İQTİSADİYYAT


Azərbaycanda “InnoWeek – İnnovasiya həftəsi” keçiriləcək  YENİLƏNİB

Bakı, 14 oktyabr, AZƏRTAC

Oktyabrın 18-dən 24-dək Azərbaycanda ikinci dəfə “InnoWeek – İnnovasiya həftəsi” təşkil olunacaq.

AZƏRTAC xəbər verir ki, bununla bağlı oktyabrın 14-də keçirilən mətbuat konfransında Nəqliyyat, Rabitə və Yüksək Texnologiyalar Nazirliyinin Heydər Əliyev Mərkəzi ilə birgə keçirəcəyi layihə çərçivəsində yüksək texnologiyalar, innovasiyalar sahəsində ən son yeniliklərin əks olunduğu konfrans, forum və sərgilərin təşkil ediləcəyi bildirilib. Tədbirlər Heydər Əliyev Fondunun “Regional İnkişaf” İctimai Birliyi, Azərbaycan Respublikasının Gənclər Fondu, İnnovasiyalar Agentliyi, Birləşmiş Millətlər Təşkilatının İnkişaf Proqramı, “Azercell” və “Microsoft” şirkətləri ilə birgə reallaşdırılır.

“InnoWeek” çərçivəsində oktyabrın 18-də “I2B – İdeyadan Biznesə” layihəsinin respublika finalı keçiriləcək. Bakı və region qalibləri arasından 2019-cu il üzrə qaliblər müəyyən ediləcək. Finalda layihələr mütəxəssislərdən ibarət münsiflər heyəti qarşısında təqdim olunacaq. Jüri tərəfindən ideyanın unikallığı, bazar potensialı, investisiyanın mənfəət müddəti, ilkin xidmətin/prototipin hazırlanmasına tələb olunan müddət, komandanın ideyanı gerçəkləşdirmə qabiliyyəti kimi meyarlar qiymətləndiriləcək. Təşkilatçılar və tərəfdaşlar tərəfindən ilk üç yerin sahiblərinə ideyalarını biznesə çevirmək üçün maliyyə dəstəyi göstəriləcək.

Oktyabrın 19-da Nəqliyyat, Rabitə və Yüksək Texnologiyalar Nazirliyinin “Robopark” layihəsi çərçivəsində “Roboday” sərgisi təşkil ediləcək. “Roboday”də robotlarla iş imkanı yaradan təlimlər keçiriləcək, robotexnika sahəsində tətbiq və əyləncə zonası ilə təchiz edilmiş stendlər fəaliyyət göstərəcək. Gələcəyin yenilikçi texnologiya mühəndislərinin yetişməsinə töhfə vermək, kiçik yaşlardan bu sahəyə maraq aşılamaq məqsədilə STEAM (Science, Technology, Engineering, Art, Math – Elm, Texnologiya, Mühəndislik, İncəsənət, Riyaziyyat) təhsil proqramları barədə məlumat veriləcək, robot şouları nümayiş etdiriləcək.

“İnnovasiya həftəsi” çərçivəsində önəmli tədbirlərdən biri də oktyabrın 21-22-də keçiriləcək 2-ci “Bakı Elektron Ticarət Forumu”dur (BEF – 2019). İki gün davam edəcək forumda beynəlxalq təşkilatların, dövlət qurumlarının, ictimai təşkilatların nümayəndələri, mikro, kiçik və orta sahibkarlar, investorlar, ekspertlər, startapçılar iştirak edəcəklər. Tədbirdə elektron ticarətin müxtəlif istiqamətləri üzrə sessiyalar təşkil olunacaq. Forumda e-ticarət sahəsində liderlər, tanınmış e-ticarət və onlayn ödəniş platformalarının mütəxəssisləri, ekspertlər bir araya gələcək və bu istiqamətdə son trendlər, müsbət təcrübələr müzakirə ediləcək.

Oktyabrın 22-də Nəqliyyat, Rabitə və Yüksək Texnologiyalar Nazirliyi və Birləşmiş Millətlər Təşkilatının Avropa İqtisadi Komissiyasının (UNECE) təşkilatçılığı ilə “İnnovasiya ekosisteminə siyasi baxış” mövzusunda dəyirmi masa keçiriləcək. Tədbirdə innovasiya ekosistemi iştirakçıları – hökumət və qeyri-hökumət qurumları, agentliklər, inkubasiya-akselerasiya mərkəzləri və digər əlaqədar təşkilatların rəhbərləri iştirak edəcəklər.

“InnoWeek”də keçiriləcək əhəmiyyətli tədbirlərdən biri də “Euroasia Innovation Day”dir. Oktyabrın 23-də “Huawei” şirkəti ilə birgə təşkil olunacaq bu dialoq platformasına siyasətçilər, özəl sektor nümayəndələri və elm xadimləri qatılacaqlar.

Oktyabrın 23-də baş tutacaq növbəti tədbir – “Innovation Awards Gala” mükafatlandırma mərasimində “İlin startapı”, “İlin influenseri”, “İlin innovasiya tədbiri”, “İlin innovasiya layihəsi”, “İlin innovasiya ekosistemi təmsilçisi” nominasiyaları üzrə qaliblər elan ediləcək və onlara Azərbaycan İnnovasiya Mükafatı təqdim ediləcək. Qeyd edək ki, bu mükafat “İnnovativ Azərbaycan” devizi ilə qlobal innovasiya ekosistemində lider ölkələr sırasında olmağımız üçün lokal ekosistem oyunçularını dəstəkləmək məqsədilə təsis olunub.

“İnnovasiya həftəsi”nin sonuncu günü – oktyabrın 24-də isə “Kaspersky Security Day” platforması təşkil ediləcək. Nəqliyyat, Rabitə və Yüksək Texnologiyalar Nazirliyi və “Kaspersky” şirkətinin birgə təşkilatçılığı ilə keçiriləcək tədbirdə dövlət qurumları, özəl sektor, qeyri-hökumət təşkilatları, ali təhsil müəssisələri, elmi tədqiqat institutlarının nümayəndələri iştirak edəcəklər.

“InnoWeek”ə daxil olan bütün tədbirlər Heydər Əliyev Mərkəzində keçiriləcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.