İDMAN


Azərbaycanın iki cüdoçusu “Böyük dəbilqə” turnirində bürünc medal uğrunda mübarizə aparacaq

Bakı, 20 fevral, AZƏRTAC

Azərbaycanın iki cüdoçusu İsrailin paytaxtı Təl-Əvivdə keçirilən “Böyük dəbilqə” turnirində bürünc medal uğrunda mübarizə aparacaq.

AZƏRTAC xəbər verir ki, kişilər arasında 90 kiloqram çəki dərəcəsində mübarizə aparan Məmmədəli Mehdiyev Orelyen Diss (Fransa), Komronşoh Usopirion (Tacikistan) və Kristian Tota (Macarıstan) qalib gələrək yarımfinala yüksəlib. Növbəti mərhələdə ispaniyalı rəqibi Nikoloz Şerazadişvilinin öhdəsindən gələ bilməyən cüdoçumuz final şansını əldən qaçırıb və üçüncü yer uğrunda mübarizəyə qatılmalı olub. M.Mehdiyev bürünc medal uğrunda görüşdə gürcüstanlı Beka Qviniaşvili ilə qarşılaşacaq.

Komandamızın digər üzvü Zelim Kotsoyev (100 kq) də üçüncü yer uğrunda görüşdə iştirak edəcək. İdmançımız yarımfinala gedən yolda Boris Georgiyevə (Bolqarıstan), Toma Nikiforova (Balarus) qalib gəlsə də, dörddəbir finalda gürcüstanlı Onis Saniblidzeyə uduzub. İdmançımız təsəlliverici görüşdə Çili təmsilçisi Tomas Briselonu mübarizədən kənarlaşdırıb. Üçüncü yer uğrunda qarşılaşmada təmsilçimizin rəqibi rusiyalı Niyaz İlyasov olacaq.

Digər cüdoçularımızdan Elmar Qasımov (100 kq) ilk görüşdə İoakim Dvarbinini (İsveç) məğlub etsə də ikinci qarşılaşmada gürcüstanlı Onis Saniblidzeyə uduzub.

Ağır çəkili (+100 kq) cüdoçuların yarışında Uşangi Kokauri Niderland təmsilçisi Ben Spiykers, Camal Feyziyev isə İsrail idmançısı Serafim Kompanyes ilə ilk görüşdə məğlub olublar.

Qeyd edək ki, buna qədər cüdoçumuz Davud Məmmədsoy (60 kq) bütün rəqiblərini məğlub edərək qızıl medala sahib olub. Komandamızın digər üzvü - 66 kiloqram çəki dərəcəsində çıxış edən Nicat Şıxəlizadə isə yeddinci yeri tutub.

Yarışda 60 ölkədən 400-dən çox idmançı mübarizə aparır. Azərbaycan turnirə 15 idmançı ilə qatılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.