İQTİSADİYYAT
Azərbaycanda enerji strategiyası ilə yanaşı, iqtisadiyyatın digər sahələrində əməli tədbirlər həyata keçirilir
Bakı, 23 may, AZƏRTAC
Azərbaycan dövlətinin və xalqının xilaskarı ulu öndər Heydər Əliyevin dünyəvi idarəetmə prinsiplərinə uyğun ölkəmiz üçün atdığı addımların müsbət nəticələri hər gün hiss olunmaqda davam edir. Xalqın təkidi ilə hakimiyyətə gəlmiş Ulu Öndər bir tərəfdən dövlətçiliyi bərpa etmək, hüquqi dövlət qurmaq prinsipi ilə yanaşı, digər tərəfdən dövlətinin və xalqının maddi güzəranını yaxşılaşdırmaq sahəsində yeni strategiyanı işə salıb. Bu strategiyanın əsasında mövcud neft və qaz yataqlarının dünyanın müasir texnologiyalarına uyğun istifadəsi barədə xüsusi qərar verib. "Əsrin müqaviləsi"nin imzalanması ilə çətin vəziyyətdə olan Azərbaycanda Avropanın ən iri şirkətləri ilə birgə layihənin işlənməsinə başlanıldı. Həmin dövrdə bu sahədə müştərək iş birliyi yaradılmışdı. Sözsüz ki, bu siyasi gedişlər Azərbaycanın dünya dövlətləri içərisində söz sahibinə çevrilməsinə, xüsusi mövqeyə malik olmasına zamin yaradırdı.
Bu sözləri AZƏRTAC-a açıqlamasında Milli Məclisin deputatı Cavanşir Paşazadə söyləyib.
O bildirib ki, bu gün Ulu Öndərin siyasətini davam etdirən Prezident İlham Əliyevin uğurlu addımları nəticəsində enerji siyasətinin dünyəvi prinsiplərə uyğun nizamlanması Azərbaycan dövlətinin qüdrətinin gündən-günə artmasına səbəb olub. Bir vaxtlar uzaqgörən siyasətlə Azərbaycanın çətin və ağır günündə enerji layihələrinin birgə işlənməsinə cəlb edilən ən iri Avropa ölkələri bu gün obyektiv səbəbdən Azərbaycana mövcud neft-qaz məhsullarına olan ehtiyacları ilə bağlı müraciətlər edirlər.
“Bütün bunları nəzərə alaraq, Azərbaycan xalqının böyük fəxr ilə deməyə mənəvi haqqı var ki, Azərbaycan dövlətinin digər sahələrlə yanaşı, neft strategiyası üzrə apardığı siyasət etibarlı və əvəzolunmaz əldədir. Bu gün Azərbaycan dünya ölkələrində öz aktuallığı ilə seçilən enerji strategiyası ilə yanaşı, iqtisadiyyatın digər sahələrində də yüksək göstəricilər əldə etməsi üçün əməli tədbirlər həyata keçirir. Belə ki, ölkəmiz ərzaq təhlükəsizliyinin vaxtında aradan qaldırılması məqsədilə aqrar sahədə müasir texnologiyalara uyğun müxtəlif innovativ üsulların tətbiqinə xüsusi diqqət yetirir. Xüsusilə respublikanın rayonlarında, azad olunmuş Qarabağ torpaqlarında pilot layihələrin yaradılması, həmin ərazilərdə geniş tikinti və quruculuq işlərinin həyata keçirilməsi yol xəritəsinin əsasını təşkil edib. Bir sözlə bu gün Azərbaycan dövləti öz xalqının vahid birliyi istiqamətində iqtisadi inkişafını uğurla davam etdirir”, - deyə deputat vurğulayıb.