Bakı, 1 avqust, AZƏRTAC

Azərbaycan Respublikasının Misir Ərəb Respublikasındakı səfiri Elxan Poluxov Azərbaycan Respublikasının Ərəb Dövlətləri Liqasında (ƏDL) daimi müşahidəçi təyin edilməsi ilə əlaqədar təyinat məktubunu Liqanın Baş katibi Əhməd Əbu Əl-Ğeytə təqdim edib.

Ölkəmizin Misirdəki səfirliyindən AZƏRTAC-a bildiriblər ki, təqdimat mərasimində səfir E.Poluxov Azərbaycanın ərəb dövlətləri ilə əlaqələrin inkişafına, o cümlədən ƏDL Baş Katibliyi ilə əməkdaşlığa xüsusi önəm verdiyini, bir çox formatlarda keçirilən görüşlərin münasibətlərin inkişafı üçün vacib olduğunu bildirib.

Ə.Əbu Əl-Ğeyt səfir E.Poluxovu təyinatla bağlı təbrik edərək, ona fəaliyyətində uğurlar arzulayıb, bu təyinatın əməkdaşlığa öz töhfəsini verəcəyini bildirib. O, keçən ilin iyun ayında Bakıya səfər etdiyini, Azərbaycan Prezidenti İlham Əliyev ilə keçirdiyi görüşləri xatırladaraq ƏDL ilə Azərbaycan arasında əməkdaşlığın inkişaf perspektivlərindən söhbət açıb.

Səfir E.Poluxov son zamanlar regionda baş verən hadisələrə toxunaraq, ƏDL-in rəhbərinə Azərbaycan ilə Ermənistan arasında aparılan danışıqlar, sərhədlərin müəyyən edilməsi, Zəngəzur dəhlizi, Laçın yolunda gedən proseslər və azad olunmuş torpaqlarda aparılan quruculuq işləri barədə geniş məlumat verib.