İQTİSADİYYAT
Azərbaycan xarici şoklara çox qısa zamanda reaksiya verir və bunun ölkə iqtisadiyyatına təsirini minimumlaşdırmağa çalışır
Bakı, 13 mart, AZƏRTAC
Azərbaycan xarici şoklara çox qısa zamanda reaksiya verir və bunun ölkə iqtisadiyyatına təsirini minimumlaşdırmağa çalışır.
Bu sözləri AZƏRTAC-a Milli Məclisin deputatı Vüqar Bayramov deyib.
“OPEC və OPEC üzvü olmayan ölkələrin anlaşma imzalaya bilməməsi dünya bazarında neftin qiymətinin kəskin enməsi ilə müşahidə olundu. Belə ki, neft bazarı bu həftə praktik olaraq çöküşlə başladı. Bu, 1991-ci ildən sonra neftin dünya bazarında ən aşağı qiymət idi. Sözsüz ki, dünya bazarında neftin qiymətinin dəyişməsi xarici amil olaraq Azərbaycanın iqtisadiyyatına təsir göstərir. Neft bazarındakı volatillik isə ölkə iqtisadiyyatına bağlı məsələ deyil. 2014-cü ildən sonra ölkəmizdə qeyri-neft sektorunun inkişafı, eləcə də iqtisadiyyatın şaxələndirilməsi ilə bağlı həyata keçirilən tədbirlər mərhələli şəkildə neftdən asılılığın aradan qaldırımasına xidmət edib. Həmin il qlobal neft şoku yaranan zaman Azərbaycanın dövlət büdcəsində neft sektorunun payı 80 faiz idisə, bu rəqəm artıq 50 faizədək azalıb və qeyri-neft sektorunun payı 20 faizdən 50 faizə qədər yüksəlib. Bu, ondan xəbər verir ki, ötən müddətdə büdcə gəlirləri ilə bağlı addımların mərhələli şəkildə atılması sayəsində iqtisadiyyatın şaxələndirilməsinə nail olunması istiqamətində uğurlar əldə edilib”, - deyə V.Bayramov diqqətə çatdırıb.
Milli Məclisin deputatı deyib: “Nazirlər Kabinetində keçirilən görüş ondan xəbər verir ki, Azərbaycan xarici şoklara çox qısa zamanda reaksiya verir və bunun ölkə iqtisadiyyatına təsirini minimumlaşdırmağa çalışır. 2014-cü ildən sonra həyata keçirilən siyasət praktik olaraq dövlət rezervlərinin artırılmasına xidmət edir. Xarici borc məbləğində azalmalar olub və xarici borcun ümumi daxili məhsuldakı payı 17 faizədək azalıb. Eyni zamanda, dövlət rezervlərinin həcminin 50 milyard dollardan çox olması valyuta ehtiyatlarının payının ümumi daxili məhsuldan daha çox olmasına səbəb olur. Bu da öz növbəsində, xarici şokların təsirlərinin minimumlaşdırılması baxımından vacibdir”.
“İqtisadiyyatın şaxələndirilməsi ilə bağlı islahatların sürətləndirilməsi əsas prioritet məsələlərdən biridir. Son hadisələr bir daha onu təsdiq edir ki, Azərbaycanda dərinləşmiş iqtisadi islahatlar davam edəcək. Növbəti mərhələdə həm islahatların dərinləşməsi, həm neft sektorunun ümumi iqtisadiyyatda payının azaldılması və iqtisadiyyatın şaxələndirilməsi islahatların əsas istiqamətləri olaraq qalacaq. 2019-cu ildə islahatlar, xüsusən də gizli iqtisadiyyata qarşı aparılan mübarizə dövlət büdcəsindən əlavə olaraq 1 milyard manat vergi daxilolmalarının cəlb edilməsinə imkan verdi. Bu ilin yanvar-fevral aylarında da vergi daxilolmaları proqnozlaşdırılandan daha çox olub. Bu, əsasən qeyri-neft sektoru hesabına baş verib. Qeyri-neft sənayesində 20 faizdən çox, ümumi daxili məhsulda 2,8 faiz artım qeydə alınıb. Qeyri-neft ümumi daxili məhsuldakı artım 6,5 faizdən çoxdur. Bu, ondan xəbər verir ki, qlobal şoklara və neft bazarındakı volatilliyin yüksək olmasına baxmayaraq Azərbaycan iqtisadiyyatın şaxələndirilməsi ilə bağlı islahatları davam etdirir. Bu da nəticə etibarilə özünü iqtisadiyyatın strukturunda göstərməkdədir. Bu baxımdan çevik reaksiyalar, atılan addımlar növbəti mərhələdə də qlobal şokların və xarici iqtisadi faktorların ölkəmizin iqtisadiyyatına təsirlərini minimumlaşdırmağa imkan verəcək. Azərbaycan Strateji Yol Xəritəsinə uyğun olaraq dərinləşmiş iqtisadi islahatları davam etdirəcək”, - deyə o bildirib.