Bakı, 24 yanvar, AZƏRTAC

Azərbaycanda fəaliyyət göstərən iş adamları üçün gömrük sahəsində də münbit şərait yaradılıb.

Dövlət Gömrük Komitəsinin (DGK) mətbuat və ictimaiyyətlə əlaqələr idarəsindən AZƏRTAC-a bildirilib ki, bu fikirlər yanvarın 24-də DGK-nın sədri, gömrük xidməti general-leytenantı Səfər Mehdiyevin Türkiyənin Müstəqil Sənayeçi və İş Adamları Dərnəyinin ölkəmizdəki nümayəndəliyinin (MÜSİAD) üzvləri ilə görüşündə səsləndirilib. Komitə sədri iki qardaş ölkə arasındakı strateji tərəfdaşlıq münasibətlərindən məmnunluqla bəhs edib, iqtisadi əlaqələrin, eyni zamanda, gömrük sahəsində əməkdaşlığın yüksək səviyyədə olduğunu bildirib.

Prezident İlham Əliyevin rəhbərliyi ilə son illər gömrük sahəsində aparılan islahatlara toxunan S.Mehdiyev vurğulayıb ki, şəffaflığın təmin olunması, korrupsiya hallarının aradan qaldırılması ilə bağlı görülən işlər, gömrük sisteminin strukturunda və kadr potensialının gücləndirilməsində həyata keçirilən yeniliklər, gömrük prosedurlarının sadələşdirilməsi, beynəlxalq ticarətin asanlaşdırılması istiqamətində atılan addımlar nəticəsində həm fiskal, həm də hüquqpozmalara qarşı mübarizə istiqamətində ciddi nailiyyətlər əldə olunub.

Azərbaycanın dünyanın ən inkişaf etmiş ölkələrindəki gömrük sisteminə sahib olduğunu bildirən komitə sədri yeni layihələr barədə də qonaqları məlumatlandırıb, bu il fevralın 1-dən tətbiq ediləcək “Yaşıl dəhliz” buraxılış sisteminin ticarətin asan, sürətli və maneəsiz şəkildə həyata keçirilməsinə münbit şərait yaradacağını diqqətə çatdırıb. S.Mehdiyev, eyni zamanda, Azərbaycan gömrüyünün dünya gömrük ailəsinin etibarlı üzvünə çevrildiyini qeyd edib, 2019-cu ildə ölkədə narkotiklərlə mübarizə, informasiya texnologiyaları sahəsində mühüm tədbirlərin keçiriləcəyini bildirib.

MÜSİAD-Azərbaycanın idarə heyətinin sədri Abdurrahman Uzun tarixi köklərə dayanan Azərbaycan-Türkiyə münasibətlərinin daim inkişaf etdiyini qeyd edib, Azərbaycanda fəaliyyət göstərən iş adamları üçün bütün sektorlarda olduğu kimi, gömrük sahəsində də münbit şəraitin yaradıldığını diqqətə çatdırıb. Təmsil etdiyi qurum haqqında məlumat verən idarə heyətinin sədri MÜSİAD-ın dünyanın bir çox ölkəsində nümayəndəliklərinin fəaliyyət göstərdiyini, minlərlə biznes nümayəndəsini birləşdirdiyini bildirib.

Azərbaycan gömrük sistemində aparılan islahatları yaxından izlədiklərini və müsbət qiymətləndirdiklərini diqqətə çatdıran MÜSİAD təmsilçisi görülən işlərin iqtisadiyyatın, beynəlxalq ticarətin inkişafına mühüm töhfə verəcəyini vurğulayıb.

Görüşdə qarşılıqlı maraq doğuran məsələlər barədə fikir mübadiləsi aparılıb.