Bakı, 15 iyul, AZƏRTAC

Azərbaycan xalqının ümummilli lideri Heydər Əliyevin siyasi hakimiyyətə gəlməsinin 46 illiyi münasibətilə Suraxanı Rayon İcra Hakimiyyətinin və Yeni Azərbaycan Partiyası Suraxanı rayon təşkilatının birgə təşkilatçılığı ilə tədbir keçirilib.

Tədbir çərçivəsində Yeni Suraxanı qəsəbəsindəki “14 iyul” küçəsində Ulu Öndərin hakimiyyətə gəldiyi günü tərənnüm etdirən Xatirə kompleksinə baxış keçirib. Rayon ictimaiyyətinin nümayəndələrinin hər il iyulun 14-də Xatirə kompleksini ziyarət etməsi ənənə halını alıb.

Rayon icra hakimiyyəti başçısının müavini Sevinc Hüseynova tədbirdə çıxış edərək deyib ki, 14 iyul xalqımızın tarixi taleyində oynadığı misilsiz rolu ilə həmişə xatırlanır və heç vaxt unudulmayacaq günlərin sırasına həkk olunub. Azərbaycanı müstəqil dövlət quruculuğuna aparan kəşməkəşli və şərəfli yol ulu öndər Heydər Əliyevin ölkəmizə birinci rəhbərliyi dövründən başlayır. 1969-cu ildə ümummilli lider Heydər Əliyevin ölkəyə rəhbərliyinin ilk günlərindən respublikada böyük inkişafın başlandığı göz önündə idi. Ulu Öndər respublikaya rəhbərliyinin ilk illərində qazandığı uğurlarla xalqını, dövlətini sevən rəhbər olduğunu sübuta yetirdi. Fitri istedadı, yüksək təşkilatçılıq və idarəçilik məharəti ilə Azərbaycanı cəmi bir neçə ilə dinamik inkişaf yoluna çıxarmağa müvəffəq oldu. İdarəçilikdə mütərəqqi yeniliklərin tətbiqi, milli kadrların önə çəkilməsi yolu ilə cəmiyyətin normal inkişaf ahəngini təmin etdi.

Bildirilib ki, ulu öndər Heydər Əliyevin xatirəsini anarkən onun zəngin dövlətçilik irsinin bütün dünyada tanıdılması və təbliği istiqamətində müstəsna xidmətləri olan Heydər Əliyev Fondunu xüsusi qeyd etmək lazımdır.

Birinci Avropa Oyunlarının uğurlu təşkili və keçirilməsini xüsusi vurğulayan S.Hüseynova qeyd edib ki, bu xoşbəxtlik, ilkə imza atmaq səadəti müstəqil Azərbaycana, onun müdrik və müasir düşüncəli dövlət başçısına nəsib oldu. “Bakı-2015” birinci Avropa Oyunları Təşkilat Komitəsinin işi, xüsusilə, onun sədri Azərbaycanın birinci xanımı Mehriban Əliyevanın fəaliyyəti ən yüksək qiymətə layiqdir.

Yeni Azərbaycan Partiyası Suraxanı rayon təşkilatının sədri Vüqar Seyidov bildirib ki, 1969-cu il iyulun 14-də siyasi hakimiyyətə gələn Heydər Əliyevin həyata keçirdiyi məqsədyönlü tədbirlər nəticəsində qısa zaman kəsiyində Azərbaycan aqrar ölkədən gündən-günə inkişaf edən sənaye ölkəsinə çevrildi. Sənaye ilə yanaşı, ölkə iqtisadiyyatının əsas hissəsini təşkil edən kənd təsərrüfatı da inkişaf etdi. Ulu Öndər ölkədə elmin və təhsilin inkişafı, Azərbaycan gəncinin mükəmməl bilik və ixtisas alaraq cəmiyyətin fəal üzvünə çevrilməsi üçün hər cür şərait yaratdı.

Suraxanı rayon Gənclər və İdman İdarəsinin rəisi Amil Bağırov bildirib ki, bu gün ölkəmizdə Prezident İlham Əliyevin rəhbərliyi altında düşünülmüş və məqsədyönlü gənclər siyasəti uğurla aparılır. Bu siyasətin təməlində ulu öndər Heydər Əliyevin tövsiyələri dayanır. Görülən işlərin nəticəsidir ki, bu gün Azərbaycan gəncləri çox böyük işlərə imza atırlar, cəmiyyətdə mühüm rol oynayırlar.

Sonda Suraxanı rayonunda fəaliyyət göstərən Heydər Əliyev Mərkəzinin sifarişi ilə hazırlanmış “Əyilməz iradə” filmi nümayiş etdirilib.