Ağdam, 9 may, Tahir Ağaməmmədov, AZƏRTAC

Faşizm üzərində Qələbənin 72-ci ildönümü respublikamızın hər yerində olduğu kimi, Qarabağ bölgəsində də təntənəli şəkildə qeyd edilib.

AZƏRTAC xəbər verir ki, Qələbə Günü münasibətilə müxtəlif tədbirlər, görüşlər keçirilib, müharibədə həlak olanların xatirəsi ehtiramla anılıb.

Ağdam rayon ictimaiyyətinin nümayəndələri, veteranlar, məktəblilər Əhmədağalı kəndində Böyük Vətən müharibəsində həlak olanların xatirəsinə ucaldılmış abidə kompleksinin önünə gül dəstələri düzüblər. Müharibədə həlak olan həmvətənlərimizin xatirəsi ehtiramla yad edilib.

Ağdam Rayon İcra Hakimiyyətinin başçısı Raqub Məmmədov, Qarabağ Müharibəsi Əlilləri, Veteranları və Şəhid Ailələri İctimai Birliyi Ağdam rayon şöbəsinin sədri Baxşeyiş Hətəmli, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Elxan Feyziyev mərasimdə çıxış edərək İkinci Dünya müharibəsindən, azərbaycanlıların müharibədə iştirakından, ön və arxa cəbhələrdə göstərdikləri misilsiz rəşadətdən, faşizm üzərində qələbənin qazanılmasında rolundan danışıblar. Bildirilib ki, Böyük Vətən müharibəsində 7368 nəfər ağdamlı alman faşizminə qarşı igidliklə döyüşüb, onlardan 3600 nəfərdən çoxu həlak olub.

Çıxışlarda əminliklə bildirilib ki, 1945-ci ildə alman faşizmi üzərində qələbənin qazanılmasında böyük rolu olmuş Azərbaycan xalqı tezliklə erməni faşizmi üzərində də qələbə çalacaqdır.

Tədbir məktəblilərin ifasında kompozisiya ilə başa çatıb.

X X X

Tərtər rayon rəhbərliyi, ziyalılar, ictimaiyyət nümayəndələri, müharibə veteranları, gənclər Böyük Vətən müharibəsində həlak olmuş tərtərlilərin xatirəsinə ucaldılan abidə kompleksi önündə çiçək dəstələri düzüb, şəhidlərin ruhuna dualar oxuyublar. 

Daha sonra keçirilən tədbirdə çıxış edən Tərtər Rayon İcra Hakimiyyətinin başçısı Müstəqim Məmmədov müharibə veteranlarını Qələbə bayramı münasibətilə təbrik edib, onlara xoş arzularını çatdırıb. Bildirib ki, müharibədə 2417 nəfər tərtərli alman faşizminə qarşı igidliklə döyüşüb, onlardan 1079 nəfəri həlak olub.

Qeyd olunub ki, Prezident İlham Əliyevin həyata keçirdiyi tədbirlər sayəsində müharibə veteranlarının sosial müdafiəsi yaxşılaşır. Qələbənin 72 illiyi ərəfəsində dövlətimizin başçısının Sərəncamı ilə 1941-1945-ci illər İkinci Dünya müharibəsi iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım verilməsi veteranlara olan qayğının bariz nümunəsidir.

Çıxış edən müharibə veteranları onlara göstərilən yüksək dövlət qayğısına görə Prezident İlham Əliyevə minnətdarlığını bildiriblər.

Sonda Böyük Vətən müharibəsi veteranlarına hədiyyələr verilib.