Bakı, 18 iyun, AZƏRTAC

Birləşmiş Millətlər Təşkilatının İnkişaf Proqramının (BMTİP) Azərbaycandakı ölkə üzrə nümayəndəliyi iyunun 28-dən 30-dək ilk dəfə inklüzivlik hakatonu təşkil edir. Hakaton 100-dək insanı paytaxt Bakıda bir araya gətirərək onlara əlilliyi olan müxtəlif bacarıqlara malik insanlara dəstək göstərmək üçün innovativ yeniliklər yaratmaqda kömək edəcək.

BMTİP-dən AZƏRTAC-a bildirilib ki, hazırda dünya əhalisinin 15 faizdən çoxunu əlilliyi olan insanlar təşkil edir. Azərbaycanda əlilliyi olan insanların sayı 620 min nəfər, yaxud əhalinin təxminən 6 faizi nisbətindədir. Onlar 1,3 milyon təqaüdçünün təxminən 30 faizini, eyni zamanda, yetkinlik yaşına çatmayan və əlilliyə görə müavinət alanların 60 faizini təşkil edir. Əlilliyi olan insanlar gündəlik həyatda hər gün bir sıra çətinliklərlə üzləşir və maneələrlə rastlaşırlar ki, bu çətinliklər çox zaman geniş əhalinin nəzərindən yayınır.

Ümumdünya Səhiyyə Təşkilatının məlumatına əsasən, əlilliyi olan insanların ən çox üzləşdikləri çətinliklərə onlara qarşı cəmiyyətdə olan münasibət, fiziki məhdudiyyətlər, sosial faktorlar, əlçatan infrastrukturun, o cümlədən rabitə və nəqliyyat sistemlərinin olmaması habelə qanunvericiliklə bağlı və siyasi dəstəyin kifayət qədər olmaması kimi məqamlar aiddir. Çox vaxt əlilliyi olan insanlar eyni vaxtda bir neçə maneə ilə üzləşirlər. Bu maneələri qeyri-ənənəvi yolla aradan qaldırmaq məqsədilə BMTİP-in Azərbaycandakı nümayəndəliyi “UNLIMITED” (“Məhdudiyyətsiz”) konsepsiyası altında ikigünlük İnklüzivlik Hakatonu təşkil edir.

“UNLIMITED” İnklüzivlik Hakatonunun əsas məqsədi Azərbaycanda əlilliyi olan insanların təcrübəsində rast gəlinən çətinlikləri göstərərək bu çətinlikləri aradan qaldırmaq üçün ideya və açıq mənbədən olan həll yollarını təklif edə biləcək insanları bir araya gətirməkdən ibarətdir. Həll yolları dedikdə müxtəlif innovativ xidmətlər və məhsullar nəzərdə tutulur (məsələn, tətbiqi proqramlar, veb-saytlar, elektron məhsullar). Əlilliyi olan insanların yaşayışını yaxşılaşdırmaq üçün hakaton iştirakçıları 48 saat ərzində öz ideyalarını praktiki prototiplərə çevirmək üçün təlimatçılar qrupu tərəfindən ideya dizaynının əsaslarını və sirrlərini mənimsəyəcəklər. Proqrama iştirakçı qismində qatılmaq üçün vətəndaş cəmiyyəti nümayəndələri, əlilliyi olan insanlar, texnologiya sahəsinin peşəkarları və yüksək motivasiyası olan gənclər və ümumilikdə həvəsli insanlar dəvət olunur.

Proqram hakatona qoşulmağa maraq göstərən icma fəalları və könüllülər, veb tərtibatçılar, dizaynerlər, veb proqramçılar, əlilliyi olan şəxslər, jurnalistlər və hökumət qurumlarında çalışan insanlardan müraciətlərin qəbulu üçün açıq elan olunur. Qeydiyyata alınanlar intensiv iş şəraitində qrup şəklində işləyəcək və əlilliyi olan insanların problemləri və ehtiyacları barədə məlumatlılığın artmasına şərait yarada bilən, habelə onlar üçün bu problemlərin həllinə kömək edən bir sıra praktiki prototiplər hazırlayacaqlar.

Qalib gələn ideya 5 min AZN-lik mükafat qrantı alacaq və mükafatdan sonrakı üç ay müddətində peşəkar təlimatçı yönləndirməsindən yararlanacaq. Üç ay müddətində prototipin tətbiqi tamamlanmalıdır. Bu müddət bitdikdə yeni icad edilən tətbiqin artıq işlək vəziyyətdə olması nəzərdə tutulur.

Ərizələrin qəbulu iyunun 23-də Bakı vaxtı ilə saat 23:59-da başa çatacaq. Hakaton İncəsənət Muzeyində keçiriləcək (ünvan: Bayıl qəsəbəsi, Milli Bayraq Meydanı, 1000 Bakı, Azərbaycan). Təcrübəli təlimatçı komandası iştirakçı qruplara dəstək göstərəcək və ən yaxşı mümkün həll yollarının işlənib hazırlanmasına kömək edəcəklər. Daha ətraflı məlumat: http://www.unlimited.az/