İQTİSADİYYAT


Azərbaycanın bank və kredit təşkilatları kənd təsərrüfatı maliyyə bazarları sahəsində Türkiyə təcrübəsini öyrənir

Bakı, 13 dekabr, AZƏRTAC

Kənd Təsərrüfatı Nazirliyi Azərbaycanın bir sıra bank və kredit təşkilatlarının nümayəndələrinin Türkiyəyə təcrübə səfərini təşkil edib.

Səfər Aqrar Kredit və İnkişaf Agentliyinin icra etdiyi “Azərbaycan Kənd Təsərrüfatı Maliyyə Aləti” (AzAFF) layihəsi çərçivəsində keçirilib.

AZƏRTAC xəbər verir ki, məqsəd AKİA-nın müvəkkil kredit təşkilatlarının və Azərbaycanın digər önəmli kredit təşkilatlarının mütəxəssislərinə Türkiyədəki kənd təsərrüfatı maliyyə bazarları haqqında məlumat vermək və onların Mərkəzləşdirilmiş Kənd Təsərrüfatı Kredit Qiymətləndirilməsi Sistemi haqqında praktik biliklər əldə etməsinə dəstək verməkdir.

Səfər çərçivəsində Türkiyənin Kənd Təsərrüfatı və Meşəçilik Nazirliyi, bu ölkənin əsas kredit təşkilatları ilə görüşlər keçirilib. Görüşlərdə Azərbaycan nümayəndə heyətinə Türkiyədə hazırda kənd təsərrüfatı sahəsində görülən işlər haqqında məlumat verilib. Üçgünlük səfər müddətində Azərbaycanın kredit mütəxəssisləri fermer təsərrüfatları ilə tanış olublar.

Qeyd edək ki, Avropa Yenidənqurma və İnkişaf Bankı (AYİB) tərəfindən Avropa İttifaqının (Aİ) maliyyə dəstəyi ilə 2015-ci ildən həyata keçirilən AzAFF layihəsi həm ölkədəki fermerlərə texniki dəstək verilməsi, həm də kredit təşkilatlarına kənd təsərrüfatı istehsalçılarının kredit təminatını yaxşılaşdırması üçün dəstək təklif edir. Azərbaycanda bütün kredit təşkilatlarının istifadəsi üçün açıq olan mərkəzləşdirilmiş AzALES - Kənd Təsərrüfatı Kreditlərinin Qiymətləndirmə Sistemi AzAFF layihəsi çərçivəsində qurulub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.