SİYASƏT
Azərbaycanın Qarabağ müharibəsindəki tarixi Qələbəsi ilə bağlı İslamabadda seminar keçirilib VİDEO
İslamabad, 19 noyabr, AZƏRTAC
Azərbaycanın Pakistandakı səfirliyi bu ölkənin Misak Araşdırma Mərkəzi ilə birgə Ermənistanın Azərbaycana qarşı son təcavüzü və müharibə cinayətlərini, Azərbaycanın özünümüdafiə və sülhə məcburetmə əməliyyatı və Qələbəsini Pakistan ictimaiyyətinə çatdırmaq məqsədilə “Dağlıq Qarabağ münaqişəsi – Hərbi və siyasi həll” mövzusunda seminar keçirib.
AZƏRTAC xəbər verir ki, Pakistan Senatında Pakistan-Azərbaycan parlamentlərarası dostluq qrupunun həmsədri (əlaqələndiricisi), senator Məhəmməd Talha Mahmudun, bir sıra dövlət rəsmilərinin, Misak Araşdırma Mərkəzinin baş direktoru Məhəmməd Abdullah Həmid Gülün, səfirlərin, Pakistanın ictimaiyyətinin və KİV nümayəndələrinin iştirak etdikləri seminar Vətən uğrunda canlarını fəda etmiş şəhidlərimizin xatirəsinin yad olunması ilə başlayıb.
Azərbaycan Prezidentinin münaqişə ilə bağlı beynəlxalq KİV-lərə verdiyi müsahibələrdən bəzi hissələrin nümayişindən sonra çıxış edən ehtiyatda olan hərbçi Əbdul Rəhman Bilal Ermənistanın ölkəmizə qarşı törətdiyi hərbi təcavüz və təxribatlar, Azərbaycanın zəfəri ilə nəticələnən uğurlu hərbi əməliyyatlar haqqında toplanmış faktlar əsasında təqdimat keçirərək Azərbaycanın təcrübəsindən gələcəkdə bir çox ölkələrin istifadə edəcəyini bildirib.
Azərbaycanın Pakistandakı səfiri Əli Əlizadə Qarabağın tarixi, ermənilərin bu ərazilərə köçürülməsi və son iki əsr ərzində törətdikləri qətliamlar, 30 ilə yaxın bir dövrdə Ermənistan-Azərbaycan münaqişəsinin sülh yolu ilə həllinə göstərilən səylərin nəticə verməməsi, BMT Təhlükəsizlik Şurasının qətnamələrinin icra edilməməsi, dünya birliyinin və beynəlxalq təşkilatların, xüsusən Minsk qrupunun üzvü olan dövlətlərin işğalçı Ermənistana lazımi təzyiqlər göstərməməsi haqqında məlumat verib. Səfir 2018-ci ildə Ermənistanda hakimiyyətə gələn baş nazir Nikol Paşinyanın aqressiv siyasəti, Ermənistanın ölkəmizə qarşı hərbi təcavüz və təxribatları, Azərbaycana və xüsusən ölkəmizin mülki əhalisinə qarşı hücumları haqqında söhbət açıb. Bildirilib ki, Azərbaycan özünümüdafiə hüququndan istifadə edərək sentyabrın 27-dən Ermənistanın təxribatlarına cavab verib, Ali Baş Komandan İlham Əliyevin rəhbərliyi ilə aparılan uğurlu əməliyyat nəticəsində Ermənistan kapitulyasiya edilib.
Səfir müharibə dövründə Ermənistanın, həmçinin üçüncü ölkələri münaqişəyə cəlb etmək, münaqişəyə dini qarşıdurma donu geyindirmək kimi təxribatlara da əl atdığını, eləcə də Ermənistanın ölkəmizin Gəncə, Bərdə, Tərtər, Mingəçevir və digər yaşayış məskənlərini, bu şəhərlərin mülki əhalisini böyük dağıdıcı gücə malik raketlərlə atəşə tutmaqla, eləcə də terrorçu və muzdlu döyüşçülərdən istifadə etməklə beynəlxalq hüququn norma və prinsiplərinə, o cümlədən beynəlxalq humanitar hüquqa, Cenevrə Konvensiyasının öhdəliklərinə zidd olan müharibə cinayətləri törətdiyini və Ermənistanın hərbi-siyasi rəhbərliyinin bu cinayətlərə görə məsuliyyət daşıdığını bildirib. Səfir Azərbaycanın Ermənistanı sülhə məcbur etməklə bütövlükdə münaqişədə qalib gəldiyini vurğulayıb və bu çətin günlərdə daim Azərbaycanın yanında olaraq göstərdiyi siyasi və mənəvi dəstəyə, prinsipial mövqeyə görə Pakistan hökumətinə və xalqına dərin təşəkkürlərini çatdırıb.
Seminarda çıxış edən Pakistan-Azərbaycan parlamentlərarası dostluq qrupunun həmsədri, senator Məhəmməd Talha Mahmud və Misak Araşdırma Mərkəzinin baş direktoru Məhəmməd Abdullah Həmid Gül də Ermənistanın ölkəmizə qarşı hərbi təcavüz və təxribatlarının, Azərbaycanın mülki əhalisinə qarşı amansız hücumlarının qarşısının Azərbaycan Ordusu tərəfindən qətiyyətlə alınmasının, işğal olunmuş torpaqların azad edilməsinin Azərbaycanın haqq işi olduğunu və beynəlxalq hüquqa tam əsaslandığını qeyd ediblər. Ermənistanın ölkəmizə qarşı təcavüz və hücumlarının Pakistan tərəfindən daim pisləndiyini, Azərbaycanın haqlı mövqeyində dəstək ifadə edən qətnamənin Pakistan parlamentində yekdilliklə qəbul edildiyini bildirən çıxışçılar Pakistan xalqının Azərbaycanın tarixi torpaqlarını işğaldan azad etməsi sevincini Azərbaycan xalqı ilə bölüşdüyünü vurğulayaraq Qələbə münasibətilə təbriklərini çatdırıblar.
Qulu Kəngərli
AZƏRTAC-ın xüsusi müxbiri
İslamabad