REGİONLAR
Azərbaycan qadınları cəmiyyətdəki aktual problemlərin həllində fəallıq göstərirlər
Xırdalan, 15 oktyabr, Ətrabə Rzayeva, AZƏRTAC
Oktyabrın 15–də Ailə, Qadın və Uşaq Problemləri üzrə Dövlət komitəsinin sədri Hicran Hüseynova Xırdalan şəhərindəki Heydər Əliyev Mərkəzində Abşeron rayonunun ictimai-siyasi və mədəni həyatında fəal iştirak edən qadınların bir qrupu ilə görüşüb.
AZƏRTAC xəbər verir ki, görüşü açan Abşeron Rayon İcra Hakimiyyətinin başçısı İradə Gülməmmədova ailə dəyərlərindən danışıb, onun qorunub saxlanmasının vacibliyini diqqətə çatdırıb. Bildirib ki, bütün nailiyyətlərin əsasında ailə səadəti durur. Ailə bütün zamanlarda cəmiyyətin ən müqəddəs təməl daşı hesab olunub. Azərbaycan xalqının dərin ailə ənənələri mövcuddur. Cəmiyyətimizdə ailə həmişə müqəddəs sayılıb.
Ulu öndər Heydər Əliyevin hakimiyyətə qayıdışından sonra dövlət-ailə siyasətinin əsasının qoyulduğunu diqqətə çatdıran İradə Gülməmmədova hazırda bu siyasətin Prezident İlham Əliyev tərəfindən uğurla davam etdirildiyini vurğulayıb. Qeyd olunub ki, bu gün ailə məsələləri həm dövlətin, həm də cəmiyyətin önəm verdiyi ən əsas məsələlərdən, prioritet istiqamətlərdən biridir. “Birinci vitse-prezident Mehriban xanım Əliyeva beynəlxalq aləmdə Azərbaycan qadınının mənəvi zənginliyini, vətənpərvərliyini, ailə dəyərlərini uğurla təmsil edir”, - deyən natiq rayonlarda gedən ictimai, siyasi, iqtisadi, mədəni proseslərdə qadınların fəal iştirakından danışıb.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova çıxışında Azərbaycan qadınlarının cəmiyyətin dinamik inkişafında fəallığı ilə seçildiyini deyib. Bildirilib ki, müasir müstəqil Azərbaycan dövlətinin qurucusu ümummilli lider Heydər Əliyev ölkəyə rəhbərlik etdiyi dövrlərdə qadınlara yüksək dəyər verib. Bu gün həmin ənənə Prezident İlham Əliyev tərəfindən uğurla davam etdirilir. Ölkəmizdə elə bir sahə yoxdur ki, orada qadınlar çalışmasın. Bu gün qadınlar öz vətəndaş mövqeyi, qadın hünəri ilə kişilərlə çiyin-çiyinə əmək fəaliyyətlərinə davam edirlər. Azərbaycan qadınları tükənməz enerji və məhəbbətlə ömürlərinin şərəfli səhifələrini yaşamaqla bərabər, cəmiyyətdəki aktual problemlərin həllində də fəallıq göstərirlər. Hazırda Azərbaycanın Birinci vitse-prezidenti Mehriban xanım Əliyevanın təşəbbüsü ilə ailələrin rifahına yönəldilmiş neçə-neçə uğurlu layihə həyata keçirilməkdədir. Regionlara da sirayət edən bu reallıq fəal qadınların üzərinə düşən məsuliyyəti daha da artırır, onların qarşısında yeni vəzifələr qoyur.
Tədbir açıq dialoq formatında davam edib. Qadınları narahat edən bir sıra məsələlər, o cümlədən qadın və uşaq hüquqlarının müdafiəsi, qadın sahibkarlığının inkişafı və digər mövzular müzakirə olunub.