Bakı, 15 aprel, AZƏRTAC

Əlbəttə, bizim iqtisadi və sosial planlarımız yerindədir. Koronavirus planlarımıza müəyyən təsir etsə də, bizi əsas yolumuzdan döndərə bilməz.

Azərbaycan Prezidenti İlham Əliyevin 2020-ci ilin birinci rübünün sosial-iqtisadi yekunlarına həsr olunan videokonfrans şəklində müşavirədə dediyi bu sözlər Azərbaycanda uğurlu islahatların cari ilin ikinci rübündə də davam edəcəyini bir daha təsdiq edir.

Bu fikirləri AZƏRTAC-a açıqlamasında Milli Məclisin deputatı Jalə Əhmədova bildirib.

J.Əhmədova qeyd edib ki, müşavirədə Prezident İlham Əliyevin də qeyd etdiyi kimi, 2020-ci il Azərbaycan üçün uğurla başlayıb, inkişaf və tərəqqi müşahidə olunub. Digər ölkələrlə müqayisədə Azərbaycanda qabaqlayıcı tədbirlər və düşünülmüş siyasət nəticəsində vəziyyət nəzarətdə saxlanılıb. Təsadüfü deyil ki, Azərbaycanın koronavirusla uğurlu mübarizə modeli bir çox dövlətlər tərəfindən təqdir və tətbiq edilir. Hər zaman olduğu kimi, Azərbaycan hakimiyyəti bir daha nümayiş etdirdi ki, ən əsas məsələ vətəndaşların sağlamlığı və insanlarımızın həyatıdır. Bunun təsdiqi olaraq, Azərbaycan Prezidentinə ünvanlanan çoxsaylı təşəkkür məktubları qeyd edilməlidir. Hazırda Azərbaycanda son günlərin rəqəmləri ümidvericidir və ümid etmək olar ki, xəstələrin sayı ilə bağlı müsbət dinamika bundan sonra da davam edəcək.

Deputat vurğulayıb ki, Prezident İlham Əliyevin uzaqgörən və müdrik siyasəti sayəsində həm siyasi, həm iqtisadi, həm də sosial məsələlərin həlli istiqamətində elə bir vəziyyət yaranıb ki, Azərbaycan heç kimdən asılı deyil. Bu vəziyyətdən şərəflə çıxmaq bir daha göstərəcək ki, bütün addımlar düşünülmüş addımlardır və xalqın, dövlətin maraqlarına uyğundur. Azərbaycan sosial dövlət olduğunu bir daha sübut edərək, mövcud vəziyyətdən əziyyət çəkən vətəndaşların problemlərini həll etməkdədir. Bu məqsədlə böyük məbləğdə vəsait ayrılıb, 600 mindən çox insan dövlət tərəfindən dəstəklə təmin edilir. İşsizlərlə bağlı problemlər öz həllini tapır. Son aylar ərzində ünvanlı sosial yardım alan insanların sayı artırıb, indi 70 mindən çoxdur. Koronavirusla bağlı ümumi dəstək paketi 2,5 milyard manat nəzərdə tutulur. Koronavirusla mübarizə sahəsində lazımi avadanlıqların, ləvazimatların alınması üçün Prezidentin ehtiyat fondundan 97 milyon manat ayrılıb, hələ 150 milyon manatın ayrılması da nəzərdə tutulur.

Əminliklə vurğulamaq olar ki, 2020-ci il də çox dərin və geniş islahatlar ili olacaq. Aparılan islahatlar nəticəsində ölkəmiz indi yeni inkişaf mərhələsinə inamla qədəm qoyur. Bütün hakimiyyət qollarında aparılan islahatlar bir məqsədi güdür ki, idarəetmə mexanizmi daha da təkmilləşsin, gəncləşmə siyasəti aparılsın və peşəkar kadrlar önəmli vəzifələrə gətirilsin. Parlament seçkiləri göstərdi ki, aparılan siyasət Azərbaycan vətəndaşları tərəfindən bəyənilir və dəstəklənir. Əsas məqsəd elə siyasi sistem yaratmaqdır ki, fərqli baxışlardan asılı olmayaraq, hər bir siyasi qüvvə üçün bir amal müqəddəs olsun, o da dövlətçilik, müstəqillik, azadlıq, rifah və inkişafdır. Belə olan halda həm siyasi müstəvidə işlər müsbət istiqamətdə gedəcək, eyni zamanda, ölkədə mövcud olan problemlər daha tez həll olunacaq.