SİYASƏT


Azərbaycan xalqı İlham Əliyevi ölkədəki sürətli inkişafın, siyasi sabitliyin qarantı hesab edir və onu dəstəkləyir

Əbu-Dabi, 11 aprel, AZƏRTAC

Bu gün hər bir azərbaycanlı hansı ölkədə yaşamasından asılı olmayaraq, Azərbaycan dövlətinin, xüsusilə Prezidentin dəstəyini hiss edir və bundan qürur hissi duyur.

Bu fikri AZƏRTAC-a müsahibəsində Əbu-Dabidə yaşayan soydaşımız, Əbu-Dabi Universitetinin müəllimi, şərqşünas və tədqiqatçı alim Şəhrizad Süleyman söyləyib.

Şəhrizad Süleyman qeyd edib ki, bir il bundan əvvəl Azərbaycan xalqının böyük əksəriyyəti Ulu Öndərimizin layiqli varisinə - İlham Əliyevə səs verdi. Hər bir addımında ümummilli lider Heydər Əliyevin yüksək ideyalarına sadiqlik nümayiş etdirən dövlət başçısının həyata keçirdiyi çoxşaxəli siyasətin məqsədi Azərbaycan vətəndaşı üçün firavan həyat tərzinin təmin olunması, ölkədə azad və demokratik cəmiyyətin qurulmasıdır. Bütün bu proseslərdə Azərbaycan Prezidentinə ən böyük dəstək xalqdan, ölkənin tale yükünü İlham Əliyevə etibar edən vətəndaşlardan gəlir. Bu gün Azərbaycan xalqı İlham Əliyevi ölkədəki intibahın, siyasi sabitliyin, əmin-amanlığın və sülhün qarantı hesab edir, ona tam güvənir. Çünki xalq öz həyatında baş verən böyük dəyişikliklərin, Azərbaycanı parlaq sabaha doğru aparan siyasi kursun əhəmiyyətini dərindən dərk edərək qiymətləndirir və bu siyasəti birmənalı şəkildə dəstəkləyir. Prezident İlham Əliyevin qətiyyətlə davam etdirdiyi sosial-iqtisadi inkişaf strategiyası, böyük şövqlə həyata keçirdiyi islahatlar həm də onun yüksək idarəçilik qabiliyyətinə və mükəmməl iş təcrübəsinə dəlalət edir. Heydər Əliyev siyasi kursunun layiqli davamçısı, onun müəyyənləşdirdiyi ümummilli inkişaf strategiyasını müvəffəqiyyətlə həyata keçirən Prezident İlham Əliyevin ölkəyə rəhbərlik fəaliyyətini diqqətlə nəzərdən keçirdikdə, onun fövqəl intellekt, yüksək idarəetmə bacarığına malik, xalqına, dövlətinə qəlbən bağlı lider olması bir daha təsdiqini tapır. Onu xalqa sevdirən ən mühüm xüsusiyyətləri əsl dövlət başçısına xas qətiyyəti, liderlik xarizması, uğurlu islahatlara imza atması, ölkədə baş verən hətta adi hadisələrə belə dərhal reaksiya verməsi, daim sıravi vətəndaşın yanında olması, Vətənimizin qüdrəti və parlaq gələcəyi naminə atdığı hər bir addımda milli maraqları öndə tutmasıdır. Dövlətimizin başçısı Azərbaycan bayrağının ali tribunalarda qürurla dalğalanması üçün zəruri addımlar atır, ölkəmizin iqtisadi və hərbi qüdrətini gücləndirmək, mədəniyyətlərarası dialoq mərkəzi kimi beynəlxalq nüfuzunu artırmaq yolunda şövqlə, qətiyyətlə çalışır. O, Ali Baş Komandan olaraq, müzəffər ordusu ilə bərabər torpaqlarımızın düşmən tapdağından azad edilməsi üçün böyük əzm və cəsarət göstərir. Görülən bütün işlər, qazanılan uğurlar Azərbaycan xalqının, sıravi vətəndaşın daha xoş güzəranını təmin etmək məqsədi daşıyır. Bir sözlə, xalq öz Prezidentinə, Prezident isə öz xalqına arxalanır. Bu gün nəinki Azərbaycanda, eləcə də ölkə hüdudlarından kənarda məskunlaşan hər bir azərbaycanlı harada yaşamasından asılı olmayaraq, Azərbaycan dövlətinin, Azərbaycan Prezidentinin dəstəyini, gücünü hiss edir və bundan iftixar hissi duyur. Prezidentimiz xarici ölkələrə səfərləri zamanı gərgin iş qrafikinin olmasına baxmayaraq, Vətəndən kənarda yaşayan soydaşlarımızla görüşlərə məxsusi diqqət ayırır, onların qayğı və problemləri ilə yaxından maraqlanır, mövcud çətinliklərin aradan qaldırılması istiqamətində lazımi tədbirlər görür.

Prezident İlham Əliyevin apardığı uğurlu siyasətin nəticələrindən danışan Ş.Süleyman ölkə başçısının rəhbərliyi ilə doğma Vətənimizin, sözün həqiqi mənasında, gündən-günə gözəlləşdiyini və sürətlə inkişaf etdiyini bildirib. O, çalışdığı ali təhsil ocağının tələbələri ilə hər dəfə Azərbaycana gələndə böyük dəyişikliklərin, sürətli inkişafın, qayda-qanunun, səliqə-sahmanın, bir sözlə, ecazkar gözəlliyin şahidi olduğunu vurğulayıb. Sevimli paytaxtımızın bir-birindən yaraşıqlı küçələri, müasir üslubda möhtəşəm quruculuq işləri, yeni inşa edilən göydələnləri Bakını dünyanın ən modern şəhərlərindən birinə çevirib. Ölkəmizə təşrif buyuran əcnəbi qonaqlar, saysız-hesabsız turistlər nəinki paytaxt Bakının, eləcə də əsrarəngiz təbiəti, qeyri-adi möcüzəvi məkanları ilə göz oxşayan regionlarımızın gözəlliklərə valeh olurlar. Ölkədə vüsət alan abadlıq, quruculuq işlərinin, bütün bu gözəlliklərin memarı məhz Azərbaycan Respublikasının Prezidenti İlham Əliyevdir.

Müsahibimiz vurğulayıb ki, 11 aprel 2018-ci il ölkəmizin ictimai-siyasi həyatında əlamətdar bir gündür. Ötən ilin bu günündə Birləşmiş Ərəb Əmirliklərində yaşayan azərbaycanlılar da Azərbaycanın sabit, təhlükəsiz və çiçəklənən uğurlu gələcəyi naminə yekdilliklə İlham Əliyevə səs verdilər. Ölkəmizin daxili və xarici siyasətində ötən bir il ərzində əldə edilən möhtəşəm nailiyyətlər öz seçimimizdə yanılmadığımızı sübut etdi. Birləşmiş Ərəb Əmirliklərində və digər xarici ölkələrdə yaşayan və çalışan azərbaycanlılar doğma Vətənimizdə həyata keçirilən siyasi-iqtisadi siyasətin, sabitliyin davamlı olmasını arzulayırlar. Biz hər bir sahədə Azərbaycana xidmət etməyə hazır olduğumuzu bəyan edir və dövlətimizin başçısı, qayğıkeş liderimiz, hər bir azərbaycanlının Prezidenti olmağı bacaran İlham Əliyevin çoxşaxəli fəaliyyətini, daxili və xarici siyasətini daim dəstəkləyirik.

Asya Hacızadə

AZƏRTAC-ın xüsusi müxbiri

Əbu-Dabi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.