İQTİSADİYYAT
Azərbaycanın 5 müəssisənin “EKSPO 2017”də iştirakı artıq rəsmi qaydada təsdiq olunub
Bakı, 28 noyabr, Nihad Budaqov, AZƏRTAC
Azərbaycanın Astanada keçiriləcək “EKSPO 2017-Gələcəyin enerjisi” Beynəlxalq Sərgisində təmsil olunması iştirakçı ölkələrlə əlaqələrin daha da dərinləşdirilməsinə zəmin yaradacaq. Azərbaycan tərəfindən 5 müəssisənin “EKSPO 2017”də iştirakı artıq rəsmi qaydada təsdiq olunub. Azərbaycan Respublikası Dövlət Neft Şirkəti (SOCAR) isə sərgidə bütün fəaliyyət sahələri üzrə məlumatları özündə əks etdirən eksponatlarla iştirak edəcək.
Bu barədə AZƏRTAC-ın sorğusuna cavab olaraq Azərbaycanın Energetika Nazirliyindən məlumat verilib. Bildirilib ki, Azərbaycan-Qazaxıstan İqtisadi əməkdaşlıq üzrə Hökumətlərarası Komissiyanın həmsədri olan energetika naziri Natiq Əliyev Prezident İlham Əliyevin müvafiq göstərişi ilə respublikamızı “EKSPO 2017” sərgisində təmsil edəcək milli komissar təyin edilib. Təqribən 5 milyon xarici qonağın ziyarət edəcəyi sərginin Astanada keçirilməsi bu şəhərin inkişafına böyük təsir göstərəcəyini nümayiş etdirir. Xəzəryanı ölkələrin o cümlədən, Azərbaycanın burada təmsil olunması iştirakçı ölkələr arasında əlaqələrin daha da dərinləşdirilməsinə zəmin yaradacaq. Təşkil olunacaq sərgi enerji təhlükəsizliyinin təminatında qarşılıqlı maraq və ümumi prinsiplərə dair fikir mübadiləsinin aparılması ilə beynəlxalq səviyyəli enerji dialoquna siyasi dəstək verməklə yanaşı, enerji siyasətinin məqsədyönlü həyata keçirilməsində iştirakçı ölkələr tərəfindən irəli sürülən islahatlar və digər aktual məsələlər ətrafında geniş müzakirələrdə ölkəmizin iştirakına şəraiti təmin edəcək.
Azərbaycan adıçəkilən sərgidə iştirakı üçün yüksək səviyyədə təşkilatı işlər həyata keçirir. Belə ki, rəsmi və təsərrüfat subyektlərini təmsil edən nümayəndələr arasında texniki məsələlərin həlli istiqamətində işlər aparılır. “EKSPO 2017” sərgisində Azərbaycan tərəfindən Alternativ və Bərpa olunan Enerji Mənbələri üzrə Dövlət Agentliyinin tabeliyində fəaliyyət göstərən “Azalternativenerji” MMC, həmçinin, alternativ və bərpa olunan enerji sahəsində fəaliyyət göstərən “Azgüntex” MMC və “Xəzər Konsaltinq Agentliyi” QSC və “Azəreneji” ASC tərəfindən “Azenco” ASC və “STP” MMC-nin iştirakı artıq rəsmi qaydada təsdiq olunub.
Qeyd edək ki, “EKSPO 2017” Beynəlxalq Sərgisinin Astanada keçirilməsi Parisdə gizli səsvermə nəticəsində 100-dən artıq iştirakçı dövlət tərəfindən seçilib. Ölkələrin səs çoxluğu ilə Astananın seçilməsi adıçəkilən sərginin bu şəhərdə təşkil olunmasının mühüm əhəmiyyət kəsb etdiyini sübuta yetirir. Sərgi bərpa olunan enerjidən istifadə sahəsində nailiyyətlər və perspektivlər, o cümlədən ekoloji təmizlik, ətraf mühitə nisbətən az miqdarda zərər verməklə enerji resurslarından istifadənin təmin olunmasına həsr olunacaq. Sərgi müasir texnologiyaların möhkəm bir platforma kimi enerji problemlərinin həllində Qazaxıstanın yaşıl texnologiyalara keçməsində kotalizator rolunu oynaya bilər. Sərginin Astanada keçirilməsi Qazaxıstanın yeni enerji və yaşıl texnologiyaların əldə edilməsinə böyük imkanlar yaradaraq, sərgiyə hazırlıq prosesinin və onun təşkilinin Qazaxıstana milyardlarla dollar investisiya qazandırılacağına dəlalət verir. “EKSPO 2017” sərgisinin əsasən dünyanın iqtisadi baxımdan nəhəng ölkələrindən (ABŞ, Fransa, Almaniya, Yaponiya, Braziliya, Kanada, İngiltərə, İspaniya və Çin kimi) sonra 2017-ci ildə neft və qaz ehtiyatlarına malik Xəzəryanı ölkədə - Qazaxıstanda təşkili enerji sahəsi üzrə əməkdaşlığın daha da inkişaf etdirilməsinə, həmçinin iştirakçı ölkələrdə tətbiq olunan yeni texnologiyaların mübadiləsinə təminat verəcək.