MƏDƏNİYYƏT


Azərbaycanda ilk dəfə “İlin press fotosu” adlı fotomüsabiqə keçirilir

Bakı, 3 mart, AZƏRTAC

Hər il müxtəlif ölkələr, eləcə də dünya üzrə “İlin press fotosu” adlı fotomüsabiqələr keçirilir və ən yaxşı fotolar qalib gələrək mükafatlandırılır. Bunları nəzərə alaraq Azərbaycanda fotoqrafiyanın inkişafına töhfə vermək, fotoqrafların imkanlarından daha səmərəli istifadə edilməsi, onların bu sahəyə maraq göstərməsi, ölkəmizi dünyada fotolar vasitəsi ilə tanıdılması, onlara ruh yüksəkliyi aşılamaq məqsədilə “Gilavar” Azərbaycan Foto Klubu Azərbaycanda ilk dəfə “İlin Press Fotosu” adlı yeni layihəyə start verib. Layihə çərçivəsində hər il “Azərbaycan Press Foto” adlı foto müsabiqənin keçirilməsi nəzərdə tutulub.

AZƏRTAC xəbər verir ki, müsabiqənin keçirilməsində əsas məqsəd kütləvi informasiya vasitələrində çalışan və sərbəst fəaliyyət göstərən peşəkar fotoqraflar tərəfindən il ərzində çəkilən və mətbuatda yayımlanan ən yaxşı fotoları seçmək və dəyərləndirməkdir.

Müsabiqəyə 2020-ci il ərzində çəkilmiş fotolar qəbul olunacaq. Yarışma ilə bağlı bütün təşkilati məsələlər, o cümlədən fotoların qəbulu, münsiflərin seçimi, müsabiqənin şərtlərinə əməl olunmasına nəzarət “Gilavar” Azərbaycan Foto Klubu tərəfindən həyata keçiriləcək. Fotoqrafların işləri peşəkar münsiflər heyəti tərəfindən qiymətləndiriləcək. Müsabiqənin şərtləri beynəlxalq foto təşkilatların qayda və prinsiplərinə uyğun şəkildə təşkil olunur. Klubun beynəlxalq foto müsabiqələrin keçirilməsi üzrə kifayət qədər təcrübəsi vardır. Klub 2017-ci ilin dekabr ayında Beynəlxalq Foto Sənəti Federasiyasına üzv kimi qəbul edilib və bu təşkilatın Azərbaycan üzrə təmsilçisidir.

Foto müsabiqə rəqəmsal kateqoriya üzrə 6 mövzu - xəbər, gündəlik həyat, portret, təbiət, idman və mədəniyyət ətrafında keçiriləcək. Xəbər və İdman mövzuları həm tək foto, həm də hekayə fotosu, digər mövzular isə yalnız tək fotodan ibarət olacaq. Qaliblər hər mövzu üzrə ilk üçlükdə qərarlaşacaq. Qalib gələn fotolar arasından “İlin press fotosu” seçiləcək.

Müsabiqə haqqında ətraflı məlumatı http://gilavar.net/musabiqe saytından əldə etmək mümkündür.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.