ELM VƏ TƏHSİL


“Azərbaycan üçün öyrət” təhsil proqramı çərçivəsində növbəti yay məktəbi başlayır

Bakı, 16 iyul, AZƏRTAC 

“Azərbaycan üçün öyrət” təhsil proqramı çərçivəsində iyulun 17-də “Təhsil avtobusu - 2018” yay məktəbinə başlanılacaq.

AZƏRTAC xəbər verir ki, bu barədə Bakıdakı 20 nömrəli məktəb-liseydə keçirilən mətbuat konfransında təhsil nazirinin müavini Firudin Qurbanov məlumat verib. Bildirilib ki, proqramın məqsədi təhsilin keyfiyyətinin yüksəldilməsində ictimaiyyətin iştirakına imkan yaradılması, əlavə təhsil imkanları ilə şagirdlərin bilik və dünyagörüşünün artırılmasıdır.

Nazir müavini layihənin ölkənin 5 bölgəsindəki həm orta məktəblərin, həm də modul məktəblərin akademik göstəriciləri zəif və orta olan 7-8-9-cu sinif şagirdlərinin inkişaflarına, dünyagörüşünün formalaşmasına geniş imkanlar yaradacağını diqqətə çatdırıb.

İyulun 23-dək davam edəcək yay məktəbi çərçivəsində ölkənin 5 bölgəsində yaşayan şagirdlər şəxsi inkişaf təlimlərində, intellektual yarışlarda iştirak edəcəklər.

“Təhsil avtobusu” Bakı şəhərindən yola düşərək Quba-Masallı-Şəmkir-Şəki-Qəbələ-Bakı marşrutu üzrə səyahət edəcək.

“Təhsil avtobusu” yay məktəbi “Azərbaycan üçün öyrət” proqramının ölkəmizin müxtəlif şəhər və rayonlarını əhatə edən təhsil marafonudur. Ümumilikdə “Təhsil avtobusu” yay məktəbi çərçivəsində 16 gün ərzində 4 min kilometr yol qət edilib. Yay məktəbinə Bakı, Lənkəran, Quba, Gəncə, Şəki, Masallı, Cəlilabad, Sabirabad, Mingəçevir, İsmayıllı və Zaqatalanın 12 şəhər və 13 kənd-qəsəbə məktəbinin, 22 ali və orta ixtisas təhsili müəssisəsinin 400-dən çox şagird və tələbəsi cəlb edilib.

Tədbirdə Milli Məclisin əmək və sosial siyasət komitəsinin sədri Hadi Rəcəbli müasir dünyada təhsilin mühüm rolundan, ölkəmizdə bu sahədə reallaşdırılan proqram və layihələrin əhəmiyyətindən danışıb.

H. Rəcəbli, eyni zamanda, “Təhsil avtobusu - 2018” yay məktəbinin təhsilə töhfə verəcəyinə əminliyini bildirib.

Digər müvafiq qurumların nümayəndələri də çıxış edərək layihə ilə bağlı fikirlərini bildirib, onun əhəmiyyətini vurğulayıblar.

Yay məktəbi Təhsil Nazirliyinin təşkilatçılığı, “Engin” LTD MMC, “Kapital Bank”, “Ekspo 2025 Bakı” layihəsinin əsas dəstəyi, “Bakcell”, “GoldenPay”, “Microsoft Azərbaycan” və “PAŞA Sığorta” şirkətlərinin dəstəyi, “1News.az”, “Azərbaycan İntellektual Klublar Assosiasiyası”, “ARB TV”, “ASAN xidmət”, “Bir” Tələbə-Könüllü proqramı, “Code Tusi”, “Edumap” Təhsil portal, “Edutainment.az”, “Engineering For Kids”, “SABAH” qrupları, “Şərq-Qərb” ASC, “Təhsil TV və “Youth Inc.” Sahibkarlıq Proqramının tərəfdaşlığı ilə reallaşdırılır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.