Şamaxı, 26 fevral, AZƏRTAC 

Şamaxıda Xocalı soyqırımının 28-ci ildönümü ilə əlaqədar faciə qurbanlarının xatirəsi anılıb.

AZƏRTAC-ın bölgə müxbiri xəbər verir ki, rayon rəhbərləri, hüquq-mühafizə orqanlarının, idarə, müəssisə və təşkilatların kollektivləri, ərazi icra nümayəndələri və ictimaiyyət nümayəndələri fevralın 26-da soyqırımı abidəsini ziyarət edib, önünə tər qərənfillər düzüblər.

Rayon icra hakimiyyətinin başçısı Tahir Məmmədov ermənilərin xalqımıza qarşı törətdikləri qətliam və faciələr barədə məlumat verib. Qeyd edib ki, bəşər tarixinə Xocalı soyqırımı kimi daxil olan bu qanlı faciədən 28 il ötür. 1992-ci il fevralın 25-dən 26-na keçən gecə Ermənistan silahlı qüvvələri bütün beynəlxalq hüquq normalarını pozaraq Xocalıya ağır hərbi texnika yeridib, yerlə-yeksan etdikləri şəhərin dinc əhalisinə misli görünməmiş qəddarlıqla divan tutublar. Həmin hərbi-siyasi təcavüz zamanı 613 həmvətənimiz, o cümlədən 106 qadın, 63 uşaq və 70 qoca həlak olub, 487 dinc sakin ağır yaralanıb, 1275 nəfər isə girov götürülüb.

Bildirilib ki, ümummilli lider Heydər Əliyevin təşəbbüsü ilə Azərbaycan Respublikasının Milli Məclisi 1994-cü il fevralın 24-də Xocalı soyqırımı haqqında qərar qəbul edib. Həmin qərarla hər il fevralın 26-sı “Xocalı soyqırımı günü” kimi qeyd olunur.

X X X

Qobustanda Xocalı soyqırımının 28-ci ildönümü rayon ictimaiyyətinin çoxsaylı nümayəndələrinin iştirakı ilə anılıb.

Mərasim iştirakçıları öncə Şəhidlər xiyabanına gələrək, Vətən yolunda canlarını qurban verən şəhidlərimizin xatirəsini ehtiramla yad edib, abidənin önünə çiçəklər düzüblər.

Sonra tədbir rayon icra hakimiyyətinin akt zalında davam etdirilib. İştirakçılar ümumtəhsil məktəbləri şagirdlərinin ifasında “Xocalı soyqırımı – qan yaddaşımızın fəryadı” adlı ədəbi-bədii kompozisiyaya baxıblar.

İcra hakimiyyətinin başçısı Adil Məmmədov, eləcə də digər çıxış edənlər tarixən Azərbaycan xalqına qarşı törədilən qanlı faciələrdən biri olan Xocalı soyqırımının dəhşətlərini bir daha diqqətə çatdırıb, qətliamın acı nəticələrindən danışıblar. Bildirilib ki, 28 il əvvəl 1992-ci il fevralın 25-dən 26-na keçən gecə Xocalı şəhərinin 5379 nəfər əhalisi deportasiyaya məruz qalıb, 613 nəfər qətlə yetirilib, 8 ailə məhv edilib. Vurğulanıb ki, Xocalı soyqırımı öz qəddarlığı, qeyri-insani cəza üsulları ilə bəşər tarixində görünməmiş bir vəhşilikdir.

X X X

İsmayıllı rayonunda Xocalı faciəsinin 28-ci ildönümü ictimaiyyətin çoxsaylı nümayəndələri tərəfindən anılıb. İldönümünə həsr olunan yürüş keçirilib.

Rayon icra hakimiyyətinin başçısı Mirdaməd Sadıqov erməni faşizmi qurbanlarının xatirəsinə ucaldılan “Ana harayı” abidəsinin önünə əklil qoyub. Yürüşə qatılanlar erməni qəsbkarları tərəfindən müxtəlif vaxtlarda qətlə yetirilən soydaşlarımızın xatirə memorialı önünə qərənfillər düzüblər. Məktəblilərin iştirakı ilə fləşmob keçirilib.

Tədbirdə çıxış edənlər erməni cəlladlarının xalqımızın başına gətirdiyi müsibətlərdən söz açıblar. Qeyd olunub ki, erməni cəlladları tərəfindən həyata keçirilən bu qanlı hadisə təkcə azərbaycanlılara qarşı deyil, bütün türk dünyasına qarşı törədilən soyqırımıdır. Çıxışlarda Xocalı soyqırımı haqqında həqiqətlərin dünya ictimaiyyətinə çatdırılması istiqamətində “Xocalıya ədalət!” kampaniyası çərçivəsində görülən işlər və əldə edilən nailiyyətlər xüsusi vurğulanıb.

X X X

Kürdəmirdəki Heydər Əliyev Mərkəzində 1992-ci il fevralın 25-dən 26-na keçən gecə erməni faşistləri tərəfindən törədilmiş Xocalı soyqırımının 28-ci ildönümünə həsr edilən ümumrayon tədbiri keçirilib.

Tədbirdən əvvəl iştirakçılar Mərkəzdə təşkil edilən “Xocalı soyqırımı uşaqların gözü ilə” adlı sərgi ilə tanış olublar.

Rayon icra hakimiyyətinin başçısı Ceyhun Cəfərov xalqımızın son iki əsrdə bir neçə dəfə soyqırımına məruz qaldığını, azərbaycanlıların növbəti belə faciə ilə 28 il əvvəl Xocalıda üzləşdiyini bildirib. Qeyd edib ki, ulu öndər Heydər Əliyevin xalqın tələbi ilə ali hakimiyyətə qayıdışından sonra bu məsələyə prinsipial şəkildə yanaşılıb, soydaşlarımıza qarşı qəddarcasına törədilən dəhşətli qətliama hüquqi-siyasi qiymət verilib. Hazırda dünyanın hər yerində Xocalı soyqırımının tanınması Azərbaycanın xarici siyasətinin əsas istiqamətlərindən birinə çevrilib. Prezident İlham Əliyevin uğurlu xarici siyasəti nəticəsində artıq bir sıra beynəlxalq təşkilatların qəbul etdikləri sənədlərdə Ermənistan işğalçı dövlət kimi göstərilib, Xocalı soyqırımı kimi tanınıb.

İştirakçılar şəhər 1 saylı tam orta məktəbin şagirdlərinin hazırladığı “Xocalı harayı” ədəbi-bədii kompozisiyasına tamaşa ediblər.

X X X

Xocalı soyqırımının 28-ci ildönümü Zərdab rayonunda kütləvi tədbirlərlə qeyd olunub.

Fevralın 26-da keçirilən anım mərasimində rayon icra hakimiyyətinin başçısı Mərdan Camalzadə qanlı faciənin səbəbləri və nəticələri barədə danışaraq, 28 il əvvəl fevralın 25-dən 26-na keçən gecə törədilən qətliamın təkcə azərbaycanlılara yox, həm də bəşəriyyətə qarşı ağır cinayət olduğunu vurğulayıb.

Tədbirlərdə Prezident İlham Əliyevin rəhbərliyi ilə Azərbaycanın sürətli inkişafından, qazandığı uğurlardan danışılıb, tökülən qanın yerdə qalmayacağına, erməni qəsbkarlarının torpaqlarımızdan qovulacağına əminlik ifadə olunub.