SİYASƏT
Azərbaycanın xarici işlər naziri Meksikanın yeni seçilmiş prezidentinin andiçmə mərasimində iştirak edib
Bakı, 2 dekabr, AZƏRTAC
Azərbaycanın xarici işlər naziri Elmar Məmmədyarov Meksika Birləşmiş Ştatları Prezidenti Andres Manuel Lopez Obradorun andiçmə mərasimində iştirak edib.
Xarici İşlər Nazirliyindən AZƏRTAC-a bildirilib ki, mərasimə bir sıra ölkələrin dövlət başçıları, yüksək səviyyəli qonaqlar qatılıblar.
Tədbir çərçivəsində Elmar Məmmədyarov Meksikanın yeni təyin olunmuş xarici işlər naziri Marselo Ebrard Kasaubon ilə görüşüb. Görüşdə E.Məmmədyarov Prezident İlham Əliyevin Meksika Prezidentinə səlahiyyətlərinin başlanılması münasibətilə təbriklərini çatdırıb. Tərəflər iki ölkə arasında münasibətlərin inkişafı perspektivlərini müzakirə ediblər.