SİYASƏT
Azərbaycan ilə Almaniyanın Saarland federal torpağı arasında əməkdaşlıq məsələləri müzakirə olunub
Berlin, 30 yanvar, AZƏRTAC
Azərbaycanın Almaniyadakı səfiri Ramin Həsənov Saarland federal torpağının paytaxtı Saarbrüken şəhərinə işgüzar səfər edib.
AZƏRTAC xəbər verir ki, federal torpağın Baş Naziri Tobias Hansla görüşdə Azərbaycan və Almaniya arasında münasibətlərin tarixi və bu günü barədə fikir mübadiləsi aparılıb. Səfir Azərbaycanda alman məskənlərinin salınmasından başlayan 200 illik tarixin Prezident İlham Əliyevin imzaladığı Sərəncamla yüksək səviyyədə qeyd edildiyini vurğulayıb. Hazırda dövlətlərimiz arasında bütün sahələrdə münasibətlərin yüksək dinamika ilə inkişaf etdiyini qeyd edən R.Həsənov Almaniyanın Federal Kansleri Angela Merkelin 2018-ci ildə Azərbaycana səfərinin ikitərəfli münasibətlərin inkişafına təkan verdiyini diqqətə çatdırıb.
Görüşdə, həmçinin Azərbaycan ilə Almaniya, o cümlədən Saarland torpağı arasında iqtisadi və humanitar sahələrdə mövcud münasibətlər və əməkdaşlıq imkanları müzakirə edilib. R.Həsənov Azərbaycanda gedən inkişaf, iqtisadiyyatın şaxələndirilməsi istiqamətində atılan addımlar, nəqliyyat sahəsində həyata keçirilən layihələr, azad ticarət zonası və sənaye parklarının yaradılmasının Almaniya iqtisadiyyatı ilə əməkdaşlıq üçün yaxşı imkanlar açdığını diqqətə çatdırıb və Saarland şirkətlərinin bu imkanları dəyərləndirməsini təklif edib. Səfir federal torpağını Baş Nazirini və Saarland hökumətinin digər nümayəndələrini ölkəmizə səfərə dəvət edib.
Tobias Hans Azərbaycanda alman dilinin populyarlığını, Höte Mərkəzinin fəaliyyət göstərməsini, ölkəmizin Alman Akademik Mübadilə Xidməti ilə fəal əməkdaşlığını, Azərbaycanın dövlət proqramı ilə yüzlərlə gəncin Almaniyada təhsil almasını maraqla qarşılayıb. O, bütün bunların təmsil etdiyi Saarland torpağı və Azərbaycan arasında daha sıx iqtisadi əməkdaşlıq və yeni tərəfdaşlıq layihələrinə təkan verəcəyinə ümidini ifadə edib.
Görüşdə Azərbaycanın xarici siyasəti, həyata keçirdiyi transmilli layihələr, Ermənistan-Azərbaycan Dağlıq Qarabağ münaqişəsi barədə də danışılıb.
R.Həsənov səfər zamanı, həmçinin Süni İntellekt üzrə Alman Tədqiqat Mərkəzində olub. Mərkəzin mətbuat katibi Raynhard Karqer, baş elmi mütəxəssisi Boris Brandherm və azərbaycanlı əməkdaşı Nicat Mehdiyev Azərbaycan səfirini sözügedən elmi təsisatın fəaliyyəti və layihələri barədə məlumatlandırıblar. Eləcə də Mərkəzin beynəlxalq əlaqələri və onun Azərbaycanla əməkdaşlıq imkanları müzakirə edilib.
Saarland Sənaye və Ticarət Palatasının beynəlxalq əlaqələr üzrə direktoru Oliver Qroll və Palataya üzv olan şirkətlərin təmsilçiləri ilə işçi nahar zamanı səfir Azərbaycan iqtisadiyyatı, Almaniya ilə əlaqələr, ölkəmizdə investisiya imkanları, regionun geosiyasi xüsusiyyətləri, Azərbaycanda siyasi və iqtisadi sabitlik barədə məlumat verib və çoxsaylı sualları cavablandırıb. O, Sənaye və Ticarət Palatasını Azərbaycandakı iqtisadi imkanlarla daha yaxından tanış olmaq üçün ölkəmizə səfərə, həmçinin Bakıda fəaliyyət göstərən Alman Xarici Ticarət Palatası ilə təmas qurmağa dəvət edib.
R.Həsənov səfər çərçivəsində Saar Tarix Muzeyində də olub.
Vüqar Seyidov
AZƏRTAC-ın xüsusi müxbiri
Berlin