İDMAN


Azərbaycanı Yeniyetmələrin III Yay Olimpiya Oyunlarında təmsil edəcək stolüstü tennisçilərlə görüş keçirilib

Bakı, 3 oktyabr, AZƏRTAC

Oktyabrın 6–18-də Argentinanın paytaxtı Buenos-Ayresdə keçiriləcək Yeniyetmələrin III Yay Olimpiya Oyunlarında Azərbaycanı doqquz idman növü üzrə idmançılar təmsil edəcək.

Azərbaycan Stolüstü Tennis Federasiyasından AZƏRTAC-a bildiriblər ki, ölkəmizin təmsil olunduğu idman növləri arasında stolüstü tennis də yer alır.

Stolüstü tennis üzrə hər ölkəyə ayrılan maksimum iki lisenziyanı da qazanan idmançılarımız Ninq Jinq və Yu Xinhanq baş məşqçi Mixail Timofeyevin rəhbərliyi ilə Buenos-Ayresə səfər edəcəklər.

Oktyabrın 3-də federasiyanın kollektivi və yığma komandanın üzvləri Buenos-Ayresdə iştirak edəcək təmsilçilərimizlə görüşüblər. Federasiyanın vitse–prezidenti Fazil Məmmədov idmançılarımıza Yeniyetmələrin III Yay Olimpiya Oyunlarında uğurlar arzulayıb. O, beynəlxalq dərəcəli hakim adını qazanan Sara Sultanova və Xəyalə Qiyasovaya Beynəlxalq Stolüstü Tennis Federasiyasının dərəcə nişanlarını təqdim edib.

Qeyd edək ki, Ninq Jinq ötən ilin noyabrında Xorvatiyanın Split şəhərində keçirilmiş Avropa təsnifat turnirində Oyunlara lisenziya qazanıb. Yu Xinhanq isə Tunisdə təşkil edilmiş təsnifat turnirində ikinci vəsiqəni əldə edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.