REGİONLAR


Azərbaycan qısa dönəmdə inklüziv və davamlı inkişaf siyasəti reallaşdırmağa müvəffəq olub

İsmayıllı, 15 may, AZƏRTAC 

İsmayıllıda Azərbaycan Respublikasının Prezidenti yanında Dövlət İdarəçilik Akademiyası və rayon icra hakimiyyətinin birgə təşkilatçılığı ilə dövlət qulluqçuları üçün “Müasir dövlət idarəçiliyinin təşkilati əsasları: 15 il innovativ inkişaf yollarında” mövzusunda səyyar seminar keçirilib.

AZƏRTAC-ın bölgə müxbiri xəbər verir ki, seminarda Azərbaycan Respublikasının Prezidenti yanında Dövlət İdarəçilik Akademiyasının rektoru, akademik Urxan Ələkbərov “Dövlət idarəçiliyində innovativ texnologiyalar: Azərbaycanın təcrübəsi” mövzusunda məruzəsi dinlənilib. Məruzədə bildirilib ki, Azərbaycan Respublikası dövlət müstəqilliyini yalnız 28 il öncə bərpa etməsinə baxmayaraq, qısa dönəmdə inklüziv və davamlı inkişaf siyasəti reallaşdırmağa müvəffəq olub. Beynəlxalq qurumlar və müstəqil ekspertlərin sənədləri bu faktın təsdiqidir.

Məruzədə beynəlxalq təşkilatlar tərəfindən 2017-2018-ci illərdə dərc edilən rəsmi statistik bilgilər təhlil olunub. Eyni zamanda, Davos İqtisadi Forumunun sədri Klaus Şvabın hazırladığı qlobal hesabat nəzərdən keçirilib. Bildirilib ki, həmin hesabatda Azərbaycan dünyanın ən səmərəli sosial siyasət həyata keçirən ölkəsi kimi xarakterizə olunub. Azərbaycan bu baxımdan iqtisadi göstəriciləri daha üstün olan ABŞ, Almaniya, Danimarka, Kanada, Fransa, Yaponiya kimi ölkələri geridə qoyub. Qeyd edilib ki, ümummilli lider Heydər Əliyev tərəfindən əsası qoyulan və Prezident İlham Əliyevin uğurla inkişaf etdirdiyi innovativ idarəetmə texnologiyalarının nəzəri əsaslarının işlənilməsi, onların təcrübədə tətbiqi nəticəsində bir sıra iqtisadi və sosial göstəricilərinə görə müasir Azərbaycan hazırda yüzillik tarixi olan və dünya liderləri sayılan ölkələrlə rəqabət aparmaq durumundadır.

Seminar iştirakçıları Azərbaycanda tətbiq edilən və dünya miqyasında ilk dəfə işlənilən sinergetik, komplimentar və kompensasiyalı texnologiyaların mahiyyəti barədə məlumatlandırılıb. Bildirilib ki, məhz dövlət başçısının tətbiq etdiyi idarəçilik texnologiyaları sayəsində 2018-ci ilin Davos İqtisadi Forumunun hesabatında inklüziv inkişaf indeksinə görə Azərbaycan dünyada üçüncü yerdə qərarlaşaraq iqtisadi imkanları daha yüksək olan ölkələrin çoxunu geridə qoyub. Bu və bənzər təqdirəlayiq nəticələr ölkənin səmərəli idarə olunması və iqtisadi imkanlardan maksimum istifadə edildiyini təsdiqləyir.

Milli Məclisin deputatı, Azərbaycan Respublikasının Prezidenti yanında Dövlət İdarəçilik Akademiyasının Siyasi Araşdırmalar İnstitutunun direktoru, professor Elman Nəsirov “Dünyada və bölgədə yeni təhlükəsizlik mühitinin formalaşmasına Azərbaycan Respublikasının töhfəsi” mövzusundakı məruzəsində müstəqil dövlət olaraq hər bir ölkənin dünya birliyində tutduğu mövqe və qazandığı nüfuzun onun beynəlxalq, regional və milli səviyyələrdə reallaşdırdığı təhlükəsizlik siyasətinin çevikliyindən və səmərəliliyindən asılı olduğuna diqqət çəkib. Vurğulayıb ki, hazırda müstəqil Azərbaycan sülhpərvər mövqeyi, qonşu, region və bütövlükdə əməkdaşlığa meyilli olan bütün dövlətlərlə etibarlı əlaqələrinin səviyyəsi, həmçinin yüksək siyasi, iqtisadi, inkişaf potensialı ilə dünya dövlətləri arasında rəğbət və dəstək qazanmaqda davam edir, regionun stabil inkişafı və təhlükəsizliyin təminatında üzərinə düşən vəzifələri uğurla yerinə yetirir. Ermənistanın işğalçı siyasətinə məruz qalmış Azərbaycanın həm region ölkələri, həm də dünya dövlətləri ilə praqmatik, ölçülüb-biçilən, düşünülən və balanslı siyasi strategiya əsasında münasibətlər qurması sayəsində güclü milli və regional aktora çevrilib, əksər geosiyasi aktorlarla qarşılıqlı faydalı əməkdaşlıq qurub.

“Dövlət qulluğunda innovasiyaların yeni mərhələsi” mövzusunda məruzə ilə çıxış edən Azərbaycan Respublikasının Prezidenti yanında Dövlət İdarəçilik Akademiyasının elmi təşkilat və beynəlxalq əlaqələr şöbəsinin müdiri, siyasi elmlər üzrə fəlsəfə doktoru, dosent Rəcəb Rəhimli innovasiyaların dövlət sektorunda tətbiq olunmasının əsas məqsədləri və dövlət qulluğunda innovasiyaların tətbiqinin dövlət qulluğunun inkişafı strategiyası ilə bağlılığı haqqında geniş məlumat verib. Qeyd edib ki, hazırda ölkəmizdə innovasiyaların tətbiqi gedişində səmərəli texnologiyaların, təşkilati formaların, potensial uğurlu layihələrin, innovativ idarəetmə alətlərinin seçiminə xüsusi diqqət yetirilir. Rəcəb Rəhimli Azərbaycanda bu istiqamətdə reallaşdırılan məqsədyönlü siyasətin ölkənin ictimai-siyasi, iqtisadi, mənəvi-ideoloji və sosial həyatını kökündən dəyişdiyinə, vətəndaş cəmiyyəti institutlarının inkişafına təkan verdiyinə diqqət çəkib. Eyni zamanda, dövlət qulluqçularının fəaliyyətinin ölkənin inkişafında, vətəndaşların rifahının yüksəlməsində təzahürünü tapdığı vurğulanıb. Bildirilib ki, dövlət qulluğunun təşkili çərçivəsində reallaşdırılan əsaslı dəyişikliklər, dövlət qulluqçularının xidməti fəaliyyətinin qiymətləndirilməsi və dövlət qulluğunda səriştə modelinin tətbiq edilməsi ilə əlaqədar nəzərdə tutulan yeni innovativ yanaşma və təşəbbüslər bu institutun nüfuzunun daha da artmasına imkan yaradacaq və Azərbaycanın yeni uğurlarına qapı açacaq.

Seminarın yekununda iştirakçıların sualları cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.