ORDU
Azərbaycan xalqının bəşəriyyətə bəxş etdiyi qüdrətli söz ustası
Bakı, 7 oktyabr, AZƏRTAC
Dahi Azərbaycan şairi və mütəfəkkiri İmadəddin Nəsiminin anadan olmasının 650 illik yubileyi münasibətilə Azərbaycan Respublikasının Prezidenti, Ali Baş Komandan İlham Əliyevin Sərəncamı ilə ölkəmizdə “Nəsimi ili” elan olunan 2019-cu ildə silsilə tədbirlər Azərbaycan Ordusunda da davam etdirilir.
Müdafiə Nazirliyinin mətbuat xidmətindən AZƏRTAC-a bildiriblər ki, silsilə tədbirlər çərçivəsində Həzi Aslanov adına Ordu İdeoloji və Mədəniyyət Mərkəzində Nəsiminin yubileyinə həsr edilmiş “Laməkan şairimiz” adlı ədəbi-bədii tədbir keçirilib.
Tədbirdə çıxış edənlər İmadəddin Nəsiminin Azərbaycan xalqının ümumbəşər mədəniyyətinə bəxş etdiyi qüdrətli söz ustası olduğunu vurğulayıblar. Qeyd olunub ki, Nəsimi Şərqin zəngin mədəni-mənəvi sərvətləri üzərində ucalmış və bədii söz sənətinin son dərəcə qiymətli incilərini meydana gətirmişdir. Həmçinin mütəfəkkir şairin dərin poetik fikirlərlə fəlsəfi görüşlərin vəhdətində olub, dövrün elmi-fəlsəfi düşüncəsinin aydın ifadəçisinə çevrilmiş müstəsna əhəmiyyətli ədəbi irsi qədim köklərə və çoxəsrlik ənənələrə malik Azərbaycan ədəbiyyatı tarixində xüsusi mərhələ təşkil etdiyini bildiriblər.
Tədbirdə İmadəddin Nəsimiyə həsr olunmuş film göstərilib, Sabunçu rayon 1 saylı Sağlamlıq İmkanları Məhdud Gənclərin Peşə Reabilitasiya Mərkəzinin gəncləri “Nəsimi və Dərvişlər” tamaşası nümayiş etdiriblər.
Üç saylı Xüsusi İnternat Məktəbinin şagirdlərinin Nəsimi yaradıcılığının incilərini tamaşaçılara “işarət dili” ilə çatdırması böyük rəğbət və alqışlarla qarşılanıb. Tədbirin sonunda Nəsimi yaradıcılığına həsr olunmuş mahnılar səsləndirilib.