CƏMİYYƏT
Azərbaycanın dövlət sərhədini pozduqları üçün 25 nəfər saxlanılıb VİDEO
Bakı, 10 dekabr, AZƏRTAC
Dövlət Sərhəd Xidməti (DSX) tərəfindən 2014-cü ilin noyabr ayı ərzində dövlət sərhədinin etibarlı mühafizəsi istiqamətində məqsədyönlü tədbirlər həyata keçirilib, qaçaqmalçılığa, qeyri-leqal miqrasiyaya, narkotik vasitələrin qeyri-qanuni dövriyyəsinə qarşı mübarizə uğurla davam etdirilib.
Dövlət Sərhəd Xidmətinin mətbuat mərkəzindən AZƏRTAC-a bildiriblər ki, ay ərzində dövlət sərhədini pozduqları üçün 19 halda 25 nəfər saxlanılıb. Onların 7-si Özbəkistan, 6-sı Əfqanıstan, 4-ü Azərbaycan, 3-ü Türkiyə, üçü İran, hər ölkədən 1 nəfər olmaqla Rusiya və Moldova vətəndaşlarıdır.
Sərhəd rejim qaydalarını pozarkən yaşıl sərhəddə 10 halda 18 nəfər, Xəzər dənizində 15 halda 23 nəfər saxlanılaraq barələrində müvafiq tədbirlər görülüb.
Cinayətkarlığa qarşı mübarizə tədbirləri nəticəsində Azərbaycan Respublikasının hüquq mühafizə orqanları tərəfindən axtarışda olan 223 nəfər aşkarlanaraq aidiyyəti orqanlara təhvil verilib.
Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 13 halda 20 kiloqram 791 qram narkotik maddənin dövlət sərhədindən keçirilməsinin qarşısı alınıb.
Noyabrın 15-də keçirilmiş əməliyyat tədbirləri nəticəsində Yardımlı rayonunun Perimbel kəndi yaxınlığında yerləşən sərhəd zastavasının xidməti ərazisində Bakı şəhər sakini, 1980-ci il təvəllüdlü Məmmədov Əziməmməd Nadir oğlu saxlanılıb. Ona məxsus olan bağlamada 7 kiloqram həşiş qətranı, noyabrın 17-də Cəlilabad rayonunun Dələli kəndi yaxınlığında yerləşən sərhəd zastavasının xidməti sahəsində torpağa basdırılmış 5,8 kiloqram marixuana, 5 kiloqram tiryək aşkar olunaraq götürülüb.
“Astara” sərhəd nəzarəti məntəqəsində noyabrın 8-də Lənkəran rayon sakini, 1966-cı il təvəllüdlü Həsənov Asəf Məmmədağa oğlunun İran İslam Respublikasından Azərbaycana gələrkən üzərinə baxış keçirilərkən idman ayaqqabılarının içərisindən 210 qram heroin, əl yükünün içərisindən 920 milliqram metodon məhlulu, “Biləsuvar” sərhəd nəzarəti məntəqəsində noyabrın 16-da İrandan Azərbaycana keçən Mingəçevir şəhər sakini, 1968-ci il təvəllüdlü Rəhimov Nizami Vaqif oğlunun əl yükündən 700 milliqram metodon məhlulu, noyabrın 23-də İrandan Azərbaycana gələn Gəncə şəhər sakini, 1967-ci il təvəllüdlü Əhmədova Fəridə Firudin qızının belinə bağlanmış 2,3 kiloqram marixuana aşkar olunaraq götürülüb.
Noyabrın 16-da “Biləsuvar” sərhəd nəzarəti məntəqəsində İrandan Azərbaycana keçən Göyçay rayon sakinləri - 1970-ci il təvəllüdlü Abdurrəhmanov Ruslan Vaqif oğlunun bədəninin daxili orqanlarında gizlətdiyi 50 qram tiryək və 41 qram heroin, 1970-ci il təvəllüdlü Şəfiyev Sabir Cabir oğlunun bədəninin daxili orqanlarında gizlətdiyi 51 qram tiryək, 56 qram heroin aşkarlanaraq götürülüb.
Qaçaqmalçılıq fəaliyyətinə qarşı mübarizə çərçivəsində həyata keçirilmiş tədbirlər nəticəsində 73 halda ümumi dəyəri təqribən 553 min manat olan qaçaqmal, o cümlədən 2 ədəd 16 millimetrlik tüfəng, 7 ədəd 16 millimetrlik patron, 3 tapança, pnevmatik tapança üçün 1000 ədəd patron və 2 qaz balonu, 1 kiloqram barıt, 44.342 ədəd pirotexniki vasitə, 1,3 kiloqram qızıl zinət əşyaları, 6092 qutu siqaret, 2 rezin qayıq, 264 ədəd mobil telefon, müxtəlif dərman preparatları və istehlak malları saxlanılıb.
Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.