İQTİSADİYYAT
Azərbaycanın sahibkar və menecerləri Almaniyada ixtisasartırma kursuna göndərilib
Bakı, 11 iyun, AZƏRTAC
Kiçik və Orta Biznesin İnkişafı Agentliyinin (KOBİA) təşkilatçılığı ilə “Azərbaycanın biznes ictimaiyyətində menecerlərin ixtisasının artırılması üzrə Almaniya-Azərbaycan birgə Proqramı” çərçivəsində 18 sahibkar və menecerdən ibarət daha bir qrup təlim və istehsalat təcrübəsi keçmək üçün Almaniyaya səfər edib.
KOBİA-dan AZƏRTAC-a bildirilib ki, turizm, nəqliyyat, inşaat, İKT və iqtisadiyyatın digər sahələrində fəaliyyət göstərən sahibkar və menecerlər iyunun 11-dən iyulun 6-dək ixtisasartırma kursu müddətində Almaniyanın Heydelberq şəhərindəki “AHP-International” Tədris Mərkəzində təlim, müvafiq sahələrdə fəaliyyət göstərən alman müəssisələrində istehsalat təcrübəsi keçəcəklər. Təlim müddətində sahibkar və menecerlərin işgüzar əlaqələrinin qurulması və genişləndirilməsi üçün müxtəlif alman şirkətləri ilə görüşlərinin təşkili də nəzərdə tutulur.
Qeyd edək ki, “Azərbaycanın biznes ictimaiyyətində menecerlərin ixtisasının artırılması üzrə Almaniya-Azərbaycan birgə Proqramı” çərçivəsində bu il martın 25-dən aprelin 19-dək aqrar sahədə fəaliyyət göstərən 17 sahibkar və menecer Almaniyada ixtisasartırma kursu keçib. Proqramın icra olunduğu 2009-cu ildən indiyədək isə 400-dən çox sahibkar və menecer Almaniyada təlim və təcrübə keçib.