Əbu-Dabi, 29 noyabr, AZƏRTAC

Azərbaycanın Birləşmiş Ərəb Əmirliklərindəki (BƏƏ) səfiri Elxan Qəhrəman AZƏRTAC-ın müxbirinə müsahibəsində deyib ki, ölkələrimiz arasında bir çox sahələrdə uğurlu əməkdaşlıq mövcuddur.

Səfir ikitərəfli münasibətlərin tarixinə nəzər salaraq bildirib ki, ulu öndər Heydər Əliyevin Birləşmiş Ərəb Əmirliklərinin sabiq Prezidenti Şeyx Zayedbin Sultan Əl Nəhyanla 1994-cü ildə İslam Konfransı Təşkilatının Kasablanka Sammiti çərçivəsindəki tarixi görüşü əlaqələrimizin istiqamətlərini müəyyən etdi. Azərbaycan Prezidenti İlham Əliyevin 2006-cı ilin noyabrında Birləşmiş Ərəb Əmirliklərinə rəsmi səfərindən sonra ikitərəfli əlaqələrimiz bütün sahələrdə, o cümlədən siyasi sahədə yeni müstəviyə qədəm qoydu. Yüksək səviyyəli qarşılılıqlı səfərlər, Xarici İşlər Nazirlikləri arasındakı siyasi məsləhətləşmələr əlaqələrimizin inkişafına töhfə verir. Ermənistan-Azərbaycan, Dağlıq Qarabağ münaqişəsinin həlli məsələsində rəsmi Əbu-Dabi Azərbaycanın haqlı mövqeyini dəstəkləyir. Beynəlxalq təşkilatlar çərçivəsində səmərəli əməkdaşlıq həyata keçirilir. Bütün bunlar siyasi əlaqələrimizin yüksək səviyyədə olduğunu göstərir.

Diplomat deyib ki, ölkələrimiz arasında iqtisadi və ticarət sahələrində də əməkdaşlıq genişlənir. 2008-2014-cü illərdə Azərbaycan Respublikası Hökuməti və Birləşmiş Ərəb Əmirlikləri Hökuməti arasında iqtisadi, ticarət və texniki əməkdaşlıq üzrə birgə Hökumətlərarası Komissiyanın beş iclası keçirilib. Həmin müddətdə ticarət mübadiləsi 95 milyon dollardan 563 milyon dollara qədər yüksəlib. Qarşılıqlı əməkdaşlıq investisiya, infrastruktur layihələri, bərpa olunan enerji, turizm, ticarət, sənaye, kənd təsərrüfatı, ətraf mühit kimi sahələri əhatə edir.

Turizm sahəsində əlaqələrə gəlincə qeyd etmək lazımdır ki, son illərdə BƏƏ vətəndaşlarının ölkəmizə səfərlərinin dinamikası artıb. Əbu-Dabidən ölkəmizə turist axınının sürətlənməsi və Azərbaycan turistlərinin Dubayla yanaşı, Əbu-Dabiyə də səyahətlərinin artması məqsədilə iki paytaxt arasında birbaşa uçuşların təşkili istiqamətində işlər aparılır. Bundan başqa, hər iki ölkədə qarşılıqlı mədəniyyət günlərinin təşkili mədəniyyət sahəsində əməkdaşlığın inkişafının göstəricisidir.

Səfir bildirib ki, son dövrlər Azərbaycan ilə Birləşmiş Ərəb Əmirlikləri arasında informasiya sahəsində əməkdaşlıq da inkişaf edir. Bu məsələdə ilk növbədə Azərbaycan Dövlət Teleqraf Agentliyinin (AZƏRTAC) rolunu xüsusi qeyd etmək lazımdır. Bundan başqa, Birləşmiş Ərəb Əmirliklərinin İnformasiya Şurasının dünya ölkələrinin media nümayəndələri üçün təşkil etdiyi silsilə tədbirlərdə Azərbaycanın təmsil olunması media sahəsində əlaqələrin inkişafı baxımından böyük əhəmiyyətə malikdir.

İbad Bağırov

AZƏRTAC-ın müxbiri

Əbu-Dabi