REGİONLAR


Azərbaycanda yeni salınan badam bağlarından ilk məhsul yığılacaq VİDEO

Şabran, 24 aprel, Elxan Yusifli, AZƏRTAC

Şabran rayonunda dörd il əvvəl salınan badam bağlarından bu il ilk məhsul toplanacaq. Təsərrüfat sahibləri məhsuldarlığın yüksək olacağını bildirirlər. Son günlər hava şəraiti qeyri-sabit keçsə də, vaxtında aparılan aqrotexniki tədbirlər nəticəsində çiçəkləmə dövründə olan ağaclara ziyan dəyməyib.

AZƏRTAC-ın bölgə müxbiri xəbər verir ki, hazırda Şabran rayonunda 83 hektar badam bağı mövcuddur. Ötən ilə kimi bu bağların cəmi 6 hektarı barverən idi. Həmin badam bağlarından 12 tona yaxın məhsul toplanmışdı.

Fermer Tural Ələkbərov təsərrüfatlarında dörd il əvvəl badam bağlarının salınmasına başlandığını bildirib. Hazırda 23 hektar badam bağına qulluq edir.

“Bizdə iki növ badam becərilir. 10 hektarda “Guara” adlanan badam növünə aid tinglər əkmişik. Bu ağaclar 3 ildən sonra məhsul verir. 13 hektar yeni salınan bağlarda isə Fransadan gətirilən badam növü yetişdirməyə başlamışıq. İlk saldığımız bağlardan bu il məhsul toplayacağıq. Hər hektardan orta hesabla 3-4 ton badam toplayacağımızı gözləyirik. Ləpə şəklində isə hər hektara görə məhsuldarlıq 1-1,5 ton olacaq. Bu da bizim üçün çox yaxşı göstəricidir. Çünki cavan badam ağaclarımızın ilk məhsuludur. Getdikcə məhsuldarlıq daha da artacaq”, - deyə təsərrüfatçı qeyd edib.

Badam bağlarında məhsul iyul-avqust aylarında yığılacaq.

Şabran rayonunun iqlim şəraiti və coğrafi mühiti badam və qoz bağlarının becərilməsi üçün olduqca əlverişlidir. Ötən il rayonda fermerlər tərəfindən 8,8 hektar yeni badam bağı, 15,2 hektar qoz bağı salınıb. Rayonda badam və qoz bağlarının salınması işləri davam etdirilir. Fermerlər yeni salınan superintensiv bağlarda xarici ölkələrin təcrübəsindən faydalanırlar. Qarşıdakı illərdə Şabran rayonunda badam bağlarının sahəsinin 200 hektara çatdırılması nəzərdə tutulub.

Prezident İlham Əliyevin regionların 2014-2018-ci illərdə sosial-iqtisadi inkişafı Dövlət Proqramının yekunları ilə bağlı keçirilmiş konfransdakı nitqində ölkədə kənd təsərrüfatının digər sahələri ilə yanaşı, bağçılıqda badam və qoz bağlarının salınması ilə bağlı tapşırıqlarına uyğun olaraq, yeni bağların salınması mühüm vəzifə kimi qarşıya qoyulub.

2017-2018-ci illərdə Kənd Təsərrüfatı Nazirliyinin Meyvəçilik və Çayçılıq Elmi-Tədqiqat İnstitutunun dəstəyi ilə Şabranda 23, Qusarda 10, Beyləqanda 28, Tərtərdə 18, Cəlilabadda 2 və Abşeronda 1 hektar olmaqla, 82 hektarda badam tingləri əkilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.