müharibə, həm də sülh dövrünün qaydalarına əməl etməklə göstərdi

Bakı, 16 noyabr, AZƏRTAC

Ermənistanın sentyabrın 27-də başladığı hərbi təxribatların səbəb olduğu müharibə 44 gün ərzində işğalçının məğlubiyyəti ilə nəticələndi. Bu müddət ərzində rəşadətli ordumuzun bir-birinin ardınca düşmənə ağır zərbələr vurması və 27 il işğalda saxladığı ərazilərimizdən qovması təcavüzkar ölkənin siyasi-hərbi rəhbərliyini çıxılmaz vəziyyətə saldı. Ümid yerini havadarlarında görən Ermənistan rəhbərliyi hansı ölkəyə üz tutdusa, əlləri ətəklərindən uzun qayıtdı. ABŞ, Rusiya, KTMT işğalçıya birmənalı olaraq bildirdilər ki, Azərbaycan öz ərazisində vuruşur. Bu, o demək idi ki, artıq sizin işğalçı siyasətiniz dünya ictimaiyyətini də təngə gətirib.

Bu fikirləri AZƏRTAC-a Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.

Ç.Qənizadə deyib ki, Azərbaycan Ordusunun qarşısında davam gətirə bilməyən təcavüzkarlar dinc əhalini hədəfə aldılar və yaşayış məntəqələrini ballistik raketlərdən atəşə tutdular. Nəticədə 94 mülki əhali qətlə yetirildi. Azərbaycan Silahlı Qüvvələrinin hədəfində isə yalnız işğalçı ölkənin hərbi birləşmələri idi. Nəticə isə hamımızın gözləri önündədir. Noyabrın 8-də rəşadətli ordumuz Şuşaya Azərbaycan bayrağını sancdıqdan sonra Ermənistanın siyasi–hərbi rəhbərliyi çıxış yolunu təslim olmaqda gördü.

Noyabrın 10-da Azərbaycan, Rusiya prezidentlərinin və Ermənistanın baş nazirinin imzaladıqları birgə bəyanata əsasən, Ermənistan-Azərbaycan münaqişəsinə son qoyuldu. Üçtərəfli bəyanat məsələnin həlli istiqamətində son nöqtə oldu. Bəyanatın 6-cı bəndinə əsasən, Ermənistan Respublikası 15 noyabr 2020-ci il tarixinədək Kəlbəcər rayonunu, 20 noyabr 2020-ci il tarixinədək Ağdam rayonunu, 1 dekabr 2020-ci il tarixinədək isə Laçın rayonunu Azərbaycana təhvil verməlidir.

Bəyanatdan da göründüyü kimi, işğalçı qüvvələr Kəlbəcər rayonunu noyabrın 15-dək təhvil verməli idi. Amma Ermənistan tərəfi ordunun və qanunsuz olaraq yerləşdirilmiş insanların rayondan çıxarılması üçün əlavə 10 gün vaxt istədi. Məğlublar aciz olurlar. Aciz vəziyyətə düşən Ermənistan rəhbərliyi artıq bu dəfə yalvar-yapışla, xahiş-minnətlə müraciət etdi. Azərbaycan dövləti, Prezident İlham Əliyev həmişə humanizm prinsiplərinə böyük üstünlük verib. 44 günlük müharibə zamanı da dünya ictimaiyyəti bunun şahidi oldu. Ermənistan tərəfi dinc əhaliyə qarşı nə qədər qəddarlıq nümayiş etdirsə də, Azərbaycan tərəfi mülki əhalini hədəfə almadı və bunu dəfələrlə bəyan etdi. Dövlətimizin başçısı dünyanın aparıcı kütləvi informasiya vasitələrinə müsahibələrində də dedi ki, Azərbaycan Ordusu müharibə qaydalarına ciddi riayət edir, qadağan olunmuş silahlardan istifadə etmir və mülki əhalini hədəfə almır. Bu dəfə də humanizm prinsiplərinə sadiqliyini nümayiş etdirərək, Rusiya Prezidenti Vladimir Putinin xahişini nəzərə alaraq, Ermənistan ordusunun və qanunsuz olaraq yerləşdirilmiş insanların Kəlbəcər rayonundan çıxarılması üçün əlavə 10 gün vaxt verərək müddəti noyabrın 25-dək uzadıb.

Halbuki 1993-cü ildə Kəlbəcərin işğalı zamanı erməni hərbi birləşmələri əhaliyə rayonu tərk etmək üçün cəmi 10 saat vaxt vermişdi. İşğalçı ölkənin rəhbərliyi yəqin ki, öz qəddarlıqlarını unutmayıblar. İşğalçılar həmin vaxt belə bir qeyri-humanist qərarı qəbul edərkən, Kəlbəcər rayonunun coğrafi baxımdan böyük bir ərazini əhatə etdiyini, relyefin mürəkkəbliyini, hava şəraitinin ağırlaşmasını nəzərə almamışdılar. Azərbaycan tərəfi isə bütün bunları nəzərə alaraq ermənilərə 10 gün əlavə vaxt verdi. Həmçinin nəzərə alınıb ki, Ermənistanın işğal etdiyi Ağdam rayonu ərazisindəki qoşunları da Qarabağdan çıxmaq üçün Kəlbəcər yolundan istifadə etməyə məcburdur. Kəlbəcəri Ermənistanla birləşdirən yolun texniki imkanları insanların kütləvi hərəkətinə imkan vermədiyindən tıxaclar, ləngimələr müşahidə olunur.

Dövlət başçımızın humanizm prinsiplərinə sadiqliyi Ermənistandan fərqli olaraq, Azərbaycanın həm müharibə, həm də sülh dövrünün qaydalarına tam əməl etməsində də bir daha təsdiqini tapdı. Ermənilər isə yenə də öz vəhşiliklərinə, qəddarlığına sadiqliklərini nümayiş etdirirlər. Onlar faşizm ideologiyasının davamçısı olduqlarını Kəlbəcərdə evlərə və meşələrə od vurmaqla bir daha təsdiqlədilər. Görünür, məğlubiyyətlərinin qisasını təbiətdən, mülki obyektlərdən, evlərdən almaq istəyirlər. Dünya bir daha erməni barbarlığının şahidi olur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.