MƏDƏNİYYƏT


Azərbaycan pavilyonu “Dubay Ekspo 2020” sərgisinin ən çox ziyarət edilən pavilyonları sırasındadır

Dubay, 19 noyabr, AZƏRTAC

Xəbər verdiyimiz kimi, Birləşmiş Ərəb Əmirliklərinin (BƏƏ) Dubay əmirliyində “Düşüncələri birləşdirək, daha yaxşı gələcək quraq” (Connecting Minds, Creating the Future) mövzusunda keçirilən “Ekspo 2020” ümumdünya sərgisi oktyabrın 1-dən fəaliyyətə başlayıb. Qeyd edək ki, 190 ölkənin təmsil olunduğu “Dubay Ekspo 2020” ümumdünya sərgisi 2022-ci il martın 31-ə qədər davam edəcək. Ərazi baxımından “Dubay Ekspo 2020” bu günə qədər təşkil olunan ən böyük ekspo tədbiridir. Ümumilikdə, 400 hektardan çox ərazisi olan sərgi tematik olaraq 3 hissəyə bölünür: davamlılıq, mobillik və imkan.

Azərbaycan sərgidə Heydər Əliyev Mərkəzinin təşkilatçılığı ilə “Gələcəyin toxumları” mövzusu ilə çıxış edir və pavilyonumuz sərginin davamlılıq hissəsində yerləşir. "Sabahın inkişafı bu gün verilən qərarlardan asılıdır" konsepsiyasını özündə əks etdirən milli pavilyondakı interaktiv elektron vasitələrdə Azərbaycanın tarixi, coğrafiyası, mədəniyyəti, müasir incəsənəti və digər mövzularda videoçarxlar təqdim edilir. Həmçinin burada Prezident İlham Əliyevin rəhbərliyi ilə Azərbaycandakı iqtisadi və sosial sahələrdə davamlı inkişaf və innovasiyalar, 44 günlük Vətən müharibəsi nəticəsində işğaldan azad olunmuş torpaqlarımızda aparılan quruculuq işləri haqqında məlumat verilir. Üçmərtəbəli, ağac və onun budaqları formasını xatırladan pavilyonun konsepsiyası təsdiq edir ki, yalnız insan kapitalının inkişafı ilə dayanıqlı gələcəyə nail olmaq mümkündür.

Landşaftı Azərbaycan və digər ölkələrdən olan rəssamların “Xarıbülbül” və “Ceyranlar” silsiləsindən heykəltəraşlıq əsərləri ilə bəzədilən milli pavilyona “Ekspo 2020” ümumdünya sərgisinin iştirakçıları böyük maraq göstərirlər.

Milli pavilyonumuzu ziyarət edən suriyalı filosof Xaled Hassan AZƏRTAC-ın müxbiri ilə söhbətində deyib: “Dubay Ekspo 2020“dəki Azərbaycan pavilyonunu ziyarət edərkən gördüm ki, ölkə yeni erada yeni hədəflərə doğru inamla irəliləyir. Yaxın Şərq və Qafqaz regionu barədə geniş məlumata malik olan insan kimi deyə bilərəm ki, bu coğrafiyada belə tərəqqiyə nail olmuş çox az ölkə var. Düşünürəm ki, bunun əsas səbəbi Azərbaycanda olan sabitlik və xalqınızın həmrəyliyidir.

Pavilyonunuzda Azərbaycanın tarixi, coğrafiyası, mədəniyyəti, müasir incəsənəti və digər mövzularda videoçarxlar təqdim olunur. Bu, həm çox maraqlıdır, həm də gözəl ölkəniz barədə ətraflı məlumat almaq imkanı yaradır. Pavilyonun mövzusu da maraqlıdır. Məhz sabitlik və inkişaf şəraitində yaşayan ölkələrdə insanlar gələcəyə inamla baxırlar. Azərbaycan xalçaları gözəldir və naxışları Şərqin mədəni irsinin sintezidir. Bakıda olmasam da, interaktiv videoçarxda paytaxtınızın gözəl mənzərələrini seyr etdim, həmçinin mədəniyyətiniz və müasir inkişafınız haqqında müfəssəl məlumat aldım. Demək istəyirəm ki, pavilyonun təşkilatçıları məqsədlərinə nail olublar. Buraya gələn insanlar Azərbaycana səfər etməyi, bütün bu gözəllikləri görməyi arzu edirlər. Azərbaycan pavilyonuna insanlar böyük maraq göstərirlər”.

“Dubay Ekspo 2020” ümumdünya sərgisində, həmçinin Azərbaycan mədəniyyətinə və tarixinə aid ekspozisiya, heykəltəraş Elvin Nəbizadənin "Kövrək saz" instalyasiyası, Leyla Əliyevanın “Ürək” heykəltaraşlıq əsəri, Faiq Əhmədin xalça motivlərində instalyasiyası da təqdim edilir. Təbiətdən ilhamlanaraq yaradılan pavilyonun dizaynı və konsepsiyası özünəməxsusluğu ilə seçilir və eksponun ən çox ziyarət edilən pavilyonları arasındadır. Milli pavilyonda gün ərzində 10 mindən çox ziyarətçi olur. Sərgi çərçivəsində pavilyonun səhnəsində mütəmadi olaraq konsertlər və müxtəlif mədəni proqramlar təşkil edilir, ziyarətçilərə Azərbaycanın tarixi və bugünkü həyatını yaxından izləmək imkanları yaradılır.

