Bakı, 20 oktyabr, AZƏRTAC

Dövlət Miqrasiya Xidmətinin (DMX) rəisi Vüsal Hüseynov Yaponiyanın Azərbaycana yeni təyin olunmuş səfiri Vada Cüniçi ilə görüşüb.

DMX-dən AZƏRTAC-a bildiriblər ki, əvvəlcə Xidmət rəisi səfiri ölkəmizdə diplomatik fəaliyyətə başlaması münasibətilə təbrik edib.

Vüsal Hüseynov dünya dövlətlərinin pandemiya ilə mübarizə apardığı vaxtda Azərbaycan Ermənistanın işğalçılıq və təhrik siyasəti nəticəsində tarixinin mürəkkəb və həlledici dövrünə qədəm qoyduğunu səfirin diqqətinə çatdırıb. Ermənistanın 30 ilə yaxın davam edən işğalçılıq siyasəti, Dağlıq Qarabağ münaqişəsinin həlli ilə bağlı aparılan danışıqlarda sərgilədiyi qeyri-konstruktiv mövqe, eləcə də qarşı tərəfin regionda humanitar vəziyyətin gərginləşməsinə yönəlmiş təxribat xarakterli hücumları sülhün və ədalətin bərpası üçün Azərbaycanı adekvat cavab tədbirləri görməyə vadar edib. Bu tədbirlərin həyata keçirilməsində əsas məqsəd torpaqlarımızın erməni işğalından azad edilməsi, beynəlxalq səviyyədə tanınmış sərhədlərimizin bərpası, mülki şəxslərin təhlükəsizliyinin, eləcə də məcburi köçkünlərimizin yurdlarına geri qayıtmaq hüquqlarının təmin olunmasıdır.

Xidmət rəisi bildirib ki, humanitar atəşkəsin elan olunmasına baxmayaraq, Ermənistan götürdüyü öhdəlikləri pozaraq atəşkəs dövründə Azərbaycanın ikinci ən böyük şəhəri olan Gəncə də daxil olmaqla, bir çox yaşayış məntəqələrində mülki əhaliyə yönəlmiş ağır artilleriya hücumlarını davam etdirib. Nəticədə, ümumilikdə 61 dinc sakin həlak olub, 300-ə yaxın şəxs yaralanıb. Bu fakt sübut edir ki, döyüş meydanında mövqelərini itirən Ermənistan ordusu çıxış yolunu yalnız münaqişə zonasından kənarda yaşayan mülki əhaliyə qarşı yönəlmiş cinayət törətməkdə görür.

Prezident, Silahlı Qüvvələrin Ali Baş Komandanı İlham Əliyevin rəhbərliyi ilə Azərbaycanın tezliklə ərazi bütövlüyünü bərpa edəcəyini və torpaqlarımızın düşmən işğalından azad olunacağını xüsusi vurğulayan Vüsal Hüseynov DMX-nin fəaliyyət istiqamətləri barədə məlumat verərək, koronavirus pandemiyasının ilk günlərindən miqrasiya siyasətinin əcnəbilərin maksimum rahatlığı və elektronlaşmanın geniş təşviqi üzərində qurulduğunu diqqətə çatdırıb. Bildirib ki, qanuni miqrasiyanın təşviqi Xidmətin prioritet məsələlərindən biridir və bu istiqamətdə iki ölkə arasında əməkdaşlığın gücləndirilməsi imkanları nəzərdən keçirilə bilər.

Azərbaycanla hər zaman yüksək səviyyəli diplomatik əlaqələrin mövcudluğunu bildirən səfir hazırda baş verən hadisələri narahatlıqla izlədiklərini deyib, münaqişə nəticəsində dinc sakinlərin həlak olması hallarının onları sarsıtdığını vurğulayıb, münaqişənin tezliklə beynəlxalq hüququn prinsipləri çərçivəsində həllinə ümidvar olduqlarını qeyd edib.

Sonra Azərbaycan və Yaponiya arasında miqrasiya sahəsində gələcək əməkdaşlığın perspektivləri, həmçinin qarşılıqlı maraq doğuran digər məsələlər müzakirə edilib.