Azərbaycan ilə Səudiyyə Ərəbistanı arasında qarşılıqlı biznes missiyalarının təşkilinə dair fikir mübadiləsi aparılıb

Bakı, 31 yanvar, AZƏRTAC

Azərbaycan-Səudiyyə Ərəbistanı İşçi Qrupunun fəaliyyətinin aktivləşdirilməsi müzakirə edilib.

Kiçik və Orta Biznesin İnkişafı Agentliyindən (KOBİA) AZƏRTAC-a bildirilib ki, qurumun İdarə Heyətinin sədri Orxan Məmmədov Səudiyyə Ərəbistanının İnvestisiya Nazirliyinin Beynəlxalq əlaqələr üzrə nazir müavini Məhəmməd Əl-Hasnah ilə görüşüb.

Onlayn formatda keçirilmiş görüşdə ikitərəfli əməkdaşlığa, o cümlədən Azərbaycan-Səudiyyə Ərəbistanı İşçi Qrupunun fəaliyyətinin aktivləşdirilməsinə, ötən ilin dekabrında KOBİA və Səudiyyə Ərəbistanı Palataları Federasiyası arasında imzalanmış Sazişə əsasən yaradılmış Azərbaycan-Səudiyyə Ərəbistanı Birgə İşgüzar Şurasının fəaliyyətinin təşviqinə, ölkəmizə investisiya qoyuluşu imkanlarına və qarşılıqlı biznes missiyalarının təşkilinə dair fikir mübadiləsi aparılıb.