SİYASƏT
Azərbaycan ilə Rumıniya arasında saziş imzalanıb
Bakı, 10 mart, AZƏRTAC
Martın 10-da Azərbaycan və Rumıniya Xarici İşlər nazirlikləri arasında siyasi məsləhətləşmələrin növbəti mərhələsi çərçivəsində xarici işlər nazirinin müavini Xələf Xələfov ilə Rumıniyanın xarici işlər nazirinin müavini Daniel İonitanın görüşü keçirilib.
Görüşdə “Azərbaycan Respublikası Hökuməti və Rumıniya Hökuməti arasında xidməti pasportlara malik olan şəxslərin vizadan azad edilməsi haqqında Saziş” imzalanıb.
Xarici İşlər Nazirliyinin mətbuat xidmətindən AZƏRTAC-a bildiriblər ki, X.Xələfov ölkəmizin Rumıniya ilə əlaqələrin inkişafına xüsusi önəm verdiyini qeyd edərək, siyasi məsləhətləşmələrin növbəti mərhələsinin ikitərəfli münasibətlərin və siyasi dialoqun daha da güclənməsinə xidmət etdiyini vurğulayıb. Azərbaycan ilə Rumıniya arasında strateji tərəfdaşlıq münasibətlərinin mövcud olduğunu deyən nazir müavini ölkələrimiz arasında siyasi, iqtisadi, nəqliyyat, kommunikasiya, humanitar və digər sahələrdə münasibətlərin daha da inkişaf etdirilməsi üçün əlverişli imkanların olduğunu diqqətə çatdırıb.
Xələf Xələfov tarixi İpək Yolunun bərpası, Şərq-Qərb və “Şimal-Cənub“ nəqliyyat dəhlizi kimi irimiqyaslı layihələrin həyata keçirilməsində Azərbaycanın rolunu qeyd edərək, Xəzər dənizi və Qara dəniz arasında nəqliyyat daşımalarının həyata keçirilməsində tranzit ölkələr kimi Azərbaycan və Rumıniyanın xüsusi əhəmiyyətə malik olduğunu diqqətə çatdırıb.
Enerji sahəsində əməkdaşlıq haqqında danışan X.Xələfov Avropanın enerji təhlükəsizliyinin təmin olunmasında alternativ enerji mənbəyi kimi Azərbaycanın rolunu qeyd edib. Nazir müavini beynəlxalq təşkilatlar çərçivəsində qarşılıqlı etimad əsasında iki ölkə arasındakı əməkdaşlığı vurğulayıb.
Ermənistan-Azərbaycan münaqişəsi haqqında məlumat verən X.Xələfov problemin regionda sülhə və təhlükəsizliyə ciddi təhdid yaratdığını bildirib. O, BMT Təhlükəsizlik Şurasının müvafiq qətnamələrinə uyğun olaraq, münaqişənin həllinin yalnız Azərbaycanın ərazi bütövlüyü, suverenliyi və beynəlxalq səviyyədə tanınmış sərhədlərinin toxunulmazlığı prinsipləri əsasında mümkün olduğunu deyib.
D.İonita Azərbaycana yenidən səfər etməsindən məmnunluq ifadə edərək, IV Qlobal Bakı Forumuna dəvətə görə təşəkkürünü bildirib. O, Rumıniyanın Azərbaycan ilə xüsusi münasibətlərə malik olduğunu qeyd edərək, bütün sahələrdə əməkdaşlığın inkişaf etdirilməsində maraqlı olduğunu vurğulayıb. Yüksək səviyyəli dövlət rəsmilərinin səfər mübadiləsinin həyata keçirilməsinin ikitərəfli münasibətlərin inkişafında önəmini vurğulayan nazir müavini cari ildə bir sıra səfərlərin planlaşdırıldığını diqqətə çatdırıb və ölkələrimiz arasında siyasi dialoqun daha da gücləndirilməsinin vacibliyini qeyd edib.
Rumıniyanın Azərbaycan ilə iqtisadi əlaqələrin genişləndirilməsində maraqlı olduğunu bildirən D.İonita Azərbaycan-Rumıniya Hökumətlərarası Komissiyasının növbəti iclasının cari ilin sonlarında keçirilməsinin nəzərdə tutulduğunu, həmçinin iclas çərçivəsində biznes forumun təşkilinin mümkünlüyünü diqqətə çatdırıb. Bundan əlavə, o, iki ölkə arasında kənd təsərrüfatı, nəqliyyat və kommunikasiya, müdafiə, mədəniyyət, təhsil, tələbə və müəllimlər üçün mübadilə proqramlarının təşkili sahələrində əməkdaşlığın genişləndirilməsi üçün yaxşı potensialın olduğunu qeyd edib.
Azərbaycanın regionda Rumıniya üçün etibarlı tərəfdaş olduğunu vurğulayan nazir müavini ölkəsinin Azərbaycanın ərazi bütövlüyü, suverenliyini və beynəlxalq səviyyədə tanınmış sərhədlərinin toxunulmazlığını dəstəklənməsi ilə bağlı mövqeyinin dəyişməz qaldığını bildirib. O, Rumıniyanın bundan sonra da Azərbaycan ilə bütün sahələrdə sıx əməkdaşlıq etmək niyyətini ifadə edərək, iki ölkə arasında siyasi dialoqun davamlı olması üçün öz həmkarını Rumıniyaya səfərə dəvət edib.