Bakı, 17 oktyabr, AZƏRTAC

Dövlət Miqrasiya Xidmətində (DMX) 2017-ci ilin doqquz ayının yekunlarına və qarşıda duran vəzifələrə həsr olunmuş xidməti müşavirə keçirilib.

DMX-dən AZƏRTAC-a bildiriblər ki, Xidmətin struktur bölmələrinin rəhbərlərinin iştirakı ilə keçirilən müşavirədə qurumun rəisi Firudin Nəbiyev hesabat məruzəsi ilə çıxış edib. Xidmət rəisi bildirib ki, hazırda Prezident İlham Əliyevin rəhbərliyi ilə çoxmillətli və çoxkonfessiyalı ölkəmizin bütün bölgələrində sakinlər və biznes dairələri üçün maksimum imkanların yaradılması məqsədilə nəhəng infrastruktur və inkişaf layihələri həyata keçirilir. Hazırda təkcə paytaxtımız yox, regionlar da uğurla inkişaf edir. İqtisadiyyatımızın şaxələndirilməsi əsasən regional infrastrukturun yaradılması və bölgələrdə inkişafın təmin olunması sayəsində mümkün olub. Prezident İlham Əliyev ölkəmizə rəhbərliyinin ilk illərində - 2004-cü ildə deyib ki, “Biz qara qızılı insan kapitalına çevirməliyik”. Azərbaycan hökuməti o vaxtdan təhsil və səhiyyə infrastrukturuna böyük sərmayə yatırıb. Qaçqınların və məcburi köçkünlərin sosial-məişət şəraitinin yaxşılaşdırılması sahəsində müvafiq işlər görülüb, 100-ə yaxın qəsəbə salınıb. Onların 250 mini yeni ev və mənzillərlə təmin olunub və bu proses davam etməkdədir.

Firudin Nəbiyev ötən ilin Azərbaycanda “Multikulturalizm İli”, bu ilin “İslam Həmrəyliyi İli” elan edilməsinin əhəmiyyətindən danışıb. Qeyd edib ki, bütün etnik və dini qrupların nümayəndələri Azərbaycanda sülh şəraitində, bir ailə kimi yaşayır və bu, ölkəmizin uğurlu inkişafının vacib elementidir. Sabitliyin, tolerantlığın hökm sürdüyü respublikamızda indiyədək miqrantlara münasibətdə heç bir hüquq pozuntusu qeydə alınmayıb.

Xidmət rəisi diqqətə çatdırıb ki, cari ilin doqquz ayında ölkəmiz üçün ən əlamətdar hadisələrdən biri Davos İqtisadi Forumunun iqtisadiyyatların rəqabətqabiliyyətliliyi üzrə hesabatında Azərbaycan iqtisadiyyatının qlobal rəqabət qabiliyyəti indeksində 35-ci yerdə qərarlaşması olub. Sonuncu dəfə ölkəmiz bu siyahıda 37-ci yerdə idi, indi isə 35-ci yerdədir. Azərbaycanın bu göstərici üzrə MDB ölkələri arasında birinci, 140 ölkə arasında isə 35-ci olması həqiqətən də böyük uğurdur. Daha bir əlamətdar hadisə bu yaxınlarda aparıcı beynəlxalq enerji şirkətlərinin konsorsiumu ilə yeni meqaneft müqaviləsinin imzalanmasıdır. Bu müqavilə Azərbaycana nəhəng neft yataqlarının 2050-ci ilə qədər işlənməsinə imkan verəcək, sabit neft istehsalat profilini saxlamaq üçün ölkəmizə on milyardlarla əlavə investisiya yatırılacaq.

Xidmət rəisi vurğulayıb ki, ölkəmizin iştirakı ilə beynəlxalq nəqliyyat dəhlizinin yaradılması işi də bu gün uğurla davam etdirilir. Bu da ölkəmizə qeyri-neft sektorundan gələcəkdə daha çox mənfəət qazanmaq imkanı verəcək. Bundan əlavə, Azərbaycan həm də turizm ölkəsi kimi kifayət qədər böyük potensialını qısa vaxtda təqdim edə bilib. Bütün bu layihələr ölkəyə gələn əcnəbilərin sayında və bununla əlaqədar xidmətin keyfiyyətində özünü göstərir. Ona görə də DMX indiyədək olduğu kimi, fəaliyyətini bu sürətli prosesə uyğun davam etdirməlidir.

