İQTİSADİYYAT


Azərbaycan və Koreya hökumətləri arasında iqtisadi əməkdaşlıq üzrə Birgə Komissiyanın ikinci iclası keçirilib

Bakı, 6 fevral, AZƏRTAC

Bakıda Azərbaycan və Koreya Respublikası hökumətləri arasında iqtisadi əməkdaşlıq üzrə Birgə Komissiyanın ikinci iclası keçirilib.

Nəqliyyat, Rabitə və Yüksək Texnologiyalar Nazirliyindən AZƏRTAC-a bildirilib ki, Azərbaycan nümayəndə heyətinə komissiyanın həmsədri, Nəqliyyat, Rabitə və Yüksək Texnologiyalar nazirinin müavini Elmir Vəlizadə, Koreya nümayəndə heyətinə isə komissiyanın həmsədri, Koreya Respublikası Ticarət, Sənaye və Energetika nazirinin müavini Park Kiyounq rəhbərlik edib.

Tədbirdə ölkələrimiz arasında İKT, elektron hökumət, nəqliyyat, energetika, elm, mədəniyyət və digər sahələrdə geniş əməkdaşlıq perspektivləri müzakirə edilib. Hər iki ölkənin bir sıra beynəlxalq təşkilatlar, xüsusən BMT çərçivəsində də fəal əməkdaşlıq etdiyi bildirilib. Azərbaycan və Koreyanın makroiqtisadi göstəriciləri, həmçinin iki ölkə arasında ticarət həcmi barədə fikir mübadiləsi aparılıb və hazırkı iqtisadi əlaqələrin genişləndirilməsi üçün böyük potensialın olduğu vurğulanıb.

İclasda Azərbaycanın neft ixracından asılılığı azaltmaq üçün iqtisadiyyatın şaxələndirilməsi istiqamətində gördüyü işlər yüksək qiymətləndirilib. Azərbaycan tərəfi 1995–2019-cu illərdə Koreyadan cəlb olunmuş investisiyaların əksəriyyətinin qeyri-neft sektoruna yatırıldığını açıqlayıb. Qeyd olunub ki, Azərbaycanda sənaye, tikinti, ticarət, xidmət və nəqliyyat sahələrində 74 Koreya şirkəti qeydiyyatdan keçib və digər sahələrdə də investisiyaların cəlb olunması üçün böyük potensial mövcuddur.

Bildirilib ki, Koreya Respublikası iqtisadi əməkdaşlıq baxımından Azərbaycan üçün prioritet ölkədir. İki ölkə arasında əməkdaşlıq xüsusilə infrastruktur, energetika, inşaat, nəqliyyat, informasiya texnologiyaları, ətraf mühit, alternativ enerji kimi sahələrdə inkişaf edir. Azərbaycan tərəfi Koreyanın etibarlı tərəfdaş ölkə olduğunu və iqtisadi əlaqələrin genişləndirilməsinin hər iki ölkə üçün ümumi məqsəd olduğunu vurğulayıb. Həmçinin Azərbaycanda dövlət maliyyəsi hesabına həyata keçirilən irimiqyaslı layihələrdə Koreya şirkətlərinin iştirakı məmnunluqla qeyd olunub, qeyri-neft sektoru və sosial sahələr üzrə Koreya sərmayələrinin artırılmasının vacibliyi bildirilib.

Hər iki ölkədə keçirilən sərgilər, yarmarkalar, konfranslar, biznes-forumlar və digər tədbirlər barədə məlumat mübadiləsinin aparılması məqsədilə ölkələrin iş adamları üçün biznes-forumların təşkili, həmçinin biznes tərəfdaşlarının tapılmasında qarşılıqlı dəstəyin göstərilməsi təklif olunub.

Azərbaycan tərəfi Koreyanın texniki ali məktəbləri və texnologiyayönümlü şirkətlərini Nəqliyyat, Rabitə və Yüksək Texnologiyalar Nazirliyi tabeliyində İnnovasiyalar Agentliyi tərəfindən yaradılan Texnoloji Transfer Mərkəzinin fəaliyyətində iştirak etməyə dəvət edib.

Komissiyanın iclasında o da vurğulanıb ki, ticari-iqtisadi əməkdaşlığın daha da inkişaf etdirilməsi və hər iki ölkənin ixracyönümlü məhsullarının qarşılıqlı olaraq digər ölkə bazarında satışı üçün səylərin artırılması vacibdir.

Bildirilib ki, Azərbaycan Cənubi Qafqaz regionunda Koreyanın əsas ticarət tərəfdaşıdır.

Müzakirələrdən sonra Azərbaycan Respublikası Hökuməti və Koreya Respublikası Hökuməti arasında iqtisadi əməkdaşlıq üzrə Birgə Komissiyanın ikinci görüşünün sənədi imzalanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.