CƏMİYYƏT


Azərbaycanla Macarıstan arasında qida məhsullarının idxal-ixrac əməliyyatları ilə əlaqədar müzakirələr aparılıb

Bakı, 30 iyun, AZƏRTAC

Qida Təhlükəsizliyi Agentliyinin və Macarıstanın Qida Zəncirinə Nəzarət Qurumunun nümayəndə heyəti arasında görüş keçirilib.

Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, görüşdə ilkin tanışlıq məqsədilə hər iki tərəfin nümayəndələri qarşılıqlı təqdimatla çıxışıb ediblər.

Görüş zamanı Azərbaycandan bitkiçilik məhsullarının Macarıstan və digər Avropa İttifaqı ölkələrinə ixracına texniki dəstək göstərilməsi, eləcə də gələcək əməkdaşlıq imkanları müzakirə olunub. 2022-ci il fevralın 3-də imzalanmış “Azərbaycan Respublikası Hökuməti və Macarıstan Hökuməti arasında iqtisadi əməkdaşlıq üzrə Birgə Komissiya”nın 8-ci iclasının protokolu və “Azərbaycan Respublikasının Qida Təhlükəsizliyi Agentliyi ilə Macarıstanın Kənd Təsərrüfatı Nazirliyi arasında qida təhlükəsizliyi və heyvan sağlamlığı sahəsində əməkdaşlıq haqqında Anlaşma Memorandumu”nda qida təhlükəsizliyi sahəsi üzrə öz əksini tapmış müddəalar ətrafında fikir mübadiləsi aparılıb və əməkdaşlığın həyata keçirilməsi istiqamətində tədbirlər müəyyənləşdirilib.

Tədbirdə 2021-2022-ci illər ərzində Azərbaycan ilə Macarıstan arasında qida məhsulları, fitosanitar və baytarlıq nəzarətində olan məhsulların idxal-ixrac əməliyyatları ilə bağlı müzakirələr aparılıb. Macarıstandan ölkəmizə əsasən canlı bitki, şokolad, konservləşdirilmiş tərəvəz və ət məhsullarının idxal olunduğu, ölkəmizdən Macarıstana meyvə-tərəvəz şirəsi və hazır sousların ixrac olunduğu vurğulanaraq bildirilib ki, həmin idxal-ixrac əməliyyatlarının müvafiq prosedurlara uyğun həyata keçirilməsi təmin olunub, ortaya çıxan texniki çətinliklər işçi qaydada həll edilib.

Görüşdə Anlaşma Memorandumu və Hökumətlərarası Komissiyanın Protokolunun icrasının təmin edilməsi çərçivəsində qida məhsullarının izlənilə bilməsi və geri çağırılması sahəsində, eyni zamanda yem məhsulları, qida və yem əlavələri, bioloji aktiv qida məhsulları, qida məhsulları ilə təmasda olan materialların dövlət qeydiyyatına alınması ilə əlaqədar təcrübə mübadiləsinin həyata keçirilməsinə dair razılıq əldə olunub.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.