İQTİSADİYYAT
Azərbaycan və Kolumbiya arasında gömrük sahəsində əməkdaşlığa dair saziş hazırlanır
Bakı, 3 noyabr, AZƏRTAC
Azərbaycan və Kolumbiya arasında gömrük işi sahəsində əməkdaşlıq və qarşılıqlı yardım haqqında sazişin hazırlanması və imzalanmasına dair fikir mübadiləsi aparılıb.
Dövlət Gömrük Komitəsinin mətbuat xidmətindən AZƏRTAC-a bildirilib ki, Azərbaycan Respublikası Dövlət Gömrük Komitəsinin sədri, gömrük xidməti general-polkovniki Aydın Əliyev Kolumbiya Respublikasına səfəri çərçivəsində bu ölkənin Gömrük Xidmətinin direktoru Klaudiya Mariya Qaviriya ilə görüşüb.
Azərbaycanlı həmkarı ilə görüşdən məmnunluq duyduğunu bildirən Kolumbiya Gömrük Xidmətinin direktoru Klaudiya Mariya Qaviriya iki ölkə arasında dostluq əlaqələrindən bəhs edərək, əməkdaşlığın daha da inkişaf etdirilməsi üçün böyük potensialın olduğunu vurğulayıb. İkitərəfli münasibətlərin gömrük işinin təşkili sahəsində də inkişaf etdiyini söyləyən direktor əlaqələrin gələcəkdə daha da intensivləşəcəyinə ümidvar olduğunu bildirib, bunun üçün qarşılıqlı fəaliyyətin, təcrübə mübadiləsinin əhəmiyyətini qeyd edib.
Azərbaycan Respublikası Dövlət Gömrük Komitəsinin sədri Aydın Əliyev Kolumbiyanın paytaxtı Boqota şəhərinin hava limanına ziyarəti zamanı burada gömrük işinin təşkili sahəsində görülən işlərlə bağlı təəssüratlarını bölüşüb. Komitə sədri həmçinin, Azərbaycanda Prezident İlham Əliyevin rəhbərliyi ilə həyata keçirilən islahatlar nəticəsində ölkə iqtisadiyyatının bütün sahələrində, eləcə də gömrük işində əldə edilən nailiyyətlərdən bəhs edib. Aydın Əliyev Azərbaycan və Kolumbiya arasında iqtisadi-ticari əlaqələrdən, investisiya qoyuluşundan da söhbət açıb, bu münasibətlərin inkişaf etdirilməsində gömrük xidmətlərinin xüsusi yeri olduğunu vurğulayıb və qarşılıqlı əlaqələrin bundan sonra da davam etdiriləcəyinə əminliyini söyləyib.
Görüşdə qarşılıqlı maraq doğuran məsələlər, o cümlədən, qaçaqmalçılıq halları və narkotik vasitələrin qanunsuz dövriyyəsinə qarşı mübarizə, ticarətin asanlaşdırılması, iki ölkə arasında gömrük işi sahəsində əməkdaşlıq və qarşılıqlı yardım haqqında sazişin hazırlanması və imzalanmasına dair fikir mübadiləsi aparılıb.