SİYASƏT
Azərbaycanın hərtərəfli inkişafı ulu öndər Heydər Əliyevin hakimiyyətə gəlişindən sonra başladı
Bakı, 10 iyul, AZƏRTAC
Ulu öndər Heydər Əliyevin Azərbaycanda hakimiyyətə gəlişinin 46-cı ildönümü ilə əlaqədar Azərbaycan Vətən Müharibəsi Veteranları Birliyinin Şəhidlər xiyabanındakı qərargahında Səbail Rayon İcra Hakimiyyətinin, Ağsaqqallar Şurasının, Azərbaycan Vətən Müharibəsi Veteranları Birliyinin, digər ictimai təşkilatların, rayon bələdiyyələrinin və ictimaiyyətinin, KİV nümayəndələrinin iştirakı ilə tədbir keçirilib.
Əvvəlcə Ümummilli Liderin xatirəsi bir dəqiqəlik sükutla yad edilib.
Səbail Rayon İcra Hakimiyyəti başçısının müavini Eldar Ağayev çıxış edərək ulu öndər Heydər Əliyevin Azərbaycanda hakimiyyətdə gəlişi və fəaliyyəti haqqında geniş məruzə ilə çıxış edib. Bildirib ki, 46 il əvvəl - 1969-cu il iyul ayının 14-də Azərbaycan Kommunist Partiyası Mərkəzi Komitəsinin Plenumunda Heydər Əliyev Azərbaycan Kommunist Partiyasının birinci katibi seçilib. O vaxtdan etibarən Azərbaycanın inkişafında böyük dönüş və tərəqqi başlanıb. Heydər Əliyevin böyük səyləri, vətənə və xalqa məhəbbəti, təşkilatçılıq qabiliyyəti, mövcud problemləri dərindən öyrənərək onların aradan qaldırılmasını təmin etmək bacarığı öz bəhrəsini verib. Bir zamanlar keçmiş Sovet İttifaqının geridə qalmış aqrar respublikası olan Azərbaycan Heydər Əliyevin yorulmaz səyləri, bilik və bacarığı, gərgin əməyi sayəsində sənaye və kənd təsərrüfatının geniş inkişaf etdiyi qabaqcıl bir respublikaya çevrilib. Respublikada yüzlərlə iri sənaye müəssisəsi, sosial obyekt inşa edilib, əhalinin şəraitinin yaxşılaşdırılması üçün genişmiqyaslı mənzil tikintisi layihələri həyata keçirilib.
Qeyd edilib ki, zəngin təcrübəsi, böyük təşkilatçılıq bacarığı, gördüyü işlər sayəsində keçmiş Sovet İttifaqının bütün guşələrində böyük hörməti olan Heydər Əliyev Sovet İttifaqı Kommunist Partiyası Siyasi Bürosunun üzvü seçilib, həmin dövrdə SSRİ-nin ən yüksək dövlət postlarından olan SSRİ Nazirlər Sovetinin birinci müavini təyin olunub. 1993-cü ildə xalqın təkidli tələbi ilə Azərbaycanda ikinci dəfə hakimiyyətə gəldikdən sonra Heydər Əliyev ölkəmizi parçalanmaqdan, məhv olmaqdan qoruyub, xalqımızın xilaskarına çevrilib. O, bu gün aparıcı dünya dövlətlərinin hesablaşdığı Azərbaycan Respublikasının hərtərəfli inkişafının əsasını qoyub. Heydər Əliyevin əsasını qoyduğu siyasət bu gün onun layiqli davamçısı Prezident İlham Əliyev tərəfindən uğurla davam etdirilir.
Toplantıda çıxış edən Azərbaycan Respublikası Prezidenti Administrasiyasının ictimai-siyasi məsələlər şöbəsinin məsul əməkdaşı Rasim Mirzəyev, YAP Səbail rayon təşkilatı aparatının rəhbəri Zəfər Bayramov, Azərbaycan Vətən Müharibəsi Veteranları Birliyinin sədri Fizuli Rzaquliyev, Respublika Veteran Təşkilatları Şurasının sədr müavini, ehtiyatda olan polkovnik Adil Haqverdiyev, Əfqanıstan Müharibəsi Veteranları İttifaqının sədri Məhəmməd Vəliyev, Anadolu Universitetinin Azərbaycan nümayəndəliyinin rəhbəri Azər Hümbətov, müharibə veteranı Cəbrayıl Əliyev, Türkiyə Universitetləri Məzunları İctimai Birliyinin sədri Çingiz Bayramov, gənc yazar Ülkər Piriyeva və başqaları Ulu Öndərin 46 il öncə hakimiyyətə gəlişi, onun Azərbaycanın inkişafı istiqamətində həyata keçirdiyi böyük işlər haqqında danışıblar.
Çıxışlarda xüsusi vurğulanıb ki, Səbail rayonunda fəaliyyət göstərən ictimai təşkilatların üzvləri Ulu Öndərimizin siyasi kursunun layiqli davamçısı Prezident İlham Əliyevin Azərbaycanın inkişaf və tərəqqisinin günbəgün artması, qüdrətli və zəngin bir dövlətə çevrilməsi və ən başlıcası itirilmiş torpaqlarımızın geri qaytarılması istiqamətində apardığı işləri bəyənir və hər zaman bu işlərdə ona dəstək olacaqlar.