SİYASƏT
Azərbaycanda reallaşdırılan və bütün sahələri əhatə edən islahatlar cəmiyyət tərəfindən rəğbətlə qarşılanır
Bakı, 7 dekabr, AZƏRTAC
Cənubi Qafqaz regionunda aparıcı dövlətə çevrilən və beynəlxalq arenada öz sözünü deyən Azərbaycanda hazırda reallaşdırılan, çevik, dinamik idarəetmənin daha da təkmilləşdirilməsinə hesablanan sosial-iqtisadi, eləcə də kadr və struktur islahatları qanunvericilik orqanından da yan keçə bilməzdi. Çünki ölkədə qarşıya çıxan bir sıra problemlərin həlli, çətinliklərin aradan qaldırılması əsasən qanunverici aktların qəbulu ilə bağlı idi ki, bu da parlamentdən daha operativ, çevik fəaliyyət tələb edirdi.
Bu sözləri AZƏRTAC-a açıqlamasında YAP Səbail rayon təşkilatının sədr müavini, politoloq Arzuman Muradlı bildirib.
Politoloq deyib ki, bu gün dövlət başçısı gənc kadrların idarəetməyə cəlb olunmasına mühüm önəm verir, Azərbaycanda gəncləşdirmə siyasətinin aparılmasına prioritet istiqamət kimi yanaşır. Bu da sirr deyil ki, hazırda ölkə parlamentində innovativ və modern idarəetmə çağırışlarına cavab verən gənclərə ciddi ehtiyac duyulur. Ona görə də Milli Məclisə seçkilərdə gənclərin fəallığının qabarıq nəzərə çarpacağı gözlənilir. Bu isə, şübhəsiz ki, ölkənin gələcək siyasi, sosial-iqtisadi inkişafını daha da sürətləndirəcək, Azərbaycanın beynəlxalq aləmdə nüfuzunu daha da artıracaq. Çünki bugünkü innovativ və modern idarəetmə çağırışlarına cavab verən gənclərdə xalqla, seçicilərlə mütəmadi təmasda olmaq, problemlərin dinlənilməsinə, qaldırılan məsələlərin bir çox hallarda yerində həllinə maraq çox güclüdür.
Burada bir məqamı da qeyd etmək zəruridir. Prezident İlham Əliyev dekabrın 5-də Şamaxıda “ASAN Həyat” kompleksinin açılış mərasimində qurumun əməkdaşları ilə görüşərək deyib: “Mən andiçmə mərasimindəki çıxışımda bizim əsas strateji inkişaf parametrlərini xalqın diqqətinə çatdırdım və hazırda biz ardıcıllıqla bu yolla gedirik. Baxın, Prezident Administrasiyası tamamilə yenidən formalaşıb, gənclər cəlb olunubdur. Nazirlər Kabineti yenidən formalaşıb, gənc nəsil cəlb olunur. İndi artıq növbədənkənar parlament seçkiləri elan olunub. Ümid edirəm ki, gənclər də bu seçkilərə çox fəal qoşulacaqlar. Çünki yeni simalar, yeni ideyalar, yeni yanaşma lazımdır”. Ölkə rəhbəri, həmçinin gənclərin müasirliyi ilə yaşlıların təcrübəsinin vəhdətindən bəhrələnməyin əhəmiyyətinə də toxunub.
Arzuman Muradlı daha sonra vurğulayıb ki, parlamentin buraxılması barədə qərar qanunauyğun addımdır, çünki qanunverici sahədə də islahata ehtiyac duyulurdu. Dövlət başçısının Azərbaycan Respublikasının beşinci çağırış Milli Məclisinin buraxılması və növbədənkənar seçkilərin təyin edilməsi barədə Sərəncamı da qeyd edilən baxımdan Azərbaycan dövlətçiliyinin qarşısında dayanan məqsədlər fonunda inqilabi qərar sayıla bilər.
Politoloq vurğulayıb ki, ölkə həyatının bütün sahələrində, eləcə də parlamentdə də islahatların gerçəkləşdirilməsi cəmiyyət tərəfindən rəğbətlə qarşılanır. Çünki belə səmərəli müasirləşmə, yeniləşmə son nəticədə Azərbaycanda həyata keçirilən sosial-iqtisadi inkişaf strategiyasının uğurlu inkişafını sürətləndirəcək, əhalinin rifahının daha da yaxşılaşdırılması siyasətinin bundan sonra da səmərəli həyata keçirilməsini, daha geniş hədəflərinin müəyyənləşməsini şərtləndirəcək.