CƏMİYYƏT


“Azərbaycanda hərbi təhsil. Tarixi oçerklər” kitabı çapdan çıxıb

Bakı, 4 may, AZƏRTAC

“Azərbaycanda hərbi təhsil. Tarixi oçerklər” kitabı çapdan çıxıb.

AZƏRTAC xəbər verir ki, geniş oxucu üçün təqdim edilən nəşrin müəllifləri - Silahlı Qüvvələrin Hərbi Akademiyasının Adyunktura və elm şöbəsinin professoru, “Dərbənd” Xeyriyyə İctimai Birliyinin sədri, Türk Dünyası Araşdırmaları Beynəlxalq Elmlər Akademiyasının və Qotfrid Vilhelm Leybnits adına Avropa Təbiət Elmlər Akademiyasının həqiqi (akademik) üzvü, “Azərbaycan Tarixçiləri” İctimai Birliyinin üzvü, ehtiyatda olan birinci dərəcəli kapitan, tarix elmləri doktoru, professor Nurulla Əliyev, Silahlı Qüvvələrin Hərbi Akademiyasının Adyunktura və elm şöbəsi rəisinin müavini – Adyunktura rəisi, polkovnik Atamalı Şahbazov və həmin şöbənin dosenti, fizika-riyaziyyat üzrə fəlsəfə doktoru, ehtiyatda olan polkovnik, fizika-riyaziyyat üzrə fəlsəfə doktoru Azər Həsənovdur.

Nəşrin elmi redaktoru Silahlı Qüvvələrin Hərbi Akademiyanın rəisi, dosent, general-leytenant Heydər Piriyev, baş redaktoru Müdafiə Nazirliyinin Hərbi Təhsil İdarəsinin Elm şöbəsinin müdiri, milli təhlükəsizlik və hərbi elmlər üzrə fəlsəfə doktoru, dosent, polkovnik Arif Həsənov, redaktoru Hərbi Akademiyanın əməliyyat məharəti strategiyası şöbəsinin rəisi, polkovnik Telman Şahbazov, rəyçiləri Hərbi Akademiyanın Adyunktura və elm şöbəsinin rəisi, polkovnik Rəşad Tahirov və həmin şöbənin professoru, hərbi elmlər və milli təhlükəsizlik üzrə elmlər doktoru, professor, ehtiyatda olan polkovnik Elşən Həşimovdur.

Hərbi Akademiyanın Adyunktura və elm şöbəsində zəngin arxiv sənədləri əsasında hazırlanan kitab 1918-2021-ci illərdə Azərbaycan Ordusunda milli zabit kadrların hazırlanması, hərbi təhsil sisteminin yaranması və onun təşkili məsələlərinə həsr olunub.

Nəşrdə müasir dövrdə Azərbaycan Respublikasının Silahlı Qüvvələri üçün peşəkar kadr hazırlayan və yenidən formalaşan hərbi təhsil sistemi haqqında geniş məlumat verilib. Həmçinin Azərbaycan Ordusunda xüsusi təyinatlı təhsil müəssisələrinin fəaliyyəti və onların qısa müddətdə inkişaf yolu əksini tapıb. Kitabda Silahlı Qüvvələrin Hərbi Akademiyasının komandanlığın və professor-müəllim heyətinin son illərdə peşəkar, ali təhsilli zabit və elmi pedaqoji kadrların hazırlığında roluna da xüsusi yer ayrılıb.

Nəşrdə Azərbaycan Respublikası ərazilərinin işğaldan azad olunması zamanı hərbi əməliyyatlarda iştirak edərək igidlik və şücaət nümayiş etdirmiş xüsusi təyinatlı təhsil müəssisələrinin məzunları olan general və zabitlərin “Vətən Müharibəsi Qəhrəmanı” fəxri adı, müxtəlif orden və medallarla təltif olunanların siyahısı da ayrıca təqdim olunub.

Azərbaycan Respublikasının mülki ali və xüsusi təyinatlı təhsil müəssisələrinin müəllimləri, tələbələri, dinləyiciləri və geniş oxucu auditoriyası üçün nəzərdə tutulan kitab gənc nəslin vətənpərvərlik ruhunda tərbiyəsi işinə də sanballı elmi töhfədir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.