İDMAN


Azərbaycanı Yeniyetmələrin III Yay Olimpiya Oyunlarında təmsil edəcək taekvondoçularımızla görüş keçirilib

Bakı, 3 oktyabr, AZƏRTAC

Argentinanın paytaxtı Buenos-Ayresdə keçiriləcək Yeniyetmələrin III Yay Olimpiya Oyunlarında iştirak etmək üçün oktyabrın 4-də yola düşəcək nümayəndə heyətində yer alan iki taekvondoçumız artıq təlim-məşqlərini başa vurub.

AZƏRTAC xəbər verir ki, Argentinaya yola düşməzdən əvvəl Azərbaycan Taekvondo Federasiyasında ölkəmizi bu oyunlarda təmsil edəcək taekvondoçularımızla görüş keçirilib.

Görüşdə Azərbaycan Taekvondo Federasiyasının vitse-prezidentləri Nağı Səfərov və Niyaməddin Paşayev, gənclərdən ibarət taekvondo üzrə milli Olimpiya komandasının baş məşqçisi, Əməkdar məşqçi Məmməd Abdullayev, böyük məşqçi Zahid Məmmədov, eləcə də oyunlarda ölkəmizi təmsil edəcək gənclər arasında sonuncu dünya çempionu Cavad Ağayev və Minayə Əkbərova iştirak ediblər.

Söhbət zamanı Nancinqdə keçirilmiş Yeniyetmələrin II Yay Olimpiya Oyunlarında taekvondoçumuz Səid Quliyevin qızıl medal qazandığını xatırladan Nağı Səfərov bu dəfə də eyni uğurun təkrar olunacağına inandığını deyib.

İdmançı kimi əldə etdiyi təcrübəsini taekvondoçularla bölüşən Niyaməddin Paşayev də məşqçilərə və onların yetirmələrinə uğurlar arzulayıb.

Buenos-Ayresdə təşkil olunacaq Olimpiadada Cavad Ağayev 63, Minayə Əkbərova isə 44 kiloqram çəki dərəcələrində mübarizə aparacaqlar. Beşgünlük taekvondo yarışlarına oktyabrın 11-də yekun vurulacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.