Bakı, 28 iyul, AZƏRTAC

Avropa İttifaqının maliyyə dəstəyi ilə BMT-nin İnkişaf Proqramı tərəfindən Şərq Tərəfdaşlığı ölkələri ərazisində icra edilən “İqtisadi İnkişafı Dəstəkləyən Bələdiyyə Sədrləri” Proqramı çərçivəsində təşkil olunan regional “Göstər və Danış” (Show&Tell) platformasında Azərbaycanın 6 yerli özünüidarəetmə orqanına qrantlar təqdim edilib.

AZƏRTAC xəbər verir ki, qrantlar üçün təkliflərin qəbulu mayın 20-dən iyunun 30-dək keçirilib. Müraciət edən yerli özünüidarəetmə orqanları “Portfel səyahəti “və “Şəhər transformasiyası” bölmələri üzrə ideyalarını təklif etməyə dəvət olunub.

Özünüidarəetmə orqanlarının proqramda daha fəal iştirakını təmin etmək məqsədilə Lənkəran, Gəncə, Şəki və Bakı şəhərlərində proqram üzvləri üçün informasiya sessiyaları təşkil olunub.

“Portfel səyahəti” üzrə 8, “Şəhər transformasiyası” üzrə isə 22 müraciət daxil olub. İlkin qiymətləndirmədən keçən “Portfel səyahəti” üzrə 3, “Şəhər transformasiyası” üzrə 5 müraciət növbəti mərhələyə dəvət alaraq, iyulun 14-də Avropa İttifaqının Azərbaycan nümayəndəliyi, BMT İnkişaf Proqramının İstanbul Regional Mərkəzi və Azərbaycan nümayəndəliyinin iştirakı ilə intervü prosesindən keçib.

İyulun 18-də seçmə mərhələsinin nəticələri Avropa İttifaqının və BMT İnkişaf Proqramının regional ofislərinin nümayəndələri tərəfindən qiymətləndirilib. Nəticə olaraq, “Portfel səyahəti” üzrə 2, “Şəhər transformasiyası üzrə isə 4 bələdiyyənin layihəsi seçilib.

“Portfel səyahəti” mürəkkəb problemlərin həlli üçün strateji öyrənmə mexanizmidir və seçilən yerli özünüidarəetmə orqanları iki il ərzində qarşılarında duran bir sıra problemlərin həlli üzərində çalışacaqlar.

“Şəhər transformasiyası” katalitik müdaxilələrin layihələndirilməsi üçün üsuldur və qısa zamanda (6 aya dək) seçilmiş layihə üzrə konkret müdaxilələrin edilməsi üzərində çalışacaq.

Seçilmiş yerli idarəetmə orqanlarına texniki dəstək, bilik-bacarıqlarının artımı və layihələrinin icrası üçün maddi dəstək göstəriləcək.

Tədbirdə çıxış edən Avropa İttifaqının Azərbaycandakı nümayəndəliyinin rəhbəri səfir Peter Mixalko bələdiyyələrin bu layihədə iştirakını dəstəklədiyini deyib. O, Aİ-nin ölkəmizdə iqtisadiyyatın inkişafı naminə bələdiyyə sədrləri layihəsinin gerçəkləşdirilməsindən məmnun olduğunu bildirib. O deyib ki, bu layihə 2024-cü ilədək 10 milyon avro büdcə ilə davam edəcək. “Şəhər transformasiyası”na 60 min avroyadək, Portfel səyahəti”nə isə 240 min avro ayrılıb. Bu layihələr bələdiyyələrə təqdim olunub. Onların icrası reallaşdıqdan sonra nəticələrə baxmaq imkanımız olacaq. Aİ Azərbaycan hökuməti ilə bu istiqamətdə sıx əməkdaşlığı davam etdirməkdən məmnundur”, - deyə P.Mixalko diqqətə çatdırıb.

Qeyd edək ki, “İqtisadi İnkişafı Dəstəkləyən Bələdiyyə Sədrləri” Proqramında 6 bələdiyyə - Xırdalan, Urva, Mingəçevir, Səbail, Naftalan və İçərişəhər bələdiyyələri qalib elan olunublar.

Sonda xatirə şəkli çəkilib.

Xatırladaq ki, “İqtisadi İnkişafı Dəstəkləyən Bələdiyyə Sədrləri” Proqramı Azərbaycanda bu ilin martında fəaliyyətə başlayıb və proqrama Azərbaycan üzrə 50 yerli özünüidarəetmə orqanı üzv olub.