CƏMİYYƏT
Azərbaycanın Bolqarıstandakı səfirliyində keçirilən tədbirdə ölkəmizdə uşaq hüquqlarının müdafiəsi ilə bağlı görülən işlərdən danışılıb
Sofiya, 26 yanvar, AZƏRTAC
Azərbaycanın Bolqarıstandakı səfirliyində bu ölkənin aparıcı qeyri-hökumət təşkilatlarından olan “Uşaqlarımız üçün” Fondunun keçirdiyi xeyriyyə hərracında səfirliyin təklifi ilə ziyafət təşkil edilib. “Uşaqlarımız üçün” Fondunun icraçı direktoru İvanka Şalapatova, hərracda ən yüksək məbləğ təklif edən “Petar Duçev” klinikasının rəhbəri Petar Duçev və klinikanın əməkdaşları Tsvetelina Duçeva, Tanya Mirçeva və Qabriela Xristova ziyafətdə iştirak ediblər.
Səfir Nərgiz Qurbanova bu il Azərbaycan və Bolqarıstan arasında diplomatik münasibətlərin qurulmasının 25 illiyinin qeyd edildiyini, bu çərçivədə səfirlik tərəfindən silsilə tədbirlərin keçiriləcəyini söyləyib. Ölkələrimiz arasında müxtəlif sahələrdə əməkdaşlıqdan məmnunluğunu bildirən səfir ötən il ərzində qarşılıqlı səfərlərin baş tutduğunu xatırladıb. Bu kontekstdə səfir bərpası Heydər Əliyev Fondu tərəfindən maliyyələşdirilmiş Trapezitsa Memarlıq Muzeyi Qoruğunun açılış mərasimində iştirak etmək məqsədilə ötən il sentyabrın 22-də Azərbaycanın birinci xanımı, Heydər Əliyev Fondunun prezidenti Mehriban Əliyevanın Bolqarıstana səfər etdiyini bildirib.
İ.Şalapatova rəhbərlik etdiyi “Uşaqlarımız üçün” Fondunun fəaliyyəti barədə məlumat verib. O, fondun əsas fəaliyyət istiqamətinin tərk edilmiş uşaqların dəstəklənməsinə yönəldiyini bildirib. Bolqarıstanın bu sahədə Avropa İttifaqı daxilində qabaqcıl ölkələrdən olduğunu vurğulayan direktor Azərbaycanla əməkdaşlıq imkanlarının nəzərdən keçirilə biləcəyini qeyd edib.
Səfir Azərbaycanda uşaq hüquqlarının müdafiəsinin prioritet istiqamətlərdən olduğunu, ölkəmizdə bu sahədə məsul qurum olan Ailə, Qadın və Uşaq Problemləri üzrə Dövlət Komitəsinin fəaliyyət göstərdiyini diqqətə çatdırıb, komitənin fəaliyyəti, həyata keçirdiyi tədbirlər, o cümlədən ölkəmizin ərazisinin bir hissəsinin Ermənistan tərəfindən işğalı nəticəsində qaçqın və məcburi köçkün düşmüş uşaqlara dövlət dəstəyi barədə məlumat verib. Diplomat qonaqları Azərbaycanın zəngin mətbəxi barədə də məlumatlandırıb.
Qeyd edək ki, 2016-cı il oktyabrın 26-da səfirlik Bolqarıstanın aparıcı qeyri-hökumət təşkilatlarından olan “Uşaqlarımız üçün” Fondunun təşkil etdiyi xeyriyyə gecəsində iştirak edib. Tədbirdə iştirak edən diplomatik nümayəndəliklərdən töhfə olaraq hərraca ölkələrinin mədəniyyəti, tarixi və ya mətbəxini nümayiş etdirən əşya ianə etmək və ya müvafiq səfirlikdə ziyafət təşkil etmək xahiş olunub. Hərracda Azərbaycanın Bolqarıstandakı səfirliyinin səfirlikdə ziyafət təşkil etmək təklifi maraqla qarşılanıb. Bu kateqoriyada toplanılmış vəsait baxımından səfirlik ikinci yer, hərracda ilk dəfə iştirak edən ölkələr arasında isə birinci yer tutub.
İqbal Hacıyev
AZƏRTAC-ın xüsusi müxbiri
Sofiya