ELM VƏ TƏHSİL


Azərbaycan və Qazaxıstanın universitetləri ikili diplom proqramı üzrə müqavilə imzalayıb

Bakı, 21 sentyabr, AZƏRTAC

Bakı Dövlət Universitetinin (BDU) rektoru Elçin Babayev, Hüquq fakültəsinin dekanı Əmir Əliyev Qazaxıstanın Əl-Fərabi adına Qazax Milli Universitetinin rektorluğunun genişləndirilmiş onlayn iclasında iştirak ediblər.

BDU-dan AZƏRTAC-a bildiriblər ki, Qazax Milli Universitetinin rektoru Qalimkair Mutanov tədbiri giriş sözü ilə açaraq Bakı Dövlət Universiteti ilə birgə kadr hazırlığının, universitetlərarası ikili diplom proqramının əhəmiyyətindən bəhs edib. Bildirilib ki, Azərbaycan və Qazaxıstan dəniz və enerji ölkələri olaraq istər Xəzəryanı, istərsə də beynəlxalq müstəvidə inkişaf etmiş ölkələr sırasındadır. Bu səbəbdən hüquqi sferada birgə kadr hazırlığı və əməkdaşlıq çox müsbət nəticələr verəcək. O, hər iki ölkənin bu istiqamətdə böyük elmi bazasının olduğunu vurğulayıb.

BDU-nun rektoru Elçin Babayev ikili diplom proqramının dost və qardaş ölkələr olan Azərbaycan və Qazaxıstan arasında ilk ikili diplom proqramı olduğuna diqqət çəkib. Müqavilənin hər iki ölkənin ilk və aparıcı təhsil müəssisələri olan Bakı Dövlət Universiteti və Qazax Milli Universiteti tərəfindən imzalanmasını yüksək qiymətləndirib. E.Babayev BDU-nun Hüquq fakültəsində “Dəniz və enerji hüququ” sahəsində elmi məktəbin formalaşdığını, altı ildir ki, bu sahədə ingilis dilində uğurla kadr hazırlığının həyata keçirildiyini bildirib. “Dəniz və enerji hüququ” üzrə tədris və elmi bazanın qurulmasında, o cümlədən müəllim heyətinin formalaşmasında ABŞ-ın Tüleyn Universiteti ilə əməkdaşlığı xüsusi vurğulayan rektor həmin universitetlə birgə beynəlxalq konfranslar təşkil edildiyini deyib. Tüleyn Universitetinin dəstəyi ilə Hüquq fakültəsində “Dəniz və enerji hüququ” Mərkəzi yaradıldığını qeyd edən E.Babayev bu gün də əməkdaşlığın davam etdiyini, yeni layihə və proqramlar haqqında danışıqların aparıldığını bildirib.

İclasın sonunda BDU ilə Qazax Milli Universiteti arasında Hüquqşünaslıq fakültəsində “Dəniz və enerji hüququ” magistratura ixtisaslaşması üzrə ikili diplom proqramı üzrə kadr hazırlığı sahəsində müqavilə imzalanıb.

İclasda, həmçinin Qazax Milli Universitetinin Hüquq fakültəsinin dekanı Daulet Baydeldinov və hər iki ölkənin akkreditə olunmuş səfirləri iştirak ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.