Sərginin Kanadadan olan ziyarətçisi Metyu Henkok bildirib ki, “Ekspo Dubay 2020”dəki Azərbaycan pavilyonu ölkənin müxtəlif sahələrdə yüksək inkişafını əks etdirir. Kanadada Bakını neft şəhəri kimi tanıyırlar, lakin bu gün burada gördüklərimə əsasən deyə bilərəm ki, paytaxtınız möhtəşəm olmaqla yanaşı, yüksək texnoloji inkişaf mərhələsindədir. Mən Azərbaycan xalçalarına valeh oldum. Rəsmlər, milli geyimləriniz, gözəl tərtibat da xoşuma gəldi. Kanadada bir şirkətdə texnologiya mühəndisi olaraq çalışıram. Deməliyəm ki, Azərbaycan pavilyonu texnoloji tərtibatına görə ən inkişaf etmiş ölkələrin pavilyonları ilə rəqabət apara bilər. Hiss olunur ki, sizin ölkənizdə neft gəlirlərinin insan kapitalına çevrilməsi istiqamətində mühüm işlər görülür. “Gələcəyin toxumları” mövzusu da çox uğurludur. Çünki hər bir ölkənin gələcəyi gənclərə yaradılan şəraitdən asılıdır. İnteraktiv elektron vasitələrdə Azərbaycanın tarixi, coğrafiyası, mədəniyyəti, müasir incəsənəti və digər mövzularda videoçarxlar da məndə böyük təəssürat yaratdı. Pavilyonun təşkilatçılarına uğurlar arzulayıram”.

Azərbaycan pavilyonunun “Dubay Ekspo 2020” ümumdünya sərgisində tərtibatı, texnoloji təchizatı və ideyasına görə ən yaxşılar sırasında yer aldığını söyləyən filippinli modelyer Mika Medinas deyib: “Pavilyonda Azərbaycan ilə bağlı geniş məlumat almaq mümkündür. Monitorda paytaxt Bakının gözəlliyi və Azərbaycanın füsunkar təbiəti barədə videolar məndə böyük təəssürat yaratdı.

Mən pandemiyadan əvvəl Bakıda olmuşam. Bu gün sərgidə həmin səyahətin xoş anlarını yenidən yaşadım. Burada mənə qədim Azərbaycan xalçalarının toxunulma texnologiyasını izah etdilər. Həmçinin Azərbaycanın incisi Şuşanın ötən il işğaldan azad edilməsi barədə məlumat aldım və bu qədim şəhərin təbiətini videoformatda seyr etdim. Təəssüf ki, müharibə nəticəsində dağıntıları da gördüm. Dünən “Ekspo Dubay 2020”də Azərbaycan Milli Günü ilə bağlı keçirilən tədbirlər də möhtəşəm idi. Mən o qədər xoş təəssürat aldım ki, yaxın vaxtlarda ölkənizə yenidən səfər etmək qərarına gəldim. Azərbaycan xalqına rifah, sülh və əmin-amanlıq arzulayıram”.

Sərginin Hindistandan olan ziyarətçisi Dineş Mohan dünən “Dubay Ekspo 2020”də Azərbaycan Milli Günü çərçivəsində keçirilən tədbirlərdə iştirak etdiyini və bu tədbirlərin dünyanın ən gözəl şəhərlərindən biri olan Dubaya xüsusi xoş ovqat qatdığını söyləyib. O deyib: Bu gün də Azərbaycan pavilyonunu ziyarət etdim. Xalqınızın böyük mədəniyyəti, qədim tarixi, zəngin irsi, ölkənizin ecazkar təbiəti məni valeh etdi. Bildiyiniz kimi, Birləşmiş Ərəb Əmirliklərində çoxlu sayda hindistanlı yaşayır. Soydaşlarıma da Azərbaycan pavilyonunu ziyarət etməyi tövsiyə etdim. Özüm iş adamıyam və yaxın vaxtlarda Azərbaycana səyahət etməyi planlaşdırıram. Bu cür möhtəşəm pavilyonu tərtib edən mütəxəssislərə, dostlarımıza xüsusi təşəkkürümü bildirirəm”.

Sloveniyalı Neyç Lovriç də Azərbaycan pavilyonu ilə tanışlığın onda xoş təəssürat oyatdığını bildirərək deyib: “Mən “Dubay Ekspo 2020”də Azərbaycan Milli Günü çərçivəsində keçirilən tədbirləri çox bəyəndim. Çox rəngarəng, möhtəşəm tədbir oldu. Bu gün isə Azərbaycan pavilyonunu yenidən ziyarət etdim. İnteraktiv elektron vasitələrdən aldığım məlumatlar da faydalı oldu. Çünki mən universitet müəllimiyəm və Azərbaycanın tarixi, mədəniyyəti, coğrafiyası haqqında yeni biliklər dünyagörüşümü zənginləşdirdi. Qərara aldım ki, ilk fürsətdə Azərbaycana səyahət edim və bütün bu gözəllikləri öz gözlərimlə görüm”.

Oqtay Bayramov

AZƏRTAC-ın xüsusi müxbiri

Dubay

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.