İQTİSADİYYAT
Azərbaycanın xarici ölkələrə yatırdığı investisiyaların həcminə görə Türkiyə birinci yeri tutur
Azərbaycan-Türkiyə əlaqələri uğurla inkişaf edir. Türkiyə Azərbaycanın xarici ölkələrə yatırdığı investisiyaların həcminə görə birinci yeri tutur.
Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) təşkilatçılığı ilə Bakıda keçirilən “Qarşılıqlı ixracatın təşkili və üçüncü bazarlara birgə ixracat imkanları” adlı Azərbaycan-Türkiyə biznes forumunda ölkələrimiz arasında əməkdaşlığın geniş spektrləri müzakirə olunub.
AZƏRTAC xəbər verir ki, Azərbaycan Respublikasının İqtisadiyyat və Sənaye Nazirliyi, Azərbaycanda İxracın və İnvestisiyaların Təşviqi Fondu (AzPROMO) və digər müvafiq dövlət qurumlarının dəstəyi ilə keçirilən tədbirdə iqtisadiyyatın müxtəlif sahələrini (proqram təminatı, avadanlıq, elektronika, təhlükəsizlik sistemləri, kabel, ölçü cihazları, TV reklam) təmsil edən Türkiyə şirkətləri iştirak ediblər.
Türkiyə Elektrik Texnologiyaları idarə heyətinin sədri Fatih Kamal forumun iki ölkənin iş adamları arasında mövcud əlaqələrin inkişafına töhfə verəcəyini bildirdi. Qeyd etdi ki, Azərbaycanda keçirilən konfrans, sərgi və biznes forumlar ikitərəfli əlaqələrin inkişafında əhəmiyyətli rol oynayır.
İqtisadiyyat və sənaye nazirinin müavini Sahib Məmmədov iş adamlarının ikitərəfli görüşlərinin ölkələrimiz arasında iqtisadi-ticarət əlaqələrinin inkişafına, işgüzar əlaqələrin yeni sahələr üzrə genişlənməsinə təkan verdiyini diqqətə çatdırdı. Nazir müavini hazırda Türkiyədə inşaat, sənaye, xidmət, turizm, enerji və nəqliyyat sahələrində 1400-dən çox Azərbaycan şirkətinin fəaliyyət göstərdiyini, 1995-2013-cü illərdə Türkiyə tərəfindən Azərbaycanda qeyri-neft sektoruna 1,9 milyard dollar həcmində birbaşa investisiya yatırıldığını vurğuladı.
Türkiyə Respublikasının Bakıdakı səfiri Alper Coşkun biznes forumun Azərbaycan-Türkiyə dostluğunun və əməkdaşlığının daha bir nümunəsi olduğunu qeyd etdi. Regionun inkişafında Azərbaycanın rolunu yüksək qiymətləndirən A.Coşkun ölkəmizdəki sürətli iqtisadi inkişafı böyük maraqla izlədiyini bildirərək Türkiyə iqtisadiyyatı, Azərbaycanla mövcud iqtisadi əlaqələrin daha da genişlənməsi imkanları barədə danışdı.
Səfir bildirdi ki, Azərbaycan neft kapitalını insan kapitalına çevirmək üçün yeni yollar axtarılır. Hazırda kənd təsərrüfatının inkişafı üçün mühüm sərmayələr yatırılır. Burada inşaat, turizm və heyvandarlıq sahələrinin inkişaf etdirilməsinə əlverişli şərait var.
Türkiyə Azərbaycana yeni hədəflərə çatmaqda öz köməyini göstərməyə hazırdır. Ölkədə ticarətin inkişafı üçün Türkiyə iş adamlarının rahat işləmələrinə şərait yaradılmalıdır. Prosesləri elə nizamlamaq lazımdır ki, bundan həm Azərbaycan iqtisadiyyatı və milli sənayesi fayda götürsün, həm də ticarət dövriyyəsi artırılsın.
ASK-ın prezidenti Məmməd Musayev Azərbaycan Prezidenti İlham Əliyev tərəfindən həyata keçirilən sosial-iqtisadi siyasət və qazanılmış uğurlar barədə məlumat verərək, ölkəmizdə aparılan genişmiqyaslı inkişaf və quruculuq proseslərinə xarici tərəfdaşlar tərəfindən böyük maraq göstərildiyini vurğuladı. Qeyd olundu ki, qardaş ölkənin müxtəlif dövlət qurumları ilə iqtisadi, regional, sahibkarlığın inkişafı sahələrində geniş əməkdaşlıq həyata keçirilir. Hazırda Azərbaycanda türk şirkətləri, eləcə də Türkiyədə Azərbaycan şirkətləri uğurla fəaliyyət göstərirlər.
Türkiyə və Azərbaycan sahibkarlarının iş birliyinə diqqət çəkən konfederasiya rəhbəri, ölkəmizin dünya ixracatında yer alması istiqamətində atılan addımların zəruriliyini vurğuladı: “Bugünkü forumda məqsədimiz Türkiyə İxracatçılar Birliyi ilə birlikdə üçüncü ölkələrə ixracı həyata keçirməkdir. Azərbaycanda da ixrac birliyi yaratmaq, ixrac təcrübəsini öyrənmək və bu sahədəki bilgiləri sahibkarlara aşılamaq, yerli məhsullarımızı dünyaya çıxarmaqdır”.
Biznes forum iş adamları arasında ikitərəfli görüşlərlə davam etdirildi.