REGİONLAR
Azərbaycanın ərazi bütövlüyünün bərpası Milli Konstitusiyamızın 25 illiyinə ən gözəl töhfədir
Naxçıvan, 12 noyabr, AZƏRTAC
AMEA-nın Naxçıvan Bölməsində 12 Noyabr - Azərbaycan Respublikasının Konstitusiya Gününə həsr olunmuş “Milli Konstitusiyamız ölkəmizin demokratik inkişafının başlıca təminatıdır” mövzusunda tədbir keçirilib.
Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, əvvəlcə Qələbə münasibətilə elm müəssisəsinin əməkdaşlarını təbrik edən bölmənin sədri, akademik İsmayıl Hacıyev ümummilli lider Heydər Əliyevin dövlətçiliyimizin təşəkkül tapmasında əvəzsiz xidmətlərindən danışıb. Akademik görkəmli dövlət xadiminin müasir Azərbaycanın inkişafı tarixindəki rolundan, demokratik, hüquqi dövlət quruculuğu sahəsində həyata keçirdiyi müdrik və uğurlu siyasətindən söz açıb. O, ömrünü Azərbaycanın tərəqqisinə, xalqımızın xoşbəxtliyinə həsr etmiş Ulu Öndərimizin xalqın təkidli tələbi ilə respublikada yenidən siyasi hakimiyyətə qayıdışından sonra xalqı müstəqil Azərbaycan və azərbaycançılıq ideyaları ətrafında birləşdirməsinin əhəmiyyətini vurğulayıb.
Bölmə sədri Azərbaycan xalqının və dövlətçiliyinin tarixində ilk Milli Konstitusiyanın qəbul edilməsi zərurətindən bəhs edərək deyib ki, müstəqilliyimizin əsas atributu olan Azərbaycan Respublikası Konstitusiyasının referendum yolu ilə qəbul edilməsi ölkənin dövlət və hüquq tarixində xüsusi yer tutan mühüm hadisə, dövlətçiliyin formalaşdırılması, siyasi və hüquqi sistemdə möhkəm özülün yaradılması işində mühüm addımlardan biridir. 1995-ci ildə ümummilli lider Heydər Əliyevin sədrliyi ilə tarixi zərurət nəzərə alınaraq 33 nəfərdən ibarət Konstitusiya komissiyası yaradılıb və Konstitusiya layihəsi hazırlanıb. 5 bölmə, 12 fəsil, 158 maddədən ibarət yekun layihə ümumxalq səsverməsinə çıxarılıb. Beləliklə müstəqil dövlətimizin ilk Milli Konstitusiyası 1995-ci il noyabrın 12-də keçirilən referendum yolu ilə qəbul olunub və həmin il noyabrın 27-də qüvvəyə minib.
İsmayıl Hacıyev ötən 25 ildə Azərbaycan Respublikasının Konstitusiyasına edilən dəyişikləri də diqqətə çatdırıb.
Sonra bölmənin Tarix, Etnoqrafiya və Arxeologiya İnstitutunun Arxeoloji xidmət şöbəsinin müdiri, tarix üzrə fəlsəfə doktoru, dosent Zeynəb Quliyevanın “Azərbaycanın ərazi bütövlüyünün bərpası Milli Konstitusiyamızın 25 illiyinə ən gözəl töhfədir” mövzusunda məruzəsi dinlənilib.
Daha sonra bölmənin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Fəxrəddin Səfərli, Təbii Ehtiyatlar İnstitutunun direktoru, AMEA-nın müxbir üzvü Tofiq Əliyev mövzu ətrafında çıxış ediblər.