SİYASƏT


Azərbaycanın Avstriyadakı səfirliyi erməni təxribatı ilə əlaqədar bu ölkənin APA agentliyi vasitəsilə məlumat yayıb

Vyana, 14 iyul, AZƏRTAC

Azərbaycanın Avstriyadakı səfirliyi Ermənistan silahlı qüvvələrinin son günlərdə Azərbaycan-Ermənistan dövlət sərhədində törətdiyi təxribatlar, Azərbaycan mövqelərinə və xüsusilə də dinc əhalinin yaşadığı kəndlərə artilleriyadan istifadə etməklə hücumlar barədə Avstriya Mətbuat Agentliyi (APA) vasitəsilə geniş məqalə yayıb.

AZƏRTAC xəbər verir ki, məqalədə iyulun 12-də Ermənistan silahlı qüvvələrinin bölmələrinin Azərbaycan-Ermənistan sərhədinin Tovuz istiqamətində mövqelərimizi ələ keçirmək üçün artilleriyaların müşayiəti ilə hücuma keçdiyi bildirilib. Qeyd edilib ki, Azərbaycan bu hücuma təxirəsalınmaz şəkildə adekvat cavab verib və düşmən əks zərbə ilə geri oturdulub.

Qeyd edilib ki, Ermənistan rəhbərliyi verdiyi itkiləri cəmiyyətdən gizlətmək üçün əsassız şəkildə Azərbaycan tərəfini silahlı qarşıdurmada ittiham edib və erməni postlarına UAZ markalı minik vasitəsilə hücum etməsi barədə xəbər yayıb. Məqalədə qeyd edilib ki, əgər Azərbaycan Ordusunun düşmən mövqelərini ələ keçirmək kimi bir niyyəti olsaydı, bunun üçün təyinatı üzrə zirehli döyüş maşınları və ağır hərbi texnikadan istifadə edərdi. Ermənistan tərəfinin bu iddiası öz əməllərini ört-basdır etməyə xidmət edir.

Məqalədə, həmçinin qeyd edilib ki, Azərbaycan Prezidenti İlham Əliyevin rəhbərliyi ilə Təhlükəsizlik Şurasının iclas keçirilib və dövlət başçısı iclasda Ermənistanın dövlət sərhədində törətdiyi bu kimi təxribatları ilk dəfə olmadığını diqqətə çatdırıb və ötən aylarda baş vermiş insidentlərə də toxunub. O vurğulayıb ki, baş vermiş hadisəyə görə tam məsuliyyəti Ermənistanın hərbi-siyasi hakimiyyəti daşıyır. Dövlət başçısı, həmçinin qeyd edib ki, Ermənistanın bu hərəkətinə riyakarlıqdan başqa ad vermək mümkün deyil, bir tərəfdən Ermənistan beynəlxalq ictimaiyyəti atəşkəs rejiminin gücləndirilməsini dəstəkləməyə çağırır, digər tərəfdən isə Azərbaycan ərazisinə hücum etmək, mövqeləri ələ keçirmək, mülki əhali və kəndləri atəş altında saxlamaq üçün hərbi təxribatlara əl atır.

Qeyd edilib ki, Azərbaycan tərəfi beynəlxalq təşkilatlara bu təxribatla əlaqədar müraciət edib və vəziyyət imkan verən kimi əcnəbi hərbi nümayəndələrin təxribatların kim tərəfindən törədilməsini görmələri üçün həmin əraziyə dəvət ediləcəklər. Diqqətə çatdırılıb ki, Azərbaycan mövqelərinə hücumun motivi də aydındır. Hazırda Ermənistanda hökm sürən xaos və böhran həddinə çatmış vəziyyət bu təxribatın əsas səbəbidir, çünki ölkədə hər kəs yaxşı anlayır ki, onlara söz verilən firavanlıq və rifah xülya və yalandan başqa bir şey deyil. Digər tərəfdən isə dövlət sərhədində təxribatın törədilməsi KTMT-ni bu hadisələrə cəlb etmək idi, lakin KTMT-yə üzv dövlətlər Ermənistanın bu məkrli niyyətini anlayaraq, təşkilatın Daimi Şurasının növbədənkənar iclasını təxirə salıblar.

Məqalənin yekununda Azərbaycan Prezidentinə istinadla bildirilib ki, Azərbaycan tərəfi düşmənin bütün təxribatçı fəaliyyətinə layiqli cavab verəcək və bunun üçün bütün mümkün imkanlardan istifadə edəcək. Çünki bizim işimiz haqq işidir və Azərbaycan öz prinsipial mövqeyindən bir addım geri atmayacaq.

Məqalədə, həmçinin Ermənistan silahlı bölmələrinin mülki əhalinin yaşadığı kəndləri hədəfə aldığı, artilleriya atəşi nəticəsində 76 yaşlı ahıl sakini qətlə yetirdikləri qeyd edilib, onların törətdiyi vəhşiliyi əks etdirən fotomaterial da yayımlanıb.

Elgün Niftəli

AZƏRTAC-ın xüsusi müxbiri

Vyana 

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.