İQTİSADİYYAT


Azərbaycan şirkətləri ərəb ölkələrinə qazsız su və meyvə qurusu ixrac edəcək

Bakı, 21 fevral, AZƏRTAC

Azərbaycan məhsulların ixracına dair müzakirələr aparılıb.

İqtisadiyyat Nazirliyindən AZƏRTAC-a bildirilib ki, “Made in Azerbaijan” brendinin təşviqi, istehsalın və ixracın stimullaşdırılması məqsədilə Azərbaycan məhsulları Birləşmiş Ərəb Əmirliklərinin (BƏƏ) Dubay şəhərində keçirilən “Gulfood 2019” beynəlxalq qida sərgisində nümayiş olunur. İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə qida sənayesi sahəsində fəaliyyət göstərən 21 Azərbaycan şirkəti öz məhsullarını vahid ölkə stendində təqdim edir.

Artıq sərgi çərçivəsində Azərbaycanda istehsal olunan məhsulların ixracına dair razılıqlar əldə olunub. Belə ki, “Babək Sirab” şirkəti Səudiyyə Ərəbistanı, “Gədəbəy Mineral Suları” şirkəti isə Oman, BƏƏ və Hindistandan olan şirkətlərlə qazsız suların ixracına dair ilkin razılığa gəliblər. “Eco Dry” şirkətinin Oman və BƏƏ şirkətləri ilə meyvə qurularının ixracına dair apardığı danışıqlar da razılıqla nəticələnib.

“Delta” şirkəti bir sıra Afrika ölkələrinə məhsulların satışına dair distribüter şirkətlə razılıq əldə edib. Bundan başqa, “Crispa snacks” şirkəti Hindistan, İraq və BƏƏ şirkətləri, “Aznar” və “Azersun” şirkətləri isə BƏƏ və Hindistan şirkətləri ilə, “APIAZ” şirkəti BƏƏ və Küveytdən olan sahibkarlarla, “Balxurma” şirkəti isə Argentina, Səudiyyə Ərəbistanı, BƏƏ və Hindistandan olan şirkətlərlə ixraca dair müzakirələr aparıb.

Səudiyyə Ərəbistanı, BƏƏ, Bəhreyn və İraqdan olan şirkətlərin “Şirin” şirkətinin məhsullarına marağı böyük olub. “Atena” şirkəti məhsullarının Liviyaya, “Tac” və “Ayan” şirkətləri BƏƏ şirkəti ilə nar limonadının ixracına dair danışıqlar aparıb. “CanPa” şirkəti BƏƏ-dən olan şirkətlə məhsulların satışına dair razılıq əldə edib, yaxın günlərdə qənnadı məhsullarının ixracına başlanılacaq.

“Gulfood 2019” beynəlxalq qida sərgisi fevralın 21-də başa çatacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.