ELM VƏ TƏHSİL


Azərbaycan və Vyetnam ali təhsil müəssisələrinin birgə forumunun keçirilməsi planlaşdırılır

Bakı, 26 sentyabr, Maqsud Dadaşov, AZƏRTAC

Təhsil nazirinin müavini Firudin Qurbanovun rəhbərlik etdiyi nümayəndə heyəti Vyetnam Sosialist Respublikasında səfərdə olub. Nazir müavini AZƏRTAC-a müsahibəsində səfərlə bağlı təəssüratlarını bölüşüb.

F.Qurbanovun sözlərinə görə, Bakı Dövlət Universitetinin rektoru, akademik Abel Məhərrəmov, Azərbaycan Dövlət Neft və Sənaye Universitetinin rektoru, professor Mustafa Babanlı və başqalarından ibarət nümayəndə heyətinin Vyetnama səfərinin məqsədi ikinci Azərbaycan-Vyetnam Dostluq Forumunda iştirak etmək olub. Sentyabrın 21-dən 23-dək davam edən səfərin ilk günü Azərbaycan nümayəndə heyəti Vyetnamın təhsil və təlim nazirinin müavini Pham Man Hung ilə görüşüb.

Söhbət zamanı müzakirə olunan məsələlərlə bağlı məlumat verən F.Qurbanov görüşdə ölkələrimiz arasında yüksək səviyyəli və tarixi əlaqələrə toxunduğunu deyib. Həmçinin o, 2014-cü ilin mayında Prezident İlham Əliyevin Vyetnama, 2015-ci ilin mayında isə Vyetnamın Prezidenti Çionq Tan Şanqın Azərbaycana rəsmi səfərlərinin digər istiqamətlərlə yanaşı, təhsil sahəsində də əməkdaşlıq imkanları üçün əlverişli zəmin yaratdığını diqqətə çatdırıb. Nazir müavini deyib: “Söhbət zamanı ölkələrimizin universitetləri arasında əlaqələrin gücləndirilməsi məqsədilə ali məktəblərin forumunun keçirilməsini də təklif etdim”.

Bildirilib ki, görüşdə P.Hung vyetnamlı mütəxəssislərin hazırlanmasında Azərbaycan ali təhsil müəssisələrinin müstəsna rol oynadığını, keçən əsrin 60-cı illərindən bu günədək dörd mindən çox vyetnamlının ölkəmizdə təhsil aldığını, həmin məzunların hazırda Vyetnamın müxtəlif dövlət və özəl qurumlarının fəaliyyətində iştirak etdiklərini vurğulayıb. Bu dəstəyə görə Azərbaycana minnətdarlığını bildirən Vyetnam tərəfi ölkəmizin təhsil sahəsindəki təcrübəsini öyrənməkdə maraqlı olduqlarını qeyd edib. F.Qurbanov deyib: “P.Hung ali təhsil müəssisələri arasında əlaqələrin inkişaf etdirilməsinin vacibliyini vurğulayaraq forumun keçirilməsi ilə bağlı səsləndirdiyim təklifi dəstəklədi. Həmçinin hər iki ölkəyə təhsil almağa gələn tələbələrə xüsusi təqaüdlərin verilməsini təklif etdi”.

Səfər çərçivəsində Azərbaycan nümayəndə heyətinin Vunq Tau şəhərində keçirilən ikinci Azərbaycan-Vyetnam Dostluq Forumunda iştirakından danışan nazir müavini vurğulayıb ki, tədbir ölkələrimiz arasında diplomatik əlaqələrin qurulmasının 25 illiyinə həsr olunmuşdu. “Azərbaycanda təhsil almış 200-dək məzun forumda iştirak edib. Onların arasında parlamentin nümayəndələri, Vyetnam Kommunist Partiyasının Mərkəzi Komitəsinin üzvləri, dörd general, admiral, dövlət orqanlarının məsul işçiləri vardı. Tədbirdə çıxışım zamanı 2014-cü il mayın 19-da Prezident İlham Əliyevin Vyetnama rəsmi səfəri çərçivəsində Azərbaycanda təhsil almış vyetnamlı məzunlarla görüşünü xatırlatdım. Bildirdim ki, həmin görüş zamanı dövlətimizin başçısı tərəfindən irəli sürülən təşəbbüsə və müvafiq tapşırığa uyğun olaraq, 2015-ci il mayın 7-də birinci Azərbaycan-Vyetnam Dostluq Forumu vyetnamlı məzunların iştirakı ilə Bakıda yüksək səviyyədə təşkil olunub. Tədbirdə, həmçinin Prezident İlham Əliyevin 2017-ci il 11 sentyabr tarixli sərəncamları ilə iki ölkə arasında dostluq və əməkdaşlıq əlaqələrinin inkişafında xidmətlərinə görə Vyetnam-Azərbaycan Dostluq Təşkilatının prezidenti, Vyetnam Sosialist Respublikası Parlamentinin üzvü Nghiem Vu Khai və Vyetnam Sosialist Respublikası Prezident Administrasiyasının beynəlxalq əməkdaşlıq şöbəsinin müdiri Nguyen Vu Ha Lenin “Tərəqqi” medalı ilə təltif olunduqlarını bildirdim və ali mükafatı sahiblərinə təqdim etdim”, - deyə F.Qurbanov diqqətə çatdırıb.

Nazir müavini bildirib ki, forumda Vyetnam Hökuməti adından çıxış edən Vyetnam Kommunist Partiyası Mərkəzi Komitəsinin üzvü, sabiq Hərbi Dəniz Qüvvələrinin komandanı, müdafiə nazirinin müavini, admiral Fam Hoai Nam özünün də vaxtilə Azərbaycanda ali hərbi məktəbdə təhsil aldığını deyib. O, Azərbaycan hökumətinin vyetnamlı tələbələrə yaratdığı bu imkanı və dəstəyi yüksək dəyərləndirərək dərin təşəkkürünü ifadə edib. Fam Hoai Nam vyetnamlı mütəxəssislərin hazırlanmasında fəal rol oynamış Bakı Dövlət Universiteti, Azərbaycan Neft və Sənaye Universiteti və Heydər Əliyev adına Azərbaycan Ali Hərbi Məktəbinə Vyetnam Sosialist Respublikasının Prezidenti tərəfindən təltif edilən Vyetnamın “Dostluq” ordenini təqdim etdi. Tədbirdə, həmçinin Nghiem Vu Khai və “Vietsovpetro” şirkətinin direktoru Do Man Hung, sabiq vitse-prezident Nguyen Ti Doan çıxış edərək ölkələrimiz arasında tarixi bağların, xüsusən təhsil sahəsində əməkdaşlığın əhəmiyyətini, bu əlaqələrin inkişaf etdirilməsinin vacibliyini vurğuladılar.

Səfər çərçivəsində nümayəndə heyətinin Vyetnam Sosialist Respublikasının sabiq Prezidenti Çıonq Tan Şanq ilə görüşünü də xatırladan F.Qurbanov bildirib ki, söhbət zamanı ölkə rəsmilərinin qarşılıqlı səfərlərinin tarixi əlaqələrinmizin möhkəmlənməsinə və inkişafına xidmət etdiyi vurğulanıb.

F.Qurbanov nümayəndə heyətinin Xo Şi Min Vyetnam Milli Universitetində olmasından, universitetin maddi texniki bazası, tədris şəraiti ilə tanışlığından danışıb. Diqqətə çatdırılıb ki, universitetdə akademik A.Məhərrəmovun və professor M.Babanlının da iştirak etdikləri görüşdə Azərbaycanın və Vyetnamın ali təhsil müəssisələri arasında əməkdaşlığın perspektivləri müzakirə olunub. Bildirilib ki, Azərbaycan ali təhsil müəssisələri Vyetnam üçün yüksəkixtisaslı kadrların yetişdirilməsində dəstək verməyə daim hazırdır. Vyetnam Milli Universitetinin prezidenti Huyn Tan Dat və Texnologiya Universitetinin rektoru Vu Din Tan rəhbərlik etdikləri ali təhsil müəssisələri haqqında məlumat veriblər. Görüşdə universitetlərimiz arasında birbaşa əlaqələrin yaradılmasının vacibliyi vurğulanıb. Həmçinin Bakı Dövlət Universiteti ilə Vyetnam Milli Universiteti arasında Anlaşma Memorandumu imzalanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.