F.Nəbiyev məlumat verib ki, 2017-ci ilin doqquz ayında 2 milyon 72 min 76 halda 1 milyon 243 min 346 nəfər əcnəbinin Azərbaycan Respublikasının ərazisinə girişi, 2 milyon 77 min 544 halda isə 1 milyon 241 min 5 nəfər əcnəbinin ölkədən çıxışı qeydə alınıb.

Diqqətə çatdırılıb ki, doqquz ay ərzində ölkədə qalma müddətinə müvafiq olaraq 633 min 827 əcnəbi və vətəndaşlığı olmayan şəxs olduğu yer üzrə qeydiyyata alınmaqla bağlı müraciət edib. Bu ilin doqquz ayında Bakıda, həmçinin respublikanın digər şəhər və rayonlarında keçirilən tədbirlər və aparılan araşdırmalar nəticəsində əcnəbilər və vətəndaşlığı olmayan şəxslər tərəfindən Azərbaycan Respublikasının miqrasiya sahəsində, o cümlədən inzibati qanunvericiliyin tələblərini pozulması ilə bağlı 17 min 76 qərar qəbul edilib.

Hesabat dövründə DMX-yə Azərbaycan Respublikası ərazisində olma və yaşama icazələrinin alınması, haqqı ödənilən əmək fəaliyyətinin həyata keçirilməsi üçün iş icazələrinin alınması, qaçqın statusunun müəyyənləşdirilməsi, Azərbaycan Respublikasının vətəndaşlığına qəbul, bərpa, xitam və vətəndaşlıq mənsubiyyətinin müəyyənləşdirilməsi ilə bağlı 66 min 828 müraciət daxil olub. Müraciətlərin hər biri ayrı-ayrılıqda qanunvericiliyin tələblərinə uyğun olaraq araşdırılıb və müvafiq qərar qəbul edilib. Doqquz ay ərzində Xidmətin “Çağrı mərkəzi”nə 79 min 614 zəng daxil olub.

F.Nəbiyev xüsusi vurğulayıb ki, Xidmətin qazandığı nailiyyətlər Prezident İlham Əliyevin göstərdiyi diqqət və qayğının nəticəsində mümkün olub. Belə ki, Xidmət əməkdaşlarının sosial şəraitlərinin yaxşılaşdırılması, orden, medal, fəxri adlarla təltif edilmələri, onlara ali xüsusi rütbələrin verilməsi, xidmətin keyfiyyətinin yüksəldilməsi üçün maddi texniki imkanların genişləndirilməsi şəxsi heyətdə böyük ruh yüksəkliyi yaradıb.

Xidmət rəisi Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında Prezident İlham Əliyevin verdiyi konkret göstərişləri xatırladıb. Bildirib ki, qarşıya qoyulmuş vəzifələrin vaxtında və düzgün icra edilməsi üçün hər bir miqrasiya əməkdaşı fəaliyyətini yüksək peşəkarlıqla, ciddi tələbkarlıq şəraitində yerinə yetirməlidir. F.Nəbiyev Prezident İlham Əliyevin Xidmətin qarşısında qoyduğu vəzifələrdən danışarkən dövlətimizin başçısının aşağıdakı sözlərini diqqətə çatdırıb: “Biz miqrasiya siyasətimizi daha da gücləndirməliyik, çox ciddi sistem yaratmalıyıq. Hər bir gələn xarici vətəndaş qeydiyyatdan keçməlidir. Qanunsuz bir adam da burada işləməməlidir. Biz istənilən anda bilməliyik ki, hansı xarici vətəndaş hansı gündə haradadır və nə ilə, hansı işlə məşğuldur”.

Sonra struktur bölmə rəhbərlərinin məruzələri dinlənilib.

Müşavirəyə yekun vuran F.Nəbiyev əminliyini bildirib ki, “bir pəncərə” prinsipi üzrə vahid dövlət orqanının səlahiyyətlərini həyata keçirən DMX-nin müraciət edənlərin məmnunluğunun təmin edilməsi, dövlətimizin təhlükəsizliyi, daxili əmək bazarının qorunması, miqrasiya proseslərinin tənzimlənməsi kimi vəzifə və tapşırıqların bundan sonra da müvəffəqiyyətlə yerinə yetirməsi üçün miqrasiya orqanlarında xidmət aparan əməkdaşlar daha böyük səylə çalışacaqlar.