SİYASƏT


Azərbaycanın İtaliyadakı səfirindən Serj Sarkisyana: “Saxtakarlıq yetər!”

Roma, 12 aprel, AZƏRTAC

Azərbaycanın İtaliyadakı səfiri Məmməd Əhmədzadənin bu ölkənin “La Stampa” qəzetində Serj Sarkisyana cavab məktubu dərc olunub. Prezident mandatının başa çatmasından bir neçə gün öncə Vatikanda və İtaliyada səfərdə olan S.Sarkisyan “La Stampa” qəzetinə müsahibəsində Ermənistan-Azərbaycan, Dağlıq Qarabağ münaqişəsinin mahiyyətini təhrif edən açıqlamalar verib.

Səfir M.Əhmədzadə “La Stampa” qəzetinin 12 aprel nömrəsində dərc olunmuş “Ermənistan, artıq saxtakarlıq yetər” sərlövhəli cavab məktubunda Sarkisyanın bu səfərin ona verdiyi fürsətdən öz günahlarına – Azərbaycana qarşı təcavüzə, mülki azərbaycanlı əhaliyə qarşı törətdiyi müharibə cinayətlərinə, Xocalı soyqırımına görə dua etmək üçün istifadə etməli olduğunu, Sarkisyanın rəhbərlik etdiyi hərbi xuntanın BMT-nin qətnamələrinə məhəl qoymayaraq Azərbaycanın 20 faiz torpaqlarını işğal altında saxladığını və 1 milyon azərbaycanlının öz doğma torpaqlarına qayıtma hüququnu pozduğunu bildirib.

Azərbaycanın işğal olunmuş ərazilərindəki qeyri-qanuni rejimlə bağlı Sarkisyanın illüziyalara qapıldığını və heç vaxt reallaşmayacaq bu illüziyaların Sarkisyanın öz məqsədinə çata bilməməsinin etirafı olduğunu deyən diplomat vurğulayıb ki, münaqişə yalnız Azərbaycanın ərazi bütövlüyü çərçivəsində həll edilməlidir.

Sarkisyanın Ermənistanla Avropa İttifaqı (Aİ) arasında imzalanmış sazişi təhrif etdiyini vurğulayan M.Əhmədzadə Aİ-nin rəhbər şəxslərinin Azərbaycanın ərazi bütövlüyünə tam dəstək ifadə etdiklərini bildirib. Səfir, həmçinin ermənilərin Azərbaycan torpaqlarına, o cümlədən Azərbaycanın İrəvan xanlığına XIX əsrdə köçürülməsinin və sonradan həmin torpaqlarda Ermənistanın yaradılmasının tarixi faktlar olduğunu da qeyd edib.

Diplomat Azərbaycanın müstəqil, siyasi, iqtisadi və hərbi cəhətdən güclü dövlət olduğunu, 2016-cı ilin aprel hadisələrinin ölkəmizin öz ərazi bütövlüyünü bərpa etməyə qadir olduğunu sübut etdiyini diqqətə çatdırıb. O, Ermənistanın bunu nə qədər tez anlayaraq öz ordusunu işğal olunmuş ərazilərdən çıxararsa bunun erməni xalqına bir o qədər tez fayda gətirəcəyini bildirib.

M.Əhmədzadə məktubunda Sarkisyanla müsahibənin müəllifi olan jurnalist Françesko Sempriniyə 6 aprel tarixində onun “La Stampa” qəzetində münaqişə ilə bağlı dərc olunmuş məqaləsinə münasibətdə də iradını bildirib. O, həmin məqalənin də qeyd olunan müsahibə kimi, erməni tərəfinin saxtakarlıq vasitəsilə ictimai rəy üzərində manipulyasiya etməsinin nümunəsi olduğunu, Ermənistanın təcavüzünə haqq qazandırmaq, münaqişə ilə bağlı əsl həqiqətləri gizlətmək və Azərbaycanın multikulturalizm modelinə kölgə salmaq məqsədi daşıdığını vurğulayıb.

Asiman Əsədov

AZƏRTAC-ın xüsusi müxbiri

Roma

